2 કુરિંથીઓ પત્રો 13

છેલ્લી ચેતવણી

1-2ઓ મેરાલાહા, પવિત્રશાસ્ત્રમે ઇ લેખલો હાય, “તુમામેને કેલ્લી બી ગોઠ વેરી તા તીયુલે બેન નેતા તીન સાક્ષી મારફતે હમજણ કી લાંઅ જોજે.” જાંહા આંય બીજી વાર તુમા પાહી આલો, તાંહા આંય પેલ્લાથીજ તીયા લોકુહુને ચેતવણી આપી ચુક્યોહો, આમી આંય ફાચે તીયાહાને બીજા બાદાહાને ઈયા પત્રમે ચેતવણી આપુહુ. આમી આંય ફાચે તીજીવાર તુમા પાહી આવનારો હાય, આને કાદાચ તીયાહા આમી લોગુ પાપ કેરુલો બંદ નાહ કેયો, તા કેડો બી દંડુકી નાય વાચાય. 3કાહાકા તુમુહુ તા ઈયા સાબિતી માગતાહા, કા ખ્રિસ્ત મામે ગોગેહે, જો તુમા માટે કમજોર નાહ, પેન તુમામે સામર્થ હાય. 4તોઅ કમજોરી લીદે ક્રુસુપે ચોળવામે આલો, તેબી પરમેહેરુ સામર્થુંકી તોઅ જીવતો હાય, આપુહુ એહેકી કમજોર જેહેકી ખ્રિસ્ત આથો, પેન તુમુહુ અનુભવ કેરાહા કા આપુહુ પરમેહેરુ સમાર્થુ મારફતે ખ્રિસ્તુ આરી જીવતા હાય.

5પોતાલે પારખા કા વિશ્વાસુમે હાય કા નાહ, પોતાલે પારખા, ઇ જાંણા ખાતુરે કા કાય તુમા વિશ્વાસ હાચો હાય કા નાહ. કાય તુમુહુ પોતા વિશે ઇ નાહ જાંતા કા ખ્રિસ્ત ઇસુ ખ્રિસ્ત તુમામે હાય? કાદાચ નાહ તા તુમુહુ ઓળખાણ કેરા નોક્કામા નીગ્યા. 6પેન માઅ આશા તા એ હાય, કા તુમુહુ પોતે જાંયલ્યા, કા આમુહુ નક્કામો નાહ. 7કાદાચ તુમનેહે લાગતો વેરી, કા આમુહુ હાચા પ્રેરિત નાહ, તેબી આપુહુ પરમેહેરુલે એ પ્રાર્થના કેતાહા, કા તુમુહુ કાયજ ખોટાય માઅ કીહા, પેન સાદા ભલે કામે કેરા. 8કાહાકા આમુહુ હાચાયુ વિરોધુમે કાયજ નાહ કી સેક્તા પેન હાચાયુ માટેજ કી સેક્તાહા. 9જાંહા આમુહુ કમજોર હાય, આને તુમુહુ વિશ્વાસુમે મજબુત હાય, તા આમુહુ ખુશ વેતાહા, આને એ પ્રાર્થના બી કેતાહા, કા તુમુહુ વિશ્વાસુમે સિદ્ધ વી જાંઅ. 10ઈયા કારણુકી આંય એ ગોઠ તુમા પાહી આવા પેલ્લા લેખી રીયોહો, કા તુમનેહે દંડ આપીને માને માઅ અધિકાર આખુલો જરુર નાય પોળે જે પ્રભુહુ માને આપીહી. કાહાકા આંય તુમા વિશ્વાસુલે નાશ કેરા ખાતુરે નાહ, પેન મુજબુત કેરા માટે મા અધિકાર ઉપયોગ કેરા ઇચ્છુહુ.

છેલ્લી નમસ્કાર

11આમી ઓ પાવુહુ આને બોયુહુ, ખુશ રેજા, સિદ્ધ બોનતા જાઅ, એકબીજાલે દિલાસો આપ, એકબીજા મનુમે કામ કેરા, મેલ-મિલાપુકી રેજા, આને પ્રેમ આને શાંતિ આપનારો પરમેહેર તુમા આરી રીઅ. 12ખ્રિસ્તુ પ્રેમુકી એકબીજા ગલે મીલા. 13ઇહીને બાદા પવિત્ર લોક તુમનેહે પ્રભુ ઇસુ ખ્રિસ્તુ નામુમે નમસ્કાર આખતાહા. 14પ્રભુ ઇસુ ખ્રિસ્તુ કૃપા આને પરમેહેરુ પ્રેમ આને પવિત્રઆત્મા ભાગીદારી તુમા બાદા આરી વેતી રેઅ.

Currently Selected:

2 કુરિંથીઓ પત્રો 13: DUBNT

Highlight

Copy

Compare