प्रेरित 19

इफिसुस नगरा में पौलुस

1जेबा अपुल्लोस कुरिन्थुसा में थी, तेबा पौलुस उझे रे सारे प्रदेश होई करे इफिसुसा में आऊअ। तखे कुछ चेले हेरी करे 2तेऊ बोलू, केह तमा बुशाह करदे वक्ते पवित्र आत्मा आऊआ? त्याह बोलू, हाम तअ पवित्र आत्मा री चर्चा भी नांई शूणी।

3तेऊ त्याहबे बोलू, तेबा तमे कासका बपतिस्मा लऊ? त्याहे बोलू, यूहन्ना रा बपतिस्मा। 4पौलुसे बोलू, यूहन्ना तअ यह बोली करे मन फिराव रा बपतिस्मा दीना कि जोह माह बाद इंहणे आलअ साहा, तेऊ पैंदे मतलब यीशु पैंदे बुशाह करे। 5यह शूणी त्याह परमेश्वरे यीशु रे ना पैंदे बपतिस्मा लऊ। 6जेबा पौलुसे त्याह पैंदे हाथ डाहू, तेबा पवित्र आत्मा त्याह पैंदे ऊतरु होर त्याह होरी-होरी भाषा में गला करदे लागे होर भविष्यवाणी करदे लागे। 7याहा सब लगभग बारह मणश थी।

8सह प्रार्थना घरा में नांही करे चीई महीने तणी निडर होई करे बोलदअ रहू होर परमेश्वरा रे राज्य रे बारे में बिबादा करदअ होर समझाऊंदअ रहु। 9पर कुछ लोक तेऊरी गलआ नांई मानी पर लोका सेटा एऊ पन्था बुरे बोलदे लागे तेबा तेऊ त्याह छाडी होर चेले अलग करी होर रोज तुरन्नुस री स्कूला में बाद-बिबाद करदा रंहदा। 10दुई साला तणी यह हुंदा रहू, अखे तणी कि आसिया में रंहण आले कह यहूदी कह यूनानी सभीऐ परमेश्वरे रअ बचन शूणी।

11परमेश्वर पौलुसा रे हाथा कअ सामर्थ्य रे नोखे काम रीहांऊदा थी। 12अखे तणी कि रुमाल होर अंगोछे तेऊरे शरीरा का छुही करे बीमारी पैंदे डांहदा थी, होर त्याह री बीमारी ठीक हुंदा, होर दुष्टात्मा त्याह का निख्ला थी।

13पर कुछ यहूदी झाड़ फूंक करदे रंहदा थी। यह करदे लागे कि जासू में दुष्टात्मा हुंदा, त्याह पैंदे परमेश्वर यीशु रा ना यह बोली करे फूंकर, जासू यीशु रा प्रचार पौलुस करदा, हांऊ तेऊरी शपथ लंऊदा। 14होर स्क्किवा ना रे एकी यहूदी प्रधान याजका रे सात शोहरू थी, जोह एह्ड़ा करदा थी। 15पर दुष्टात्मा त्याहबे उतर दीना, यीशु हांऊ जाणदा होर पौलुसा पछेणदा, पर तुह कूण साहा? 16होर सह मणश जासू में दुष्टात्मा थी, त्याह पैंदे लपकू होर प्रचण्ड होई करे होर काबू मे आणी करे, त्याह पैंदे एडहा उपद्रव करू कि त्याह नेगे होई करे होर घायल होइ करे घरा का निकते। 17यह गलअ इफिसुसा में सभी रंहण आले यहूदी होर यूनानी भी जाणी। होर त्याह सभे डरी; होर परमेश्वर यीशु रे ना री बडाई होई। 18जासू बुशाह करू त्याह में बहूऐ इच्छी करे काम मानी होर प्रगट करी। 19जादू-टोना करण आले बहू लोके आपणी पोथी सभी लोका रे सामने जाली होर जेबा त्याहरा दाम जोह, तेबा त्याह पजाह हज़ार चांदी रे सिक्क बराबर थी। 20एडी तरह परमेश्वरा रा बचन प्रचण्ड रुपा में फैलदा होर बढ़दा रहू।

21जेबा या गला होई छेकि, तेबा पौलुसा री आत्मा ठानू की मकिदुनिया होर अखया होई करे यरूशलेमा बे नांहणा होर बोलू, तखे नांही करे माह रोम भी जरुर भालना। 22तेबा आपणी सेवा करन आले में तिमोथी होर इरास्तुस मकिदुनिया भेजी आपु कुछ धयाड आसिया मे रहू।

इफिसुसा में उपद्रव

23तेऊ वक्ते तेऊ पन्था रे बारे में बडा हुल्लड होऊ। 24किबेकी दिमेत्रियुस ना रअ एक सुनार अरतिमिस रे चांदी री मुरत रे मन्दिर बणाई करे करिगरा बे बहू काम दिंदा। 25तेऊ त्याह होर एडी ही चीजा रे कारीगर कठे करी होर बोलू, हे मणशो तमे जाणदा कि एऊ कामा का हामा केतरा धन भेटदा। 26तमे हेरदा होर शूणदा कि कबल इफिसुसा में नांई, पर सारे आसिया में यह बोली करे, एऊ पौलुसे बहू लोका समझाई होर भरमाई दे साहा। कि जोह हाथा री कारीगरी साहा त्याह इश्वर नांई। 27एताका तेबा ऐसा गला री डरअ नांई आंहदी कि हमारे एऊ धंधे में एबा प्रतिष्ठा नांहदी रंहणी, बल्कि यह महान देवी अरतिमिस रअ मंदिरे भी तुच्छ समझणअ होर जासू आसिया होर संसार पूजा तेसका महत्व भी खत्म हूंणा।

28त्याह यह शूणी गुस्सा आऊआ होर ज़ोरे-ज़ोरे बोलदे लागे, इफिसिया री अरतिमिस महान साहा! 29होर सारे नगरा में कोलाहल मचु लोके मकिदुनिया बासी गयुस होर अरिस्तर्खुस जोह पौलुसा रे संघे यात्री थी, ढाकी होर नाटक घरा में ठूरी। 30जेबा पौलुस भीतर लोका सेटा नांहणा चांहदा, तेबा चेले सह रोकू। 31आसिया रे जजा मेंज़ा का तेऊरे कई दोस्त भेजी करे बिनती करी की नाटक घरा में नांही करे ज़ोखिम नांई ऊठाए। 32तखे लोका एखा जोर-जोर बोलदे लागे थी, होर एखा हाले पाउदे लागे थी, किबेकी सभी में बड़ी गडबडी लागी दी हुन्दी थी, होर कई लोका यह भी नांई जांणदे थी, कि हामे कठे किबे होई दे आसा।

33तेबा त्याह सिकंदर, जूंण यहूदियों खडअ करू, भिड़ा में जेह करू, सिकंदरे हाथे संघे इशारा करी करे उतर दीणा चांहदा। 34पर जेबा त्याह जाणू कि यह यहूदी साहा, तेबा सभे कि शब्दा में कोई दुई घंटे चिलाऊँदे रही, इफिसिया री अरतिमिस महान साहा। 35तेबा नगरा रे मत्री लोका शांत करणे बे बोलू, हे इकियुसा रे लोको कुण नांई जाणदअ कि इफिसिया रा नगर महान दवी अरतिमिस रे मन्दिर होर सरगा पड़ी दी मूर्ति रा रखबाला साहा। 36अतः जेबा याह गला रा खंडन नांई होई सकदा, तेबा उचित साहा कि तमे शांत रहा। होर बीना सोचे न्याय कुछ नांई करे। 37किबेकी तमे याहा मणश आणी दे जोह ना मन्दिरा लुटण आले होर ना माहरी देवी रे निंदा करण आले साहा।

38जेबा दिमेत्रियुस होर तेऊरे संगी कारीगरे कासु का भी बिबाद साहा तेबा कचहरी खुली साहा होर जज भी साहा, त्याह एकी दूजे पैंदे आरोप लाए । 39पर तमा जेबा कासु होरी विषय में पूछणा चांहदा तेबा नियत सभा में न्याय में हूंणा। 40किबेकी आजके बलबे री बजहा का हामा पैंदे दोष लाऊंणे री डर साहा, जेबा कि एतका कोई बेजा नांई आंहदा। होर हामे ऐसा भिड़ा कठे हूणे रा कोई उतर भी नांई देई सकदे। 41यह बोली करे तेऊ सभा बिदा करी।

Currently Selected:

प्रेरित 19: ISJNT

Highlight

Copy

Compare