2 તિમોથી પત્રો 1

નમસ્કાર

1ઓ પત્ર માને પાઉલુ વેલેને હાય. પરમેહેરુહુ માને ઈયા ખાતુરે પસંદ કેયોહો કા આંય ઇસુ ખ્રિસ્તુ પસંદ કેલો ચેલો બોનુ, કા આંય તીયા સંદેશુ પ્રચાર કી સેકુ કા પરમેહેરુહુ સાદા માટે જીવન આપા વાયદો કેયોહો, જો ઇસુ ખ્રિસ્તુપે વિશ્વાસ કેરા કી મીલેહે. 2ઓ તિમોથી, તુ જો માઅ પોયરાં સારકો હાય, આંય તુલે ઓ પત્ર લેખી રીયોહો. પરમેહેર બાહકા આને આપુ પ્રભુ ઇસુ ખ્રિસ્તુ વેલેને કૃપા આને દાયા આને શાંતિ તોમે મિલતી રેઅ.

ધન્યવાદ આને પ્રોત્સાહાન

3આંય રાત-દિહ પોતા પ્રાર્થનામે તુલે યાદ કેતો જાયને પરમેહેરુલે ધન્યવાદ આપુહુ, જીયા સેવા આંય હાચા મનુકી કીહુ જેહેકી માઅ આગલા ડાયા કેતલા. 4આને જાંહા આપુહુ અલગ વેલા, તાંહા તુ કેહેકી રોળલો તોઅ યાદ કીને ફાચે તુલે મીલુલો માને ઈચ્છા વેહે, કા તુલે મીલીને ખુશીકી પોરાય જાંવ. 5આંય તોઅ તીયા વિશ્વાસુલે યાદ કીહુ, જે તોઅ યાહકી-યાહકી લોઈસુમે આથી આને તોઅ યાહકી યુનિકે આથી. આને તોપે વિશ્વાસ કીહુ કા તોજ વિશ્વાસ તોમે બી હાય. 6આને ઇયાજ કારણુકી આંય તુલે દિલાસો આપુહુ, કા જાંહા માયુહુ તોપે આથ થોવલો, તાંહા પરમેહેરુહુ જો વરદાન તુલે આપલો, તીયાલે જાગૃત કી દેઅ. 7કાહાકા પરમેહેરુહુ આપનેહે બીખુ આત્મા નાહ, પેને સામર્થ આને આપસુમે પ્રેમ રાખુલો આને બાદી ગોઠીમે અનુંશાસન રાખુલો આત્મા આપીહી.

8ઈયા ખાતુર આપુ પ્રભુ ઇસુ વિશે ગોઠયા આખુલોમે, આને આમેનેહે જે તીયા ખાતુરે જેલુમે હાય, નાજવાહો માઅ, પેન પરમેહેરુ સામર્થ્યે મારફતે આપવામે આલ્લી હારી સુવાર્તા માટે માઅ આરી તુ બી દુઃખ ઉઠાવ. 9કાહાકા પરમેહેરુહુ આપુપે કૃપા (ઉદ્ધાર) કેયીહી, આને પવિત્ર જીવન જીવા ખાતુરે હાધ્યાહા. પરમેહેરુહુ દુનિયા બોના પેલ્લા ઇસુ ખ્રિસ્તુલે આપુ બદલે મોરા ખાતુરે યોજના બોનાવલી. 10પેન આમી આપુ ઉદ્ધાર કેનારો ઇસુ ખ્રિસ્ત આવી ગીયોહો, આને તીયાહા પોતા કૃપા કેયીહી. આને તીયાહા મોતુ શક્તિલે હારવી દેદીહી, આને હારી સુવાર્તા મારફતે સાદા માટે જીવનુ વાટ દેખાવીહી. 11પરમેહેરુહુ માને તીયુ હારી સુવાર્તા પ્રચાર કેનારો આને ચેલા આને વચન હિક્વુનારો નીમ્યોહો. 12ઈયા કારણુકી આંય આમી જેલુમે બી દુઃખ ઉઠાવી રીયોહો, પેન આંય નાજવાતો નાહ, કાહાકા આંય ખ્રિસ્તુલે જાંહુ જીયાપે માયુહુ વિશ્વાસ કેયોહો. આને માને ખેરોજ માલુમ હાય કા તીયા ફાચે આવુલો દિહ લોગુ તોઅ તીયા રાખવાલી કેરી જો તીયાહા માને દેદોહો.

13જો હાચ્યા ગોઠયા તુ માઅ મારફતે ઉનાયોહો, તીયા વિશ્વાસ આને પ્રેમુ આરી જો ખ્રિસ્ત ઇસુ આરી હાય, તીયાહાને પોતા નમુનો બોનાવીને રાખ. 14આને આમામે રેનારા પવિત્રઆત્મા સામર્થ્યકી ઈયુ હારી સુવાર્તા રાખવાલી કેજે પરમેહેરુહુ તુલે હોપીહી.

15તુ જાંહો કા આસિયા વિસ્તારુમે રેનારા થોડાક વિશ્વાસી લોકુહુ તુલે છોડી દેદો, આને તીયામેને ફુગીલસ આને હીર્મુગીનેસ બી હાય. 16આને આંય પ્રાર્થના કીહુ કા આનેસીફરુસુ કુટુંબુપે પ્રભુ દયા કે, કાહાકા જાંહા આંય જેલુમે આથો તાંહા માઅ પાહી આવા નાજવાયો નાહ, પેન ઘેળી-ઘેળી આવીને માને પ્રોત્સાહાન આપ્યો. 17આને જાંહા તોઅ રોમ શેહેરુમે આલો, તાંહા માને ખુબુજ મેહનતુકી હોધ્યો આને માને મીલ્યો. 18પ્રભુ ન્યાયુ દિહી સીફરુસુપે પોતા મહાન દયા કે. આને એફેસ્સ શેહેરુમે તીયાહા માઅ ખાતુરે જે-જે સેવા કેલી, તીયુલે બી તુ હારી રીતે જાંતોહો.

Currently Selected:

2 તિમોથી પત્રો 1: DUBNT

Highlight

Copy

Compare