रोमियों 11

इस्राएल पेन्‍दे परमेश्वर री दया

1तेबा हाऊं बोला, कैह परमेश्वरे आपणी प्रजा छाडी दिनी? नांई कधी नांई! हाऊं भी इस्राएली साहा; अब्राहमा रे बंशा होर बिन्यामीन रे गोत्रा का साहा। 2परमेश्वरे आपणी प्रजा नांई छाडी, जोह तेऊ पहिले ही का जाणा थी कैह तमे नांई जांणदे, कि पवित्र शास्त्र एलिय्याह री कथा में कैह बोला; कि सह इस्राएला रे बिरोधा में परमेश्वरा का बिनती करा। 3हे प्रभु त्याहे तेरे भविष्यद्वक्ता वै घात करी थी होर तेरी बेदी शोटी दीनी होर हाऊं केलअ बचू होर त्याह मेरे प्राणा मारन आले साहा।

4एता पेन्‍दे दिव्या वाणी त्याका केह बोलू? माए साता हजार लोका आपु बे बचाई डाही दे साहा, जासुये बाला मूर्ति रे सामने घुटने नांई झुकी दे साहा। 5तेबा एउ साबे एउ वक्ते भी अनुग्रह संघे चुनीदे केतरे लोका साहा। 6अगर यह अनुग्रह संघे होऊ दा साहा, तेबा कर्म का नांई रऊ, नांई तअ तेबा अनुग्रह, तेबा अनुग्रह नांई रहू। 7तेबा कैह होऊ? यह की इस्राएल जासकी खोजा में, सह त्याह नांई भेटा; पर जोह चुनीदे साहा त्‍या सह भेट्टो, होर जोह बची दे, त्या कठोर करी। 8जेहड़ा लिखू दा साहा,

परमेश्वरे त्याहरे प्राण आज तक बहु बडी नीजा में पाई,

होर एडी आछी दीनी जोह ना हेरी सका

होर एडे कनेट दिने कि नांई शुणी सके।

9होर दाऊद बोला त्याह री रोटी त्याह वै जाला,

होर फन्दा होर ठोकर री बजा हुणी।

10त्याह री आछी पेन्‍दे निहारा हुणा की नांई हेरी सके,

होर तूह सदा त्याह री पीठी झुकाई ढाहे।

11तेबा हाऊं बोला कैह त्याह तेबा ठोकर खाई करे, की पडे? कधी नांई पर त्याह रे पापा पडने री बजा का अन्यजाति वै उद्धार भेटा की त्याह दोषी होए। 12अगर त्याह रे पाप संसारा में धन होर त्याह री घटी अन्यजाति वै सम्पति री बजा होई तेबा त्याह री भरपूरी में का केथरा नांई हुणा।

अन्यजाति रा उध्दार होर कलमा लाउण रा उदाहरण

13हाऊं तमा अन्यजाति वै याह गला बोला। जेवा हाऊ अन्यजाति वै प्रेरित साहा, तेबा हाऊं आपणी सेवा री बड़ाई करा, 14पर कासी रीति का हाऊं आपणे कुटुम्भी में ज़लन करी करे कासु एकी रा उद्धार करुं, 15किबेकि तेऊरा त्याग दिणा संसारा रे मेल मिलापा री बजा होई, तेबा कैह तेऊरअ ग्रहण करने रा मतलब केह हूँणा मरी करे जिंदगी रे बराबर नांई हुणा? 16जेबा भेटा री पहिली रोटी पवित्र आसा, तेबा पूरा मुछुदा पीठा भी पवित्र साहा; जेवा जड़ पवित्र होई, तेबा डाली भी पवित्र साहा।

17पर अगर एखा डाली चोड़ी थी होर तुह जंगली जैतून होई करे त्याह में फेकू, होर जैतुना री जड़ा री चिकनाई रअ भगीदार साहा। 18तेबा डाली पेन्‍दे घमण्ड नांई करे; होर अगर तुह घमण्ड करे तेबा याद डाहे तुह जड़ नांई, पर जड़ा ताह संभाला।

19तेबा ताह बोलणाा, डाली तेबा चोडी कि मेरी कलम लागे। 20ठीक साहा, त्याह अबिश्बास री बजहा का चोड़ी थी, पर तुह बुशाह में बणी रहंदा तेबा घमण्ड नांई करे, पर डर डाह; 21किबेकि परमेश्वर त्याह री डाली नांई छाडी थी तेबा तुह भी नांई छाडणा; 22तेबा परमेश्वरा री कृपा होर कड़ाई हेर, जोह पड़ी त्याह पेन्‍दे कड़ाई, पर ताह पेन्‍दे कृपा, अगर तुह तेऊमें बणी रहू, नांई तेबा तुह भी काटण। 23तेबा त्याह भी अगर अबिश्बासा में नांई रहे, तेबा त्याह किबेकी परमेश्वर त्याह भीआ का जोड़ने में सामर्थ्यी साहा दअ। 24किबेकि अगर तुह तेऊ जैतूना का जोह पहिले का जंगली साहा, काटू होर पहिले का राम्ब्डी जैतून में बणाउ, तेबा जोह या राम्ब्डी डाली साहा, त्या आपणी ही जैतूना री डाल़ी में कलम किबे ना करे।

सारे इस्त्राएला रा उद्धार

25हे भाईयो, कईं एड़ा नांई होय की तमे आपणे आपा वै बुद्धिमान समझे। तेबा हाऊं नांई चाहंदअ कि तमे एउ भेदा का अनजान रहे कि जेबरे तणी अन्यजाति पूरी तरहा नांई आई, तेबरे तणी इस्राएल एडह कठोर रहण। 26होर एडे सावै सारे इस्राएला उद्धार पाऊणा। जेहड़ा लिखुदा साहा,

छुडाउण आल़अ सिय्योना का ईहणअ

होर याकूबा एस्राएला का सारी बुराई दूर करनी;

27होर त्याह संघे मेरी यह वाचा हुणी जेवा कि महा त्याहा रे पाप माफ करने।

28सुसमाचारा री नजरा यहूदी ना हुणे री बजा का त्याहा रे दुश्मन साहा, पर चुनणे रे भावा का पूर्वजो री बजहा का परमेश्वरा रे प्यारे साहा। 29किबेकि परमेश्वर आपणे वरदाना का होर आपणे कामा का कधी भी पिछे नांई हटदअ सह तेता पेन्दे अटल रहन्दा। 30किबेकि तमे जेहड़ा परमेश्वरा री आज्ञा पहिले मना, पर परमेश्वरा री आज्ञा नांई मनने का तमा पेन्‍दे दया होई; 31तेड़ी त्याही भी आज्ञा नांई मनी थी कि तमा पेन्‍दे जोह दया हुंदा एताका त्याह पेन्‍दे भी दया होई लोडी। 32किबेकि परमेश्वरे सभी बे आज्ञा ना मनणे री बजा का बन्द करीदे आसा कि सह सभी मे दया करे।

परमेश्वर रा स्तुतिगान

33आह! परमेश्वरा रा धन होर बुद्धि होर ज्ञान कैह गम्भीर साहा! तेऊरा न्याय कैहडा अथाह, होर तेऊरे रास्ते कैहडे अगम साहा 34जेहड़ा की धर्मग्र्न्ता में बोलु दा साहा, “प्रभु रे मना कूहण जाणा? तेऊरअ सहायक कुण होऊ? 35यह तेऊवै पहिले कुणी दिना दअ साहा, जासका बदला तेऊवै देई सके?” 36किबेकि तेऊरी तरफा का होर तेऊरे साबे, होर तेऊवै ही सब किछे साहा तेऊरी महिमा सदा हुन्दी रहे। आमीन।

Currently Selected:

रोमियों 11: ISJNT

Highlight

Copy

Compare