इब्रानि 2

उद्धारोओ उपेक्षाआ विरुद्ध चेतावनी

1या कारन जोवे का आमू तो गोठीही पोओं जे आमू होमबली ही अने फाशो बी मोन लागाड़े एहलो ने होय का बोहकीत तियाआ रोत सेटे जाते रोय. 2काहाके जे वचन स्वर्गदूत कोयु ओते जाहा ते स्थिर रोल्या अने हर एक अपराध अने आज्ञा न मानणारा बराबर फोल जोडयेहे, 3ताहा आपु एहलो वोडो तारणा पासून सेटे पालत्लु कोईत केहलो वासई शकतो? ज्याआ गोठी पेलाठीच प्रभूउ त्यापोरत उवी अने होमलिनारे त्यापोरत आमाहा तियाआ खात्री पटली. 4अने आरी परमेश्वर पण आपाआ इच्छावाहि चिन्ह अदभूत काम अने अनेक प्रकारोओ पराक्रमाआ काम अने पवित्र आत्माआ वरदानोहो वाटीलो मेहे याआ साक्ष आपतु रोयु. 5तिये तिया आवनाराआ जगाला ज्याआ गोठी आपु कोईत होय स्वर्गदूताआ होपित कोल्यु नाहा. 6पोन कोडु का ए साक्ष आप्यी होय मांहु कोडू होय का तू तियाआ ओर कोअही? किंवा माअहा पोऱ्या कोडू होय का तू तियाआ चिंता कोअत्लू? 7तू तियाहा स्वर्गदूताहून थोडोजे कोम कोल्यु; तो तियापो गौरव अने थोरवी याआ मुकुट मेकलू अने तियाहा आपाआ आथाआ का मापो अधिकार आप्यू. 8तू आखे किबी त्या गुडा थुडी कोईत आप्लु त्यापोत जर तिये आखे तियाआ अधीन कोईत आप्लु ताहा तिये किबी राखीत मेकल्ये नाहा जे तियाआ अधीन नाहा पण आमाहा ओमे पर्यंत आखोज तियाआ अधीन पालीलो नाहा. 9पोन आमू येशुहू जो स्वर्गदूताहून थोडोज कोम कोअयु ओतु मोईलो दु; ख उसलीलो कारन गौरव अने आदरो मुकुट पेअलु पालत्लू म्हणजे परमेश्वरोओ कृपेवाही तो हर एक मांहाकोअता मोईला चव साखित. 10काहाके याकोअता आखे किबी होय अने ज्यावाही आखे किबी होय तियाहा ओच हाजो लागेहे का जास्तीज पोऱ्याहा गौरवात पोताळिहि ताहा तियाआ तारण कर्ताहा दु:ख उठलीताहा सिद्ध कोईलो. 11काहाके पवित्र कोअनारू अने जे पवित्र कोल्यु जातेहे आखे एकुच मुल मेहेरोत होय; या कारनोवाही तियाहा पाही कोयु ओ लाज नाहा. 12तो कोत्लू आयताआ नाव आमा पायहोहो कोनारू सभा माय आयताआ भजन गानारू. 13अने फासाडी ओ तियापो आय विश्वास मेकही अने फासाडी ओ पाला आय तियाअ पोर्यआरी जाअलो परमेश्वराने माहु आप्लु. 14याकोअता का जाहा पोऱ्ये माहा अने रोक्तारी सहभागी होय ताहा स्वतःपण तियाआ सारखू तिया सहभागी ओतगोयु म्हणजे मरणो द्वारा तियाहा मरणोपो शक्ती जोड़ी ओती म्हणजे शैतानोहो निकम्मा कोई देय, 15अने जेवडे मोईला बिकसी आयुष्य मेहे गुलामा मेहे गुंतले ओते तियाहा सोडवीत ले. 16काहाके तो ताहा स्वर्गदूतो नाहा ताहा अब्राहम वाडवडील सम्भात्लू. 17यामुळे तियाहा जोवे ओते का आखे गोठी आपाआ पायहो होस बोनिलो जोवे याकोअता तो तियाअ गोठीमेहे जे परमेश्वरा बरोबर संबध मेकात्ले एक दयालु अने विश्वास महायाजक सेवक बोनिलो जोवे म्हणजे माहु पापो कोअता पश्चताप कोअनारू. 18काहाके जाहा तिये परीक्षेच्या टायमोमें दु:ख सहन कोल्यु ताहा तो तियाआ पोन मदत कोहू शकतो ज्याआ परीक्षा उवनारा ओते.

Currently Selected:

इब्रानि 2: NOINT

Highlight

Copy

Compare