હિબ્રૂઓને પત્રો 10

ખેરો બલિદાન

1કાહાકા મુસા નિયમ જો આપવામે આલો, તોઅ આવનારી ઈચ્છા વસ્તુ નમુનો હાય પેન તે આસલી નાહ. ઈયા ખાતુરે દરેક વોર્ષે જો બલિદાન કેરામે આવેહે, તીયા મારફતે આરાધના કેરા માટે આવનારાહાને બી કીદીહીજ બી સિદ્ધ નાહ કી સેકતા જે પરમેહેરુ આરાધના કેરા માટે તીયા પાહી આવતેહે. 2કાદાચ મુસા નિયમ તીયાહાને સિદ્ધ બોનાવી દેહે, તા બલિદાન કેરા બંદ વી જાતો. આને કાદાચ આરાધના કેનારો ખરેખર માફ વી જાતો, તા એક વાર પાપુ માફી બાદ ફાચે તીયાહાને ઇ નાહ લાગતો કા આમુહુ પાપી હાય. 3પેન તે દરેક વોર્ષે બલિદાન કેતલા, તીયાકી તીયાહાને ઇ લાગેહે કા તે આમી લોગુ પાપુમે હાય. 4પેન બલિદાન કેલા ડોગરા આને બોકળા રોગુત પાપુ માફી નાહ આપી સેકતો.

5તીયા લીદેજ ઇસુ ખ્રિસ્ત જગતુમે આલો તાંહા તીયાહા પરમેહેરુલે આખ્યો, “તુ નાહ ઈચ્છતો કા લોક તોઅ માટે અર્પણ આને ચોળવે, પેન તુયુહુ માને બલિદાન કેરા માટે માંહુ બોનાવ્યો.” 6“પાપુ માટે બલિદાન કેરા આને હવન કેરુલોકી તુ પ્રસન્ન નાહ વીયો.” 7તાંહા ઇસુહુ પરમેહેરુલે આખ્યો, “ઓ પરમેહેર, પવિત્રશાસ્ત્રમે માઅ વિશે લેખલો હાય, તીયા અનુસાર તોઅ ઈચ્છા પુરી કેરા ખાતુરે હેઅ આંય આલોહો.” 8“ઉપર્યો વચનુમે તા ઇસુ ખ્રિસ્તુહુ આખેહે કા બલિદાન, આને ભેટ, પાપુ માટે બલિદાન કેરુલોકી તુ પ્રસન્ન નાહ વેતો,” તેબી બલિદાન તા મુસા નિયમુ અનુસાર ચોળવામે આવેહે. 9આને ફાચે બી આખતાહા, “હેઅ ઓ પરમેહેર તોઅ ઈચ્છા પુરી કેરા માટે આંય આવી ગીયોહો, બલિદાન કેરુલો પેલ્લો નિયમ પરમેહેર હોરકાવી દેહે, કા તોઅ બીજો નવો નિયમ બોનાવે.” 10તીયુજ ઈચ્છાકી આપુહુ ઇસુ ખ્રિસ્તુ શરીરુ એકુજવાર બલિદાન વ કેરા ખાતુરે પવિત્ર કેરામે આલો.

11દરેક યાજક વેદી હુંબુર દરેક દિહ સેવા કેહે, આને એકુજ પ્રકારુ બલિદાન વારંવાર કેહે, જીયા બલિદાનુકી કીદીહીજ પાપુ માફી નાહ મીલી સેકતી. 12પેન ઇસુ ખ્રિસ્તુહુ પાપુ માફી માટે ખાલી એકુજ વારી પોતા શરીર દાનુ રુપુમે બલિદાન કીને, પરમેહેરુ હુદીવેલે જાયને બોહી ગીયો. 13તીયાજ સમયુલે ઇસુ ખ્રિસ્ત તીયા વાટ જોવા લાગ્યો કા પરમેહેર કેહેડી વેલે તીયા દુશ્મનુહુને હારવીને તીયા આથુમે હોપી દી. 14કાહાકા તીયાહા પોતાલે એકુજ વખત બલિદાન કીને તીયા લોકુહુને સાદા માટે સિદ્ધ બોનાવી દેદા, જીયાહાને તે પવિત્ર કેહે. 15આને પવિત્રઆત્મા બી આપનેહે એજ સાક્ષી આપેહે કા ઇ હાચો હાય, કાહાકા તીયાહા પેલ્લા આખલો, 16પ્રભુ આખેહે જો વાયદો આંય આવનારા દિહુમે પોતા લોકુ આરી કેહે તે એ હાય, કા આંય માઅ નિયમ તીયા રદયુમે લેખેહે, આને તે સાદા માટે વિચાર કેતે રીઅ. 17એક જાગે ફાચે પરમેહેર ઇ આખેહે, “આંય તીયાં પાપુહુને આને તીયાં ખોટાયુ કામુહુને ફાચે કીદીહીજ યાદ નાય કિવ્યુ.” 18ઈયા કારણુકી કાદાચ પરમેહેર આપુ પાપ માફ કી દેદાહા, તા આમી આપનેહે બલિદાન કેરુલો જરુરત નાહ.

પરમેહેરુ પાહી જાજી

19ઈયા ખાતુરે ઓ માઅ પાવુહુ આને બોયુહુ, જાંહા ઇસુ ખ્રિસ્તુહુ આપુ માટે પોતાલે મૃત્યકી બલિદાન કી દેદો, તા આમી આપુહુ વગર બીયા હોરગામે પરમ પવિત્રસ્થાનુમે જાય સેક્તાહા. 20જાંહા ઇસુ બલિદાનુ રુપુમે મોય ગીયો, તાંહા તોઅ હોરગા પવિત્ર મંડપુ પોળદામેને ગીયો, આને તીયાહા આપુ માટે એક નવી વાટ તીયાર કેયી, જીયા મારફતે આપુહુ સાદા માટે જીવન મીલવી સેક્જી. 21આપુમે એક પવિત્રસ્થાનુ મહાયાજક હાય તોઅ પરમેહેરુ બાદા લોકુપે રાજ કેહે. 22તા આવા આપુહુ, પોતા મનુહુને શુદ્ધકીને ખ્રિસ્તુ રોગુતુલે રદયુપે છાંટીને આને શુદ્ધ પાંયુકી પોતા શરીરુલે તુવીને હાચા મનુકી આને પુરા વિશ્વાસુકી પરમેહેરુ પાહી આવજી. 23આને આપુ આશા કબુલનામો મજબુતીકી થોવજી, કાહાકા જો વાયદો પરમેહેરુહુ કેયોહો તોઅ ઈમાનદારીકી પુરો કેરી. 24આવા આપુહુ એકબીજા આરી પ્રેમ આને હારા કામુહુને કેરા માટે દિલાસો આપતા રેજી. 25આને જીયુ રીતીકી થોડાક લોક કેતાહા તેહકીજ આપુહુ બી ભક્તિસભામે જાવુલો નાય છોડજી, પેન એકબીજાહાને દિલાસો આપજી આને ચેતવણી આપતા રેજી, કાહાકા ખ્રિસ્તુ ફાચા આવુલો સમય ખુબુજ પાહી હાય.

26કાહાકા સત્ય જાંય લેવુલો બાદ બી આપુહુ જાંય જોવીને પાપ કેતાહા, તા પરમેહેર આપુ પાપુ માફી માટે કેલ્લોજ બલિદાન સ્વીકાર નાય કેરી. 27પેન તીયા બદલે પરમેહેર આપુ ન્યાય કેરી, આને તીયા વિરુધુમે કામ કેરુલોકી બોલતી આગીમે ફેકીને નાશ કેરી. 28જાંહા મુસા નિયમુ અનુસાર એગોહો ચાલતો વેરી, આને તીયા વિરુધ બેન નેતા તીન લોક સાક્ષી આપે, તા તીયાપે કેલ્લીજ દયા નાય કેરામે આવતલી, પેન મૃત્ય સજા આપવામે આવતલી. 29કાદાચ મુસા નિયમુ અનુસાર એહેડી સજા આપવામે આવતલી તા વિચાર કેરા જીયાહા પરમેહેરુ પોયરા અપમાન કેયોહો. તીયાહા પરમેહેરુલે પાગુ થુલે સુદી દેદોહો, કાહાકા તીયાહા તીયા અપમાન કેયોહો, આને વાયદાલે રોગુત (બલિદાન) જીયા મારફતે તોઅ પવિત્ર ઠેરવામે આલ્લો, તીયાલે અશુદ્ધ તરીકે ઓળખામે આલો, આને કૃપા આત્મા અપમાન કેયોહો તીયા સજા ખુબુજ મોડી વેરી. 30કાહાકા આપુહુ પરમેહેરુ જાંતાહા જીયાહા ઇ આખ્યોહો, “બદલો લેવુલો માઅ કામ હાય, આંયજ બદલો લેહે.” આને ફાચે ઇ બી આખ્યોહો, કા “પ્રભુ પોતા લોકુ ન્યાય કેરી.” 31જીવતા પરમેહેરુ આથુમે પોળુલો ખતરનાક ગોઠ હાય.

32પેન તીયા કઠીન દિહુમે તુમુહુ યાદ કેરા, જાંહા તુમુહુ ખ્રિસ્તુ વિશે જાંયો, આને તીયા બાદ ખુબુજ દુઃખ વેઠીને વિશ્વાસુમે ટીકી રીયા. 33ખુબુજ વખત ખુલેઆમ તુમા અપમાન વેયો, આને દુઃખ હીને તુમા મશ્કરી કેયી, આને અમુકવાર જીયાહાને સતાવામે આલા, તીયાં આરી તુમુહુ સહભાગી વી જાતલા. 34તુમુહુ જેલુમે બંદ હાય તીયાં દુખુમે સહભાગી વીયા, આને જાંહા તુમા માલ-મિલકત પાળાવી લેદી, તાંહા બી તુમુહુ દુઃખી નાહ વીયા પેન ખુશ રીયા, કાહાકા તુમુહુ જાંતાહા કા તીયા કેતા ઉત્તમ આને સાદા માટે રેનારી સમ્પતિ તુમાપે હાય જીયા પરમેહેરુ વાયદો કેયોહો. 35ઈયા ખાતુરે હિંમત રાખા, કાહાકા પરમેહેર તુમનેહે ખુબુજ ઇનામ આપી. 36તુમુહુ પરમેહેરુ ઈચ્છા પુરી કી સેકા, આને તીયા કેલા વાયદાલે મીલવી સેકા, ઈયા ખાતુરે તુમનેહે ધીરજ રાખા જરુરી હાય. 37જેહેકી પવિત્રશાસ્ત્રમે લેખલો હાય, પરમેહેર આખેહે, “આમી ખુબુજ ઓછો સમય બાકી હાય, જો આવનારો હાય તોઅ ખેરોજ આવી, આને વાઅ નાય લાગવે.” 38વિશ્વાસુમે માઅ ધર્મી માંહુ જીવતો રીઅ, પેન કાદાચ એગો પરમેહેરુપે વિશ્વાસ કેરા છોડી દી તા તીયા માટે માઅ મન દુઃખી વેરી. 39પેન આમુહુ તીયા વિશ્વાસ છોડી દેનારા આને નાશ વેનારામેને નાહ, પેન આમુહુ વિશ્વાસ કેનારા આને જીવુમે ઉદ્ધાર મિલવુનારા હાય.

Currently Selected:

હિબ્રૂઓને પત્રો 10: DUBNT

Highlight

Copy

Compare