પ્રકટીકરણ 7

ઇસ્રાએલુ એક લાખ ચુમ્માલીસ હજાર લોક

1તીયા બાદ માને તોરતી, ચારુ ખુણાપે ચાર હોરગા દુત દેખાયા, તીયાહા ચારુ ખુણા બાજુમેને હવાલે રોકી દેદી, કા તોરતી, કા સમુદ્ર, કા એગા ચાળવાપે હવા નાય ચાલે. 2ફાચે માને એક હોરગા દુત દિહ ઉગુલો દિશામેને આવતો દેખાયો, તીયાપે જીવતા પરમેહેરુ મોહર આથી, તીયાહા તીયા ચાર હોરગા દુતુહુને જીયાહાને તોરતીપે આને સમુદ્રમે નુકશાન કેરા અધિકાર આપલો, મોડા આવાજુકી બોમબ્લીને આખ્યો, 3“જાંવ લોગુ આમુહુ આપુ પરમેહેરુ સેવકુ મુનકાપે મોહર નાય લાગવી દેજી, તાંમ લોગુ તોરતીપે આને સમુદ્રલે આને ચાળવાહાને નુકશાન માઅ કીહા.”

4જાંહા હોરગા દુતુહુ મોહરુકી નિશાણી લાગવુલો પુરો કી લેદો, તાંહા એગાહા માને આખ્યો કા તે લોક જીયાં આરી મુનકાપે હોરગા દુતુહુ પરમેહેરુ મોહરુ નિશાણી લાગવીહી તીયાં સંખ્યા એક લાખ ચુમ્માલીસ હજાર હાય. એ લોક ઇસ્રાએલુ બારા પીઢીમેને હાય. 5દરેક કુટુંબામેને બારા હજાર લોકુહુને લાગવામે આલી, યહુદા કુટુંબામેને બારા હજાર મોહર લાગવામે આલી, રુબેનુ કુટુંબામેને બારા હજાર, ગાદુ કુટુંબામેને બારા હાજારુપે, 6અશેરુ કુટુંબામેને બારા હજારુપે, નપ્તાલી કુટુંબામેને બારા હજારુપે, મનાશ્શે કુટુંબામેને બારા હજારુપે, 7શિમોનુ કુટુંબામેને બારા હજારુપે, લેવી કુટુંબામેને બારા હજારુપે, ઇસ્સાકારુ કુટુંબામેને બારા હજારુપે, 8ઝબલુનુ કુટુંબામેને બારા હજારુપે, આને યુસુફુ કુટુંબામેને બારા હજારુપે, આને બિન્યામીનુ કુટુંબામેને બારા હજારુપે મોહર લાગવામે આલી.

લોકુ એક મોડી ગોરદી

9ઈયા બાદ માયુહુ હેયો, કા લોકુ એક ઓતો મોડો ટોલો આથો, કા તીયાહાને કેડો બી ગોંય નાય સેક્તલો, તે દુનિયા બાદી જાતિ, કુટુંબા, દેશુ, આને બાદી ભાષા ગોગનારામેને આથા. તે પાંડે પોતળે પોવીને આને આથુમે ખજુરુ ડાલખ્યા લીને રાજગાદી હુંબુર આને ઘેટા હુંબુર ઉબલા આથા. 10આને મોડા આવાજુકી બોમબ્લીને આખતલા, “આપુ પરમેહેરુ સ્તુતિ વેઅ જો રાજગાદીપે બોઠલો હાય, આને ઘેટા એટલે ઇસુ ખ્રિસ્તુ જય-જયકાર કેરા, ખાલી તુજ હાય જો ઉદ્ધાર આપોહો.” 11બાદા હોરગા દુતુહુ તીયા રાજગાદી આને વડીલુ આને ચાર જાનવરુ ચારુવેલે ઉબલો આથો, તે બાદે સિહાસનુ હુંબુર નોમ્યે આને ઇ આખીને પરમેહેરુ આરાધના કેયી, 12“આમીન. આપુ પરમેહેરુ સ્તુતિ, મહિમા, જ્ઞાન, ધન્યવાદ, આદર, સામર્થ, આને શક્તિ સાદા માટે બોની રેઅ. આમીન.” 13તાંહા ચોવીશ વડીલુમેને એકાહા માને ફુચ્યો, “કાય તુ જાંહો કા ઇ પાંડે પોતળે પોવલે કેડે હાય? આને કાહીને આલેહે?” 14તાંહા માયુહુ તીયાલે જવાબ આપ્યો, “ઓ માલિક આંય નાહ જાંતો, પેન તુ જાંહો.” ફાચે તીયાહા માને આખ્યો, “એ પાંડે પોતળે પોવનારા લોક તે હાય, જે મોડા સતાવ વેઠીને આલાહા, ઇયાહા પોતા પોતળે ઘેટા રોગુતુમે તુવીને સાફ કેયેહે.”

15ઈયા ખાતુરે તે પરમેહેરુ રાજગાદી હુંબુર ઉબલે હાય, આને તે રાત દિહ પરમેહેરુ પવિત્રસ્થાનુમે તીયા સેવા કેતાહા, આને જે રાજગાદીપે બોઠલો હાય, તોઅ તીયા વોચ્ચે રીને તીયાહાને સાંબાલી. 16તે આમી કીદીહીજ પુખે આને ફાંપ્યે નાય વેરી, આને નાય તીયાપે તોપ પોળી, આને નાય તીયાહાને ગરમી વેરી, 17કાહાકા ઘેટા એટલે ઇસુ ખ્રિસ્ત જો રાજગાદીપે વોચ્ચે હાય, તોઅ તીયાં રાખવાલી કેરી, આને તીયાહાને જીવન રુપી પાંયુ ઝરામેને પાંય પાજી, આને પરમેહેર તીયાં ડોંઆ બાદે રોજે નુસી ટાકી.

Currently Selected:

પ્રકટીકરણ 7: DUBNT

Highlight

Copy

Compare