ફિલિપ્પીઓ પત્રો 1

આદર

1ઓ પત્ર પાઉલ આને તિમોથી વેલેને હાય, જે ઇસુ ખ્રિસ્તુ સેવક હાય. ઇ ઇસુ ખ્રિસ્તુ તીયા પવિત્ર લોકુ, આગેવાનુ આને સેવકું માટે બી હાય જે ફિલિપ્પી શેહેરુમે રેતાહા. 2આપુ પિતા પરમેહેરુ આને પ્રભુ ઇસુ ખ્રિસ્તુ વેલેને તુમનેહે કૃપા આને શાંતિ મિલતી રેઅ.

પાઉલુ પ્રાર્થના આને ધન્યવાદ

3આંય જાંહા-જાંહા તુમનેહે યાદ કીહુ, તાંહા-તાંહા પોતા પરમેહેરુ ધન્યવાદ કીહુ, 4આને જાંહા બી આંય તુમા બાદા માટે પ્રાર્થના કીહુ, તા સાદા ખુશીકી પ્રાર્થના કીહુ. 5ઈયા ખાતુરે કા તુમુહુ જીયા દીહુલને ઇસુ ખ્રિસ્તુ વિશે હારી સુવાર્તાપે વિશ્વાસ કેયોહો, તાંહાને લીને આજ હુદી, તીયા હારી સુવાર્તાલે ફેલાવા માટે માઅ ભાગીદાર રીયાહા. 6માને ઈયુ ગોઠીપે વિશ્વાસ હાય કા પરમેહેરુહુ તુમામે હારો કામ શુરુ કેયોહો, તોજ તીયાલે ઇસુ ખ્રિસ્તુ આવુલો દિહુલે હુદી પુરો કેરી. 7તુમા બાદા વિશે માઅ ઓ વિચાર યોગ્યો હાય, કાહાકા આંય તુમા બાદા આરી પ્રેમ રાખુહુ. કાહાકા આંય જેલુમે આથો તાંહા બી તુમુહુ હારી સુવાર્તા રાખવાલી કેરામે આને તીયુલે સાબિત કેરામે તુમુહુ બાદા માઅ આરી પરમેહેરુ કૃપામે ભાગીદાર હાય. 8ઇયામે પરમેહેર માઅ સાક્ષી હાય, કા આંય ઇસુ ખ્રિસ્તુ સમાન પ્રેમ કીને તુમનેહે બાદાહાને મીલા ઈચ્છા રાખુહુ. 9આંય એ પ્રાર્થના કીહુ કા એક-બીજા માટે તુમા પ્રેમ, જ્ઞાન આને બાદા પ્રકારુ હોમુજુ આરી આજી બી વાદતો જાય. 10કા તુમુહુ બાદા કેતા હારી ગોઠીહીને ઓખી સેકા, આને ઇસુ ખ્રિસ્તુ ફાચે આવુલો સમયુહી હુદી નિર્દોષ આને પવિત્ર રેજા આને ઠોકર નાય ખાય સેકા. 11પેન પરમેહેરુ મહિમા આને પ્રસંશા માટે તીયા ધર્મી કામુકી ભરપુર વેતા જાઅ, જો ઇસુ ખ્રિસ્તુ મારફતેજ ઉત્પન્ન વેહે. આને પરમેહેરુ સ્તુતિ આને મહિમા વેતી રીઅ.

પાઉલુ જેલ જાવુલી કી સુવાર્તામે વાદારો

12ઓ પાવુહુ, આંય ઈચ્છા રાખુહુ કા તુમુહુ ઇ જાંયલ્યા કા માઅ આરી જે ઘટના વેયીહી તીયાકી હારી સુવાર્તાજ વાદારો વેયોહો, 13ઇહી લોગુ કા મોડા રાજા રાજમેહેલુ સૈનિકુ બાદી ટુકળી આને બાકી બાદા લોકુહુને ઇ માલુમ વી ગીયોહો, કા આંય ઇસુ ખ્રિસ્તુ સેવા કેરા લીદેજ જેલુમે હાય. 14આને પ્રભુમે જે વિશ્વાસી પાવુહુ હાય, તીયામેને ખુબુજ માને જેલુમે જાંઅ લીદે વિશ્વાસ રાખીને પરમેહેરુ વચન બહાદુર વીને ઉનાવા ખાતુરે હિંમત કેતેહે. 15કાયક લોક તા જલનુ કી આને ઝગળા લીદે ખ્રિસ્તુ હારી સુવાર્તા પ્રચાર કેતાહા, પેન કાયક લોક હારા ઈરાદાકી પ્રચાર કેતાહા. 16કાયક લોક જે હારા ઈરાદાકી પ્રચાર કેતાહા, તે લોક માઅ આરી પ્રેમ રાખુલો લીદે કેતાહા કાહાકા તે જાંતાહા કા આંય હારી સુવાર્તા રક્ષણુ ખાતુરે જેલુમે બંદ હાય. 17પેન કાયક ખારાબ ઈરાદાકી ઇ વિચારીને પ્રચાર ઇસુ ખ્રિસ્તુ પ્રચાર કેતેહે, કા એહેકી કેરા કી પાઉલુલે જેલુમે વાદારે તકલીફ વેરી. 18કાયજ તકલીફ નાહ, દરેક પ્રકારુકી નેતા ખારાબ ઈરાદાકી નેતા હારા ઈરાદાકી ખ્રિસ્તુ હારી સુવાર્તા પ્રચાર કેરામે આવેહે, ઈયા ખાતુરે આંય ઇયાકી ખુશ હાય આને ખુશ બી રેહે.

જીવતો રેવુલો ખ્રિસ્ત હાય

19કાહાકા આંય જાંહુ તુમા પ્રાર્થના મારફતે આને ઇસુ ખ્રિસ્તુ મોક્લુલી પવિત્રઆત્મા મદદુ મારફતે, તીયા પ્રતિફલ જેલુમે માઅ ઉદ્ધાર પામુલો વેરી.

20માઅ ખુબુજ ઈચ્છા આને આશા એ હાય, કા આંય કેલ્લીજ ગોઠીમે નાય નાજ્વાવુ, પેન મામે ઇસુ ખ્રિસ્તુમે ગોગુલી હિમત રેઅ, જેહેકી કા ફાચલા દિહુમે કેલો. કાદાચ આંય જીવતો રીવ્યુ કા મોય જાંવુ આંય માઅ પુરા જીવનુકી ઇસુ ખ્રિસ્તુ સન્માન કેતો રેહે. 21કાહાકા આંય જીવતો રેહે તા ઇસુ ખ્રિસ્તુ માટે જીવતો રેહે, આને મોય જાહે તા માઅ માટે લાભ વેરી. 22પેન કાદાચ શરીરુ જીવતો રીવ્યુ તા ઇસુ ખ્રિસ્તુ માટે લાભદાયક કામ કી સેકેહે, ઈયા ખાતુરે આંય નાહ હોમજી સેકતો કા કાય પસંદ કિવ્યુ. 23કાહાકા આંય બેનું વોચ્ચે લોટકી રીયોહો, મન તા કેહે કા શરીરુમે મોયને ઇસુ ખ્રિસ્તુ પાહી જાયને રીવ્યુ, કાહાકા ઇ ખુબુજ હારો હાય. 24પેન તુમા મદદ કેરા ખાતુરે માને શરીરુમે જીવતો રેવુલો વાદારે જરુરી હાય. 25આને માને ઈયા ભરોષો હાય, ઈયા ખાતુરે આંય જીવતો રેહે આને તુમા બાદા આરી રીને તુમનેહે વિશ્વાસુમે મજબુત વેરા આને તીયામે ખુશ રાંઅ ખાતુરે મદદ કેહે. 26કા જાંહા આંય ફાચે તુમા આરી રેહે, તાંહા તુમુહુ માંઅ લીદે ખ્રિસ્ત ઇસુ વિશે આજી બી વાદારે ઘમંડ કી સેકાહા.

27ખાલી ઓતોજ કેરા કી તુમા ચાલ-ચલન ખ્રિસ્તુ સુવાર્તા યોગ્યો રેઅ, કા કાદાચ આંય આવીને તુમનેહે હીવ્યુ, કા નાય બી આવુ, તુમા વિશે ઇ ઉનાવુ કા તુમુહુ એક મન આને એક ધ્યાન વીને હારી સુવાર્તા વિશ્વાસુ ખાતુરે મેહનેત કેતા રેતાહા. 28આને કેલ્લી બી ગોઠીમે વિરોધ કેનારાહાને બીતા નાહ. એ તુમા હિંમત તીયાં માટે નાશુ ચોખ્ખી નિશાણી હાય, પેન તુમા માટે ઇ પરમેહેરુ વેલેને ઉદ્ધારુ નિશાણી હાય. 29કાહાકા ઇસુ ખ્રિસ્તુ લીદે તુમાપે કૃપા વીયી કા તુમુહુ નાય ખાલી તીયાપે વિશ્વાસ કેરા પેન તીયા માટે દુઃખ બી ઉઠાવા. 30આને તુમનેહે તેહેકીજ દુઃખ વેઠુલો હાય જેહેકી તુમુહુ માને ફિલિપી શેહેરુમે દુઃખ સહન કેતા હેયોહો, આને આમી બી તુમુહુ ઉનાતાહા કા તેહેડોજ દુઃખ સહન કી રીયોહો.

Currently Selected:

ફિલિપ્પીઓ પત્રો 1: DUBNT

Highlight

Copy

Compare