ગલાતિઓ પત્રો 6
6
એકબીજા મદદત કેરા
1ઓ વિશ્વાસી પાવુહુ, કાદાચ એગુહુ માંહુ પાપ કેતા તેરાય જાય, તા તુમુહુ પવિત્રઆત્મા આગેવાનીમે જીવન જીવતાહા, નમ્રતાકી તીયુ વાટીપે ફાચે લાવા માટે મદદ કેરા. આને તુમુહુ પોતે સાવધાન રેજા, કા કાદાચ તુમુહુ પોતે પાપ કેરા માટે ભરમાય નાય જાઆ. 2તુમુહુ એકબીજા સમસ્યા દુર કેરા માટે મદદ કેરા, ઇયુજ રીતીકી તુમુહુ ખ્રિસ્તુ નિયમુ પાલન કી સેક્તાહા. 3કાદાચ એગોહો પોતે ઇ વિચારેહે કા આંય બીજા કેતા હારો હાય, જો ખરેખર એહેકી નાહ, તાંહા તોઅ પોતાલે ધોકો દેહે. 4પેન દરેક માંહુ પોતા વેહવારુલે પારખે કા કાય માઅ વેહવાર હારા વેહવારુ સમાનતા અન્ય લોકુ નાય કેરા જોજે. 5કાહાકા દરેક માંહુ પોતે કામુમે જીમ્મેદારી લાંઅ જોજે.
6જે લોક પરમેહેરુ વચનુ હિક્તાહા, તીયા જીમ્મેદારી હાય કા હિક્વુનારાલે જરુરતુ વસ્તુ આપે.
7પોતાલે ધોકો માઅ આપાહા, પરમેહેરુ મજાક નાહ વી સેકતો, કાહાકા તુમુહુ જો કાય પોયોહો તોંજ વાડાહા. 8કાદાચ તુમુહુ પોતા પાપી ઈચ્છા અનુસાર જીવન જીવતાહા, તા તીયામે મૃત્ય કામાવાહા. આને જો પવિત્રઆત્મા આગેવાની અનુસાર જીવન જીવતાહા તે તીયાકી અનંત જીવન જીવી. 9આપનેહે પોતા ભલાયુ કામે કેરા થાકા નાય જોજે કાહાકા કાદાચ આપુહુ ઢીલાય નાય કેજી તા પરમેહેરુ મારફતે નક્કી કેલો ઇનામ મીલવુહુ. 10ઈયા ખાતુરે જાંહા બી આપનેહે મોકો મીલે, તા બાદા લોકુ આરી ભલાયુ કેજા, ખાશકીને વિશ્વાસી પાવુ-બોયુ આરી.
છેલ્લી ચેતવણી આને નમસ્કાર
11ઈયા મોડા-મોડા અક્ષરુહુને હેરા, જે માયુહુ પોતા આથુમે લેખ્યાહા. 12જો ઉપેને દેખાવો કેતાહા તેજ તુમા સુન્નત કેરાવા માગતાહા. તે ઇ ઈયા ખાતુરે કેતાહા કા એ ગોઠ આખા લીદે તીયાહાને સતાવામે નાય આવે કા તીયાહાને સુન્નત કેરાવ્યા વગર ખાલી ઇસુ ખ્રિસ્તુ ક્રુસુપે ભોરોષો રાખવતાહા. 13કાહાકા સુન્નત કેરાવનારે પોતે તા બાદા મુસા નિયમુ પાલન નાહ કેતા, પેન તુમા સુન્નત ઈયા ખાતુરે કેરાવા ઈચ્છતાહા કા તે અન્ય યહુદી હુંબુર ઘમંડ કી એ ગોઠ આખી સેકે કા તુમા સુન્નત તીયા લીદે વીયીહી. 14પેન આંય ખાલી આપુ પ્રભુ ઇસુ ખ્રિસ્તુ ક્રુસુ મૃત્યલે છોડીને કેલ્લીજ ગોઠી વિશે ઘમંડ નાહ કેરા માગતો. તીયા ક્રુસુપે મોરા લીદે આંય આમી ઈયા જગતુમે ઈચ્છા ગુલામીકી સ્વતંત્ર વી ગીયો, ઈયા ખાતુરે આમી આંય જગતુ કેલ્લી બી વસ્તુ ગુલામ નાહ. 15કાહાકા સુન્નત કેરુલોકી કા નાય કેરુલોકી કાય મતલબ નાહ, પેન મોડી ગોઠ એ હાય કા આપુ રચના નવી રીતીકી વેયીહી કા નાહ વેયી. 16જોતા બી લોક ઈયા નિયમુ અનુસાર જીવન જીવતાહા, પરમેહેર તીયાપે દયા કેહે આને તે શાંતિકી રીઅ. કાહાકા તે ઇસ્રાએલી લોક પરમેહેરુ પસંદ કેલા હાય.
17આમીને કેડો બી માને દુઃખ નાય દેઅ, કાહાકા ઇસુ સેવા કેરા લીદે જે માયુહુ માર ખાદીહી, તીયા ડાગ માઅ શરીરુપે હાય.
18ઓ માઅ વિશ્વાસી પાવુહુ, આંય પ્રાર્થના કીહુ કા આપુ પ્રભુ ઇસુ ખ્રિસ્તુ કૃપા તુમા બાદા આરી રેઅ. આમીન.
Currently Selected:
ગલાતિઓ પત્રો 6: DUBNT
Highlight
Copy
Compare
Share
Want to have your highlights saved across all your devices? Sign up or sign in
Dubli (દુબલી) Bible by The Love Fellowship is licensed under Creative Commons Attribution-ShareAlike 4.0 License.
