2 કુરિંથીઓ પત્રો 7

1ઓ મેરાલાહા, જાંહા આંય ઓ વાયદો તુમનેહે આપવામે આલો, તા આમુહુ પોતે શરીરુ આને આત્મા બાધ્યા ખારાબ કામુહુને કેરા બંદ કી ધ્યા, આને પરમેહેરુ બીખ રાખીને પુરી પવિત્રતાકી જીવન જીવા.

પાઉલુ ખુશી

2તુમુહુ આમનેહે પ્રેમ કેરા, આમુહુ કેડા બી કાયજ ખોટો નાહ કેયો, આને કેડા બી કાયજ નાહ બીગાળ્યો, આને નાહ એગાલે ઠોગી લેદો. 3આંય તુમનેહે દોષી બોનાવા ખાતુરે તુમનેહે એ ગોઠયા નાહ આખતો. કાહાકા આંય પેલ્લાથીજ આખી ચુક્યોહો કા આમુહુ તુમા આરી ખુબુજ પ્રેમ કેતાહા, આમુહુ તુમા આરી જીવા આને મોરા બી તીયાર હાય. 4આંય તુમનેહે હિંમતુકી આખુહુ, માને તુમા વોચ્ચે ખુબુજ ઘમંડ હાય, આને માને ખુબુજ શાંતિ મીલીહી. માઅ બાદે દુખુમે બી આંય ખુશ વિહુ.

5કાહાકા જાંહા આમુહુ મકોદેનિયા વિસ્તારુમે આલા, તાંહા બી આમનેહે આરામ નાહ મીલ્યો, પેન આમનેહે ચારુવેલે તકલીફ આથી, બારે લડાય ચાલતલી આને આમા રદયુમે બીખ આથી. 6તેબી દુઃખી લોકુહુને દિલાસો આપા પરમેહેરુહુ, તિતસુ આવુલોકી આમનેહે દિલાસો મીલ્યો. 7આને નાય ખાલી તીયા આવુલોકી પેન તિતસુલે તુમા વેલેને દિલાસો મીલ્લો તીયાકી બી, તીયાહા આપનેહે આખ્યો કા તુમુહુ માને કોતા હેરા માગતલા, આને જો બી તુમુહુ કેયો તીયાં વિશે તુમનેહે દુ:ખ આને તુમુહુ કેહેકી માઅ વિશે ચિંતા કેતાહા. જીયાકી આંય ખુબ ખુશ વીયો. 8કાહાકા કાદાચ માયુહુ તુમનેહે પત્ર લેખીને દુઃખી કેયોહો, તેબી આંય તીયાકી દુઃખી નાહ વેતો, જેહેકી પેલ્લા દુઃખી વેતલો, કાહાકા આંય જાંહુ કા તોઅ પત્ર વાચા ખાતુરે તુમનેહે દુઃખ તા વીયો પેન તોઅ દુઃખ થોડીકુજ વાઅ માટે આથો. 9આમી આંય ખુશ હાય પેન ઈયા ખાતુરે નાહ કા તુમુહુ દુઃખી વીયા, પેન ઈયા ખાતુરે કા તુમુહુ તીયા દુઃખુ લીદે પાપ કેરા બંદ કી દેદો, કાહાકા તુમા દુઃખ પરમેહેરુ ઈચ્છા અનુસાર આથો, કા આપુ વેલેને તુમનેહે કેલ્લીજ ગોઠી નુકશાન નાય વેઅ. 10કાહાકા કાદાચ એગો માંહુ પરમેહેરુ ઈચ્છાકી દુઃખી વેહે, તા તોઅ પાસ્તાવો કેહે આને ઉદ્ધાર પામેહે. ઇયામે દુઃખ નાહ. પેન જગતુ દુ:ખુમે મૃત્ય જન્મેહે. 11તીયા મારફતે તુમામે કોતો બદલાવ આલોહો, તીયા વિશે આંય આને તુમુહુ વિચાર કેરા, પરમેહેરુ ભક્તિ કેરુલો કોતો ઉત્સાહ આલોહો, વિરોધ કેનારાલે જવાબ આપુલો, ગલત કેનારાકી ચીળવાય જાવુલો, પરમેહેરુ બીખ, માને મીલુલો ઈચ્છા, સેવા કેરુલો ઉત્સાહ, આને ખોટાયુ બદલો લેવુલો, ઇ બાદો કીને સાબિત કી દેદો કા તુમુહુ ઈયુ ગોઠી દોહી નાહ. 12માયુહુ તુમનેહે જો પત્ર લેખલો, તોઅ અન્યાય કેનારા ખાતુરે નાહ લેખ્યો આને નાહ તે જીયાપે અન્યાય વીયો તીયા માટે, પેન ઈયા ખાતુરે લેખ્યોહો કા આમા સાથ તુમા માટે લગન, તોઅ પરમેહેરુ હાજરીમે તુમનેહે માલુમ પોળે. 13ઈયા ખાતુરે આમનેહે ખુબુજ પ્રોત્સાહાન મીલ્યો,

આને તુમુહુ તિતસુ મદદ કીને તીયાલે ખુશ કી દેદો, ઈયા ખાતુરે આમનેહે વાદારે ખુશી વેયી. 14કાહાકા કાદાચ માયુહુ તિતસુ આગલા તુમા વિશે વાહ-વાહી કેયી તા આંય નાજવાયો નાહ. પેન જેહેકી આમુહુ તુમનેહે બાધ્યા ગોઠયા હાચ્યા આખી દેધ્યાહા, તેહેકીજ તિતસુ આગલા આપુ વાહ-વાહી કેરુલો હાચો પોળ્યો. 15તુમુહુ બાદા તીયા આધિનુમે વેરા ખાતુરે કોતા તીયાર રેતલા, આને તીયા બીખુકી કાપતા જાંયને તીયાલે સ્વીકાર કેયો, તોઅ બાદો તોઅ યાદ કેહે, તા તુમા આરી જો તીયા પ્રેમ હાય તોઅ વાદારે વાદી જાહે, 16આંય ખુશ હાય, કાહાકા માને દરેક ગોઠીમે તોપે ભોરોષો હાય.

Currently Selected:

2 કુરિંથીઓ પત્રો 7: DUBNT

Highlight

Copy

Compare