प्रेरित 16

पौलुसा रा तीमुथियुस संघे आणनअ

1तेबा सह दिरबे होर लुस्त्रा में भी नाठअ। तखे तिमोथी ना रअ एक चेलअ, जोह कासु बुशाही यहूदिनी रअ शोहरू थी, पर तेऊरअ बापू यूनानी थी। 2सह लुस्त्रा होर इकुनियुमा रे भाई में सुनाम थी। 3पौलुसा री इच्छा, कि सह तेऊ संघे हांडे ; होर जोह यहूदी लोका त्याह जागा में, त्या बेजा तेऊ त्याह रा खतना करू, किबेकी त्याह सभे जाणदा थी, कि त्या रअ बापू यूनानी थी। 4होर नागरे -नागरे नांही करे त्याह-त्याह न्याय जोह यरूशलेमा रे प्रेरिते होर बजुर्गे ठहराई दे थी, मानणे री तणी त्याह पजेरदे रही। 5एडी तरह कलीसिया बुशाहा में पाकी हुन्दी रही होर संख्या में रोज बढ़दी रही।

त्रोसाहा में पौलुसा रा दर्शन

6त्याह फ्रुगिया होर गलातिया प्रदेशा मेंज़ा का होई करे नाठे, किबेकी पवित्र आत्मा त्याहबे आसिया में बचन शूणाऊने बे मना करू। 7त्याह मुसिया में पूजी करे, बितूनिया में नांहणा चाहू; पर यीशु री आत्मा त्याह नांहणे नांई दीना। 8अतः त्याह मुसिया का होई करे त्रोआसा में आए। 9तखे पौलुसे राची एक दर्शन हेरू, कि एक मकिदुनी मणश खडअ होऊ होर तेऊका बिनती करी करे बोलदअ लागअ, पार उतरी करे मकिदुनिया में इछा होर माह री मदद करे। 10तेऊरे यह दर्शन हेरी करे हामे तभरी मकिदुनिया बे नांहणा चाहू, यह समझिकरे कि परमेश्वरे हामे त्याबे सुसमाचारा शूणाऊंणे री तणी शदाई।

फिलिप्पी में लुदिया रा हृदय-परिबर्तन

11तेबा त्रोआसा का जहाज खोलिकर हामे सीधे समुथराके रे होर दूजे धयाडे नियापुलिसा में आए। 12तखा का हामे फिलिप्पी पूजे, जोह मकिदुनिया प्रांता रअ मुख्य नगर होर रोमियों री बस्ती साहा; होर हामे तेऊ नगरा में कुछ धयाडी तणी रही। 13सब्ता री धयाडी हामे नगरा रे गेटा बागे किनारे यह समझी करे नाठे कि तखे प्रार्थना करने री जागह हूंणी, होर बेशी करे त्याह वेटडी संघे जोह कठे होई दी, गला करदे लागे।

14लुदिया ना री थुआतीरा नगरा री बैंजनी झिखडे बेचण आली एक भक्त वेटडी पूजा, करदी लागीदी थी। परमेश्वरे त्याह रा मन खोलू कि त्याह पौलुसा री गला में ध्यान लाए। 15जेबा तेऊ आपणे घराने समेत बपतिस्मा लऊ, तेबा तेऊ हामा कअ बिनती करी, जेबा तमे माह प्रभु री बुशाह करन आली समझदा, तेबा मेरे घरे रहा, होर तेसा हामे मनाई करे होर तेबा हामे तखे रहणे रा बिचार करु।

दुष्ट आत्मा का छुटकारा

16जेबा हामे प्रार्थना करण री जागह बे नांहदे, लागदे थी, तेबा हामा एक दासी भेटी जासू में भविष्यवाणी करण आली दुष्टात्मा थी, होर भविष्यवाणी करणे आली आत्मा आपणे मालका का बहू कुछ कमाई आणा थी। 17सह पौलुस होर हामा पीछे इच्छी करे ज़ोरे-ज़ोरे बोलदी लागी, याह मणश महान परमप्रधान परमेश्वर रे नोकर साह, जोह हामा बे उद्धारा री बाता री कथा शूणाऊंदा। 18सह बहू धयाडे तणी एडहा ही करदी रही; पर पौलुस दुखी होऊ, होर मुडी करे तेसा दुष्टात्मा का बोलू, हाँऊ ताहबे यीशु मसीह रे ना का आज्ञा दिंदा कि ऐसा मेंज़ा का निखल। होर सह तेभरी निखती।

19जेबा तेसके मालके हेरू कि मेरी कमाई री आशा नांहदी लागी, तेबा पौलुस होर सीलास डाहकी करे चौका में प्रधाना सेटा खींची करे आणी; 20होर त्याह दण्डाधिकारी सेटा नी होर बोलू, याहा लोक जोह यहूदी साहा, माहरे नगरे हलचल मचाऊंदे लागेदे; 21होर एडी रीति खोजदअ लागअ, जोह ग्रहण करना होर मानना हामा रोमीयों बे कानूना रे साबे ठीक नांई आंहदा। 22तेबा भीडा रे लोका त्याहरे खिलाफ होई कठे होई करे त्याह पैंदे चहडी, होर न्यायधीश त्याह रे झिकड़े चिरी करे ऊतारी, होर त्याह चिकणे री आज्ञा दीनी। 23बहू चिक्की करे त्याह जेला में डाही होर दरोगे बे आज्ञा दीनी कि याह रा ध्यान डाहे। 24तेऊ एडी आज्ञा पाईकरे त्याह जेले भितरा री कोठरी में डाही होर त्याह री टांगा काठे संघे बान्ही।

पौलुस होर सीलासा री जेला का मुक्ति

25आधी राची पौलुस होर सीलास प्रार्थना करदे होर परमेश्वरा रे भजना गाऊंदे, लागेदे थी, होर कैदी त्याह हेरी शूणदे लागदे थी। 26एतरे में एकदम जाजरी होई, अखे तणी कि जेला रअ पाथर भी हिलू, होर तेभरी सारे दुआर खुली; होर सभे बंधन खुली। 27दरोग ऊठू, होर जेला रे दुआर खुले भाली समझू कि कैदी ठुरी, अतः तेऊ तलबार खींची करे आपणे आपा बे मरणा चाहू। 28पर पौलुसे ज़ोरे करे बोलू, आपणे आपा बे हानि नांई पंहूचाऐ, किबेकी हामे सभे अखी साहा। 29तेबा तेऊ सजीअ मांगू होर भितरा बे नाठअ, होर कामदे -कामदे पौलुसा होर सीलासा सेटा पडू; 30होर त्याह बाग आणी करे बालू, हे मालको, उद्धारा पाऊंणे री तणी हांऊ केह करू? 31त्याहये बोलू, परमेश्वर यीशु मसीहा पैंदे बुशाह कर, तेबा ताह होर तेरे घराने उद्धार पाऊंणा। 32होर त्याहे होर तेऊरे सारे घरा आले बे परमेश्वर रा बचन शूणाऊ। 33राची तेऊ वकते तेऊ त्याहा नी होर त्याहरे घाब धोई, होर तेऊ आपणे सभी लोका संघे तेभरी बपतिस्मा लाऊ। 34तेबा तेऊ त्याह आपणे घरा बे नी करे त्याह सामने खांणा डाहू, होर सारे घराने समेत परमेश्वरा पैंदे बुशाह करी करे आनंद करू। 35जेबा धयाडी होई तेबा न्यायधीश सिपाही भेजी करे यह बोलू कि त्याह मणश छाडा। 36दरोगअ या गला पौलुसा का बोली, न्यायधीश तमा छाडन री आज्ञा भेजी दी साहा। तेबा अखा का निखली करे शांति संघे नांहा।

37पर पौलुसे त्याह का बोलू, त्याह हामे जोह रोमी मणश साहा, दोषी ठहराई बिना लोका सामने चिकी होर जेला में डाही। एबा केह हामा चुप-चाप काहडने लाई? एडहा नांई; तेबा त्याह आपे इच्छी करे हामा बागे काहडे। 38सिपाही या गला न्यायधीशा बे बोली, होर त्या यह शूणीकरे कि रोमी साहा, डरी, 39होर इच्छी करे त्याह मनीयाई, होर बागे नी करे बिनती करी कि त्याह नगरा का नाह।

40त्याह जेला का निखली करे लुदिया रे घरा बे नाठे, होर भाई का मिली करे त्याहबे शांति दीनी, होर तखा का नाठे।

Currently Selected:

प्रेरित 16: ISJNT

Highlight

Copy

Compare