1 तीमुथियुस 4

ठोगोओ उपदेश सी सावधान

1पोन आत्मा स्पष्‍टता से कोहे का आवनारा समायाआ मेहे केते मांहे भार्मनारी आत्माआ अने दुष्टत्मा हीकाडीई लाआ पोओ मोन लागाडित विश्वासा मेहेरोत बुलवात जाणारा. 2ओ तिया खोटो मांहाहा कपटामुळे उवे ज्याआ बुद्धी जेहेका पेटात्ला लोखंडा डाग आप्यू होय, 3जे वेहवाल कोइला कोअता उबारोहू अने रोटाआ किबी बिडारापो रोत अलग रोंहु आज्ञा आपी, ज्याहा परमेश्वराने यकोअता बोनाडल्ये का विश्वासआं अने सत्याहा ओलखीणारे तियाहा आभार माजित खानारो. 4काहाके परमेश्वराने बोनावली हर एक वस्तु हाजी होय अने किबी अस्वीकार योग्य नाहा पोन याकोअता का आभार माजित खाअलो आवे 5काहाके परमेश्वरोओ वचनाने अने प्रार्थने द्वारे शुद्ध ओत जालो.

मसीहाआ उत्तम सेवक

6जर पायहोहो आव गोठीई चर्चा त्यापोरोत कोयु रोनारुके, ताहा येशु ख्रिस्ताआ हाजू सेवक ठराविलो अने विश्वास अने तियाआ हाजा हिकविलो गोठीपो ते मानीत आवयू होय तीयाम ताआ पालीत पोषणाआ उवनारा रोही. 7पोन अशुद्ध अने डाया माहुहु गोठीपोरोत अलग रो अने हाजा भगत मेहनत कोईत रो. 8काहाके डीलोओ व्यायामा पासून कोम फायदा ओतू पोन भक्ती आखे गोठीपो फायदा होय काहाके आव वेलाआ अने आवनाराआ जिवनाआ बी वचन त्याजकाजे आप्लु होय. 9ओ वचन खोरो अने आखे प्रकाराने तोओनारा योग्य होय. 10काहाके आमू मेहनतो अने प्रयत्न यकोअता कोअत्लू का आमाआ आशा तियाआ जिवंत परमेश्वरोओ होय, जो आखे माअहा अने विशेष कोईत विश्वास कोआनाराआ तारण कोअनारू होय. 11आव गोठीई आज्ञा आप अने हिकाडतो रो.

सेवकाई पोओ ध्यान मिकलोओ

12कोडु ताआ जुवान्यांना तुच्छ मानु कायना पोन वचनोम अने वागीलो अने प्रेम, विश्वास अने पवित्रओ विश्वासणाऱ्यां साठी नमुना बोनावोओ रो. 13जो पर्यंत आय आवीत नाहा तोपोरोत वासिलो होय अने शिक्षण आपलो अने शिकाडेलो लक्ष्य मेका. 14ज्या वरदाना बद्दल जे तुमामे होय अने भविष्यवाणी त्यापोरत डाये आथे मेकी दे जे ताहु जोडयेहे ओते नजर कायनाहा कोहू नाहा. 15ती गोठीई विचार कोईत रो अने ती मेहे आपाआ ध्यान लागाडीत रो काहाके ताआ प्रगती आखापो प्रगट उवे. 16स्वतःआ अने स्वतःआ लेखिलो वोले लक्ष्य मेका, आव गोठीपो स्थिर रो काहाके जर एहलो कोईत रोनारुके ताहा तू आपाआ अने आपाआ होमलीनारा कोअता पोन तू तारणाआ काहाके ठराविलो.

Currently Selected:

1 तीमुथियुस 4: NOINT

Highlight

Copy

Compare