इफिसी 5

प्रेम मेहे साला

1याआ कोअता प्रिय पोर्याआ हारके परमेश्वरा अनुकरण कोआ, 2अने प्रेमाम साला जेहलो ख्रिस्ताने बी तुमापो प्रेम कोल्यु, अने आमा कोअता आपाआ स्वतःहा दुखदारात हाजाकोअता परमेश्वरा आगाडीही भेट आपित बलिदान कोईत आप्लु. 3जेहलो पवित्र महुअ योग्य होय, तेहलूज तुमामे जारकर्म अने कोडनीबि प्रकारोओ अशुध्द काम किंवा लोभाश्या चर्चा बी उवूंहू नाहा, 4अने नाहा निर्लज्जता, नाहा मूढ़ता गोठी कोअल्यो, नाहा रिकामी कोअयी; काहाके का याआ गोठी होबा आपित नाहा, नहाते धन्यवादच होमल्यु जाइअलो. 5काहाके काआ तुमु जाआत्ले कोडु जारकर्मी किंवा अशुध्द जोओ, किंवा लोभी माहांआ, जे मूर्ती पुजिलो आरी होय ख्रिस्त अने परमेश्वरोओ राज्यामेहे वारसा नाहा. 6कोडु तुमामे व्यर्थ गोठीही धोका आपुहू कायना को इयाच कामाआ कारनोवाही परमेश्वरोओ राग आज्ञा न पाडणारापो खाकार होय 7याकोअता तुमु तियाआ सहभागी ओवुहू नाहा.

ज्योति मेहे साला

8काहाके का तुमु ताहा पहीले आंदाराम ओते परंतु ओमे प्रभू माय प्रकाश असो शेवट उजवाडामे संतानाआ एकहरको साला 9काहाके का उजवाडामे फोल आखे प्रकारोओ हाजो, अने धार्मिकता अने खोरो होय, 10अने ओ पारखिल्यु का प्रभूहु की गोमतो. 11आधाराआ निष्फळ कामोमे सहभागी न ओवो नहाते तियापो प्रतिकार को. 12काहाके का गुप्त का माहा चर्चा बी लाज गोठी होय. 13पोन जेतेहे का मापो प्रतिकार आप्यू जात्लू, ते आखे उजवोडावाही प्रकट ओये काहाके का जो आखे कोडोबी प्रकट कोअत्लू, तो प्रकाश होय. 14आव कारनोवाही तो कोत्लू, “ऐ, हुवानारा जागू अने मोल्यामेहे रोते जिवंतु व्हा, म्हणजे ख्रिस्ताआ प्रकाश तापो चमकीनारा.”

बुद्धि मेहे साला

15याकोता लक्ष्य आपित देखू का केहली चाल सालतेहे अज्ञाना समान एकहरको नाहा पण बुद्धीमानापो रोते एकहरको चाल्यो. 16टाईमोहो मोल्यावान सोमजा काहाके दीही वाईट होय. 17आव कारनोवाही निर्बुद्धी न होय पोन लक्ष्य आपित समजीलो का प्रभूऊ इच्छा नाहाकोत होय 18द्राक्षरसावाही मस्त ओवा नाहा काहाके वांही ठग पण ओतू पोन आत्माआ पुरोओत उवनारा जा, 19अने आपसामेहे रोटू अने स्तुतिगीत अने आत्मिक गीत गावित जा अने आपाआ मोनुमे प्रभूउ आगाडी गावित अने किर्तन कोईत रो. 20अने सदा आखे गोठीपो आमाआ प्रभू येशु ख्रिस्ताच्या नावामेहे परमेश्वर बाह्हाआ धन्यवाद कोईत रो 21ख्रिस्ताआ बिक सी एक दिहरा आधीन रो.

पति पत्निही आदेश

22ओ बुईया, तुमु तुमाआ माट्योह एहलो आधीन रो जेहलो प्रभूउ. 23माटी लाडीई बारी होय जेहलो का ख्रिस्त मंडलीही बारी होय अने खुद देहाचा उद्धारक होय. 24पोन जेहलो मंडली ख्रिस्ताच्या आधीन होय, तेहलूज पत्न्या पण हर एक गोठीमेहे आपु आपाआ माट्योह आधीन रोअलो. 25अने माट्योह, तुमु तुमाआ लाडी पोओ प्रेम को, जेहलो ख्रिस्ताने बी मंडळीवर प्रेम कोईत स्वतःहा त्याकोअता आपित आप्लु 26ऐने तियाआ वचनाआ त्यापोरत शुध्द स्थानाने हाजो कोईत पवित्र बोनाडा, 27अने तियाहा एक एहलो तेजस्वी मंडली बोणाडीत आपाआ स्वतःहा उभे को, ज्याम नाहा डाग, नाहा सुरकुती, नाहा कोडली एहली वस्तू होय अने पवित्र अने निर्दोष रोयो. 28या प्रकारे होय का माटी आपाआ-आपाआ लाडी त्यापोरोत आपाआ डीलोओ प्रेम कोईलो जो आपाआ लाडीई प्रेम कोअत्लू तो आपाआ मापो जे प्रेम कोअत्लू. 29काहाके का केधी कोडु डीलोओ द्वेष कोईत नाहा नहाते तियाआ पालीत पोषणाआ कोअत्लू जेहलो ख्रिस्त पोन मंडली आरी कोअत्लू. 30याकोअता काआमु आमाहा तियाआ देहाचे डील होय. 31“या कारनोवाही मांहु आपाआ याह्ही बाह्हाआ सोडीत आपाआ लाडीआरी मिलीत रोही, अने ते बेन एक डील होय” 32ओ भेद वोडो होय पोन आय ख्रिस्त ऐ मंडली याआ संबंधाने गोगीत होय. 33पोन तुमामे हर एक आपाआ माटी आपाआ एक सारखो प्रेम को अने लाड़ी बी आपाआ डोहाआ बिक माने.

Currently Selected:

इफिसी 5: NOINT

Highlight

Copy

Compare