1 કુરિંથીઓ પત્રો 10

ઇસ્રાએલુ ગોઠીહી કી ચેતવણી

1ઓ વિશ્વાસી પાવુહુ, આંય તુમનેહે એક ગોઠ આખા માગુહુ, કા આમા આગલા ડાયા આરી કાય વેલો. પરમેહેરુહુ એક વાદલા મારફતે તીયાં આગેવાની કેયી. આને તીયા બાદાહાને લાલ સમુદ્ર વોચ્ચે વાટ કીને બીજી વેલે લી ગીયો. 2આને મુસા આરી ચાલનારા ચેલા રુપુમે તીયાહાને વાદલામે આને સમુદ્રમે બાપ્તીસ્મો આપ્યો. 3તીયા બાદાહા જો પરમેહેરુહુ હોરગામેને માંડો આપ્યો તોજ ખાદો. 4આને તીયા બાદાહા પાંય બી જોં પરમેહેરુહુ આપ્યો તોજ પીદો, તોઅ પાંય તીયા આત્મિક ખોળકામેને નીગલો, જો તીયા આરી-આરી ચાલ્યો. આને તોઅ ખોળકો ખ્રિસ્ત આથો. 5પેન પરમેહેર તીયામેને ખુબુજ લોકુ આરી ખુશ નાય આથો, ઈયા ખાતુરે તે હુના જાગામુજ મોય ગીયે.

6એ ગોઠયા જે આપુ આગલા ડાયા આરી વેલ્યા, આને એ આપુ માટે એક કડક ચેતવણી હાય, કા કાદાચ આપુહુ તીયા હોચે ખોટાય કેરા ઈચ્છા રાખજી તા કાય વેરી. કા જેહેકી તીયાહા લાલચ કેયી તેહેકી, તેહેકી આપુહુ ખોટી વસ્તુ લાલચ નાય કેજી. 7તીયામેને ખુબુજ લોક તા મુર્તિ પુજા કેરા લાગલા, તીયા હોચે તુમુહુ મુર્તિ પુજા કેનારા માઅ બોનાહા. જેહેકી પવિત્રશાસ્ત્રમે લેખલો હાય, “લોક ખાવુલો-પીયુલો આને મોજ-મસ્તી કેરા લાગ્યા.” 8આને જીયુ રીતીકી તીયામેને ખુબુજ લોકુહુ એહેડો પાપ કેયો કા બાય-બાયુ આરી આને આદમી-આદમી આરી આને આદમી પોતા કોઅવાલી છોડીને બીજી બાયુ આરી, આને બાય પોતા કોઅવાલાલે છોડીને બીજા આદમી આરી વ્યેભિચાર કેરા લાગ્યે, આને એક દિહુમે તા તેવીશ હાજાર લોક મોય ગીયે. ઈયા ખાતુરે તુમુહુ તેહડો ગલત કામકીને પરમેહેરુ વિરુધ પાપ માઅ કેરાહા. 9આને આપનેહે ખ્રિસ્તુલે પારખા કોશિશ નાય કેરા જોજે, કાહાકા તીયામે ખુબુજ લોકુહુ પરમેહેરુ પરીક્ષા કેયી આને હાપળા ટોચાકી તે મોય ગીયે. 10આને નાય તુમુહુ કચ-કચ કેરાહા કાહાકા તીયામેને ખુબુજ લોક કચ-કચ કેરા લીદે, તાંહા પરમેહેરુહુ એક દુતુલે મોકલ્યો આને તીયાહાને માય ટાક્યો. 11તીયાં આરી જે ઘટના વેયા, તે બાધ્યા ઘટના ઈયા જગતુ છેલ્લા દિહ લોગુ રેનારા લોકુહુને ચેતવણી આપા ખાતુરે પવિત્રશાસ્ત્રમે લેખવામે આલ્યાહા. 12ઈયા ખાતુરે કેડો બી ઇ વિચારેહે કા, “આંય વિશ્વાસુમે મજબુત હાય,” તોઅ ધ્યાન રાખે, કાદાચ લાલચાયને પાપુમે નાય પોળી જાઆ. 13લોક સહન નાય કી સેકે એહેડી પરીક્ષા તુમા નાહ વેયી, આને પરમેહેર વિશ્વાસ યોગ્યો હાય, ઈયા ખાતુરે તોઅ તુમનેહે એહેડી પરિક્ષામે ટાકે, જીયુલે તુમુહુ સહન નાહ કી સેકા. પેન તોઅ તુમનેહે પરીક્ષામેને નિંગા સામર્થ બી આપી.

મુર્તિ પુજા વિરુધ ચેતવણી

14ઈયા ખાતુરે માઅ મેરાલાહા, મુર્તિ પુજાકી દુર રેજા. 15તુમુહુ હોમુજદાર હાય ઈયા ખાતુરે જો આંય તુમનેહે ઇ બાદો આખુહુ તોઅ હાચો કા ઝુટો હાય ઈયા ફેસલો તુમુહુ કેરા. 16તુમનેહે હારી રીતીકી માલુમ હાય, કા જાંહા આમુહુ પ્રભુ ભોજુમે પરમેહેરુ ધન્યવાદ કીને દારાક્ષારસ પિતાહા, તાંહા આપુહુ પ્રભુ ખ્રિસ્તુ રોગુતુમે ભાગીદાર વેતાહા. આને જાંહા આપુહુ રોટલી તોળીને ખાતાહા, તા આપુહુ તીયા શરીરુમે ભાગીદાર વેતાહા. 17કાહાકા આપુહુ એકુજ રોટલીમેને તોળીને ખાતાહા, તે એક રોટલી ઇ આખેહે કા, આપુહુ જે ખુબુજ હાય તે બાદા ખ્રિસ્તુમે એક વિહુ. 18ઇસ્રાએલુ લોકુ રીવાજુલે હેરા, તે જો કાય વેદીપે બલિદાન કેતાહા, તીયામેનેજ ખાતાહા. ઈયા ખાતુરે તેબી મુર્તિ પુજામે ભાગીદાર વેતાહા. 19આંય ઇ નાહ આખતો કા મુર્તિ પુજા આસલી ભગવાન હાય, કા ફાચે મુર્તિ આગલા બલિદાન કેલી વસ્તુ કાંવીહી કિંમત હાય. 20પેન માઅ આખુલો મતલબ હાય કા જે વસ્તુ મુર્તિ આગલા બલિદાન કેતાહા, તે વસ્તુ પરમેહેરુ નાહ પેન પુથુ ગોણાહે. ઈયા ખાતુરે આંય નાહ ઈચ્છતો કા તુમુહુ દુષ્ટઆત્મા ભાગીદાર બોના. 21તુમુહુ પ્રભુ કટોરો, આને પુથુ કટોરા બેનુમેને નાહ પીઅ સેકતા, તુમુહુ પ્રભુ માંડામે આને દુષ્ટઆત્મા માંડો બેનુમે ભાગીદાર નાહ વી સેકતા. 22કાદાચ આપુહુ તેહેકી કેતાહા, તા આપુહુ પ્રભુલે ક્રોધ ચોળવુતાહા. આને યાદ રાખા કા આપુહુ પ્રભુ કેતા વાદારે શક્તિશાલી નાહ.

બાદો પરમેહેરુ મહિમા માટે

23બાદો કેરુલો આપુપે અનુમતિ હાય, પેન તોઅ બાદો કેરા કાય ફાયદો નાહ. બાદો કેરા માટે આપુપે અનુમતિ હાય પેન તોઅ બાદો કેરુલોકી આપુ વિશ્વાસ મજબુત નાહ વેતો. 24પોતાજ ભલાય માટે માઅ વિચારાહા, પેન બીજા ભલાયુ માટે બી વિચારા.

25જે ખાવુલો વસ્તુ બાજારુમે વેચાહે, તે બાદી વસ્તુ ખાંઅ, પેન મનુમે શંકા કીને માઅ ખાહા કા, એ વસ્તુ મુર્તિ આગલા બલિદાન કેલી વેરી કા નાય. 26કાહાકા પવિત્રશાસ્ત્રમે લેખલો હાય, “તોરતી આને તીયાપે રેનારી બાદી વસ્તુ પ્રભુ હાય.” ઈયા ખાતુરે બાદી ખાવુલો વસ્તુ ખાય સેક્તાહા. 27કાદાચ અવિશ્વાસી લોક તુમનેહે ખાંઅ ખાતુરે હાદે, આને તુમુહુ જાંઅ માગતાહા, તા જો કાય માંડો આપે, તીયા વિશે ઇ માઅ ફુચાહા કા ઇ પુજલો હાય કા નાહ, પેન તોઅ ખાય લ્યા, તા કાદાચ તીયા બલિ ચોળવુલી વેરી તા તુમનેહે એહેકી લાગી કા આંય દોષી હાય. 28પેન કાદાચ એગોહો તુમનેહે પેલ્લાનેજ આખી દેહે કા, “એ વસ્તુ પુજલી હાય,” તા આખુલો લીદે આને તીયા વિચારુ લીદે માઅ ખાહા. કાહાકા બીજે માંહા વિચારુ મારફતે, તુમા જો ખાવુલો અનુમતિ હાય તીયા નિંદા નાય વેરા જોજે. 29આંય તુમા વિચારુ વિશે નાહ આખતો, પેન બીજા માંહા વિચારુ વિશે આખુહુ. કાહાકા કાદાચ તુમુહુ ખાવુલોકી અનુમતિ હોમજીને ખાય લીહા, પેન હુબુર્યો માંહુ ઇ વિચારેહે કા એ વસ્તુ ખાવુલો પાપ હાય, તા તુમુહુ ખાવુલો પોતા આઝાદી દાવો કેતાહા તા ઈયા કાય ફાયદો. 30કાદાચ પુજલો માંડો તુમુહુ પરમેહેરુ ધન્યવાદ કીને ખાતાહા, તા જીયુ વસ્તુ માટે ધન્યવાદ કેતાહા, તીયા લીદે તુમા બદનામી નાય વેરા જોજે.

31ઓ ઈયા ખાતુરે આંય તુમનેહે ઇ આખાં માગુહુ કા, જો કાય ખાંઅ, પીયા, કા બીજો કાય કેરા, તોઅ બાદો પરમેહેરુ મહિમા માટે કેરા. 32તુમુહુ યહુદી જાતિ લોક, આને અન્યજાતિ લોકુ, આને પરમેહેરુ મંડળી લોકુહુને વિશ્વાસ છોડી દાંઅ કારણ માઅ બોનાહા. 33જેહેકી આંય બી બાદા લોકુહુને ખુશ રાખા કોશિશ કીહુ, આને પોતા ફાયદા માટે નાહ પેન બીજા ફાયદા વિચારુહુ, કા તે બાળે ઉદ્ધાર પામે.

Currently Selected:

1 કુરિંથીઓ પત્રો 10: DUBNT

Highlight

Copy

Compare