1 કુરિંથીઓ પત્રો 1

નમસ્કાર

1પરમેહેરુ ઈચ્છા અનુસાર ઇસુ ખ્રિસ્તુ ચેલા વેરા ખાતુરે પસંદ કેરામે આલ્લો આંય પાઉલ આને સોસ્થીઈનેસુ જો પાવુ સારકો હાય. 2ઓ પત્ર પરમેહેરુ તીયુ મંડળી લોકુહુને લેખુહુ જો કુરિંથી શેહેરુમે હાય. જીયાહાને પરમેહેરુહુ પોતા લોકુ રુપુમે એકઠા કેયાહા, આને જીયાહાને તીયાહા પવિત્ર લોક વેરા ખાતુરે પસંદ કેયાહા, આને જે દરેક જાગે આપુ પ્રભુ ઇસુ ખ્રિસ્તુ નાવુકી પ્રાર્થના કેતાહા આને તીયા બાદા માટે બી લેખુહુ. કાહાકા તોઅ આપુ બાદા પ્રભુ હાય.

3આપુ બાહકો પરમેહેર આને પ્રભુ ઇસુ ખ્રિસ્ત તુમનેહે કૃપા આને શાંતિ આપે.

ખ્રિસ્તુમે આશીર્વાદ

4તુમનેહે ઇસુ ખ્રિસ્તુ મારફતે પરમેહેરુકી ખુબુજ આશીર્વાદ મીલ્યોહો, તીયા માટે આંય પરમેહેરુ ધન્યવાદ સાદા કીહુ. 5કાહાકા દરેક રીતીકી તુમનેહે ખુબુજ પ્રકારુ આશીર્વાદ મીલ્યોહો, કાહાકા તુમુહુ ઇસુ ખ્રિસ્તુ આરી એકજુટ હાય, તુમુહુ ખ્રિસ્તુ હાય ઈયા ખાતુરે તીયાહા તુમનેહે તીયા વચનુલે ગોગા આને હોમજા ખાશ વરદાન આપ્યોહો. 6તીયા ખાશ વરદાનુ લીદેજ પરમેહેરુહુ સાબિત કેયોહો, કા ઇસુ ખ્રિસ્તુ વિશે જે સુવાર્તા હાય તે હાચી હાય. 7ઈયા ખાતુરેજ તુમનેહે બાદી જાતિ વરદાન પવિત્રઆત્મા વેલેને આપવામે આલોહો આને તુમુહુ આપુ પ્રભુ ઇસુ ખ્રિસ્તુ ફાચે આવુલો વાટ જોવતા રેતાહા. 8પરમેહેર તુમનેહે છેલ્લે લોગુ વિશ્વાસુમે મજબુત કેરી કા તુમુહુ આપુ પ્રભુ ઇસુ ખ્રિસ્તુ ફાચે આવુલો સમયુલે નિર્દોષ ઠેરા. 9આને પરમેહેર એહેકી કેરી કાહાકા જો કાય તીયાહા આખ્યોહો, તીયાલે કેરા માટે તોઅ વિશ્વાસ યોગ્યો હાય. જીયાહા તુમનેહે તીયા પોયરો ઇસુ ખ્રિસ્તુ સંગતીમે હાધ્યાહા.

મંડળીમે ફુટ

10ઓ માઅ વિશ્વાસી પાવુ બોયુહુ, આપુ પ્રભુ ઇસુ ખ્રિસ્તુ અધિકારુ વિશે તુમનેહે વિનંતી કીહુ, કા તુમુહુ બાદા એકબીજાજ ગોઠ માના, આને તુમામે ફુટ નાય પોળે, પેન એકુજ મનુ આને એકમત વીને મીલીને રેજા. 11કાહાકા ઓ વિશ્વાસી પાવુ બોયુહુ, ખલોયુ પરિવારુ લોકુહુ માને તુમા વિશે આખ્યોહો, કા તુમામે ઝગળા વેતાહા.

12માઅ આખુલો મતલબ ઓ હાય કા, તુમુહુ બાદા અલગ-અલગ ગોઠયા કેતાહા, એગોહો તા આખેહે કા, “આંય પાઉલુ ચેલો હાય,” આને એગોહો આખેહે, “આંય અપુલ્લોસુ ચેલો હાય,” આને એગોહો આખેહે, “આંય કાયફા ચેલો હાય,” આને એગોહો તા આખેહે, “આંય તા ખ્રિસ્તુ ચેલો હાય.” 13ઇ બરાબર નાહ, કાહાકા ઇસુ ખ્રિસ્ત અલગ-અલગ ભાગુમે વાટાલો નાહ, આંય પાઉલ તુમા માટે ક્રુસુપે નાહ ચોળ્યો, આને નાહ માઅ પાઉલુ નાવુકી બાપ્તીસ્મો લેદો. 14આંય પરમેહેરુ ધન્યવાદ કીહુ કા ક્રિસ્પુસ આને ગાયસ ઈયા બેનુ પાવુ સિવાય માયુહુ તુમામેને કેડાલુજ બાપ્તીસ્મો નાહ આપ્યો. 15ઈયા ખાતુરે ઇ કેડોજ નાહ આખી સેકતો કા તુમનેહે પાઉલુ નાવુ બાપ્તીસ્મો મીલ્યોહો. 16આને હોવ, માયુહુ સ્તેફ્નાસ આને તીયા પરિવારુલે બી બાપ્તીસ્મો આપ્યોહો. 17કાહાકા ખ્રિસ્તુહુ માને બાપ્તીસ્મો આપા ખાતુરે નાહ, પેન ઈચ્છા અનુસાર સુવાર્તા પ્રચાર કેરા ખાતુરે મોક્લ્યોહો. જાંહા આંય ઈચ્છા અનુસાર સુવાર્તા પ્રચાર કીહુ, તાંહા લોકુહુને વિશ્વાસુમે લાવા બુદ્ધિ ઉપયોગ નાહ કેતો, કાદાચ આંય એહેકી કીવ્યુ તા ખાલી માપેજ વિશ્વાસ કેરી, આને ઇસુ ખ્રિસ્તુ ક્રુસુપે મોરુલો સુવાર્તા લોકુ જીવનુમે સામર્થી રીતીકી કામ નાય કેરી.

ખ્રિસ્ત પરમેહેરુ જ્ઞાન આને સામર્થ્ય હાય

18જાંહા એ સુવાર્તા ઉનાતાહા કા ઇસુ ખ્રિસ્ત ક્રુસુપે મોય ગીયો, તા તીયામેને થોડાક લોક વિચારતાહા કા એ સુવાર્તા નક્કામી હાય, તે લોકુહુને નોરકુ વેલે લી જાહે. પેન આપુ માટે જો ઉદ્ધારુ વાટીપે ચાલતાહા એ સુવાર્તા પરમેહેરુ સામર્થ્ય હાય. 19કાહાકા પવિત્રશાસ્ત્રમે લેખલો હાય, “આંય જ્ઞાનુ વાલાહાને નષ્ટ કી દેહે, આને હોમુદારુ હોમુજ નોક્કામી કી દેહે.”

20ઇયાકી આપુહુ ઇ હોમજુતાહા કા બુદ્ધિમાન લોકુ કાય કિંમત નાહ. આને જે મુસા નિયમ હિક્વુનારા જો જ્ઞાન રાખતાહા, તીયા જ્ઞાન કાય કામ નાહ કેતો, આને ઈયા જગતુમે વિવાદ કેનારે બી નષ્ટ વી ગીયે, કાહાકા પરમેહેરુહુ જ્ઞાનુલે નોક્કામો કી દેદોહો. 21જાંહા પરમેહેરુહુ પોતા બુદ્ધિકી હેલો, કા લોક જગતુ જ્ઞાનુકી પરમેહેરુલે કીદીહીજ નાય જાંય સેકે, ઈયા ખાતુરે તીયાહા આમા મારફતે આપવામે આલ્લા ઉપદેશુકી લોકુહુને વાચાવા ખાતુરે કામુમે લેદા. પેન જીયાહા તીયુ હારી સુવાર્તાપે વિશ્વાસ નાહ કેયો તે તીયાલે મુર્ખે માનતેહે. 22ઇ યહુદી લોકુહુને મુર્ખતા લાગેહે, કાહાકા ઇ હાચો હાય એહેકી કેરા ખાતુરે હોરગામેને એક ચિન્હ ચમત્કાર હેરા માગતલે, આને અન્યજાતિ લોકુહુને બી મુર્ખતા લાગેહે, જે જગતુ જ્ઞાન મિલવા માગતેહે. 23પેન આમુહુ ઇ પ્રચાર કેતાહા, કા ઇસુ ખ્રિસ્ત આપનેહે પાપુમેને છોડાવા ખાતુરે ક્રુસુપે મોયો. જો યહુદી લોકુ માટે ઠોક્કરુ કારણ બોને આને અન્યજાતિ લોકુ માટે મુર્ખતા હાય. 24પેન જીયાહાને પરમેહેરુહુ પોતા લોક બોના ખાતુરે હાદયાહા, કાદાચ યહુદી લોક વેરી કા નાય વેઅ, કા કાદાચ અન્યજાતિ લોક વેરી, તીયા લીદે ઇસુ ખ્રિસ્ત પરમેહેરુ સામર્થ્ય આને પરમેહેરુ જ્ઞાન હાય. 25કાહાકા પરમેહેરુ મુર્ખતા લોકુ જ્ઞાનુકી વાદારે જ્ઞાનુવાલી હાય, આને પરમેહેરુ નિર્બલતા લોકુ તાકતુ કેતા વાદારે તાકતવર હાય.

26ઓ વિશ્વાસી પાવુ બોયુહુ, યાદ કેરા કા જાંહા તુમુહુ પરમેહેરુહુ હાદલો તાંહા તુમા પરસ્થિતિ કેહેડી આથી, કાહાકા તુમુહુ લોકુ નજરુમે જ્ઞાનુવાલા આને શક્તિવાલા નાય આથા, આને તુમા સમાજુમે તુમા માન નાય આથો. 27પેન પરમેહેરુહુ જ્ઞાનુ વાલાહાને નાજવાવા ખાતુરે એહેડા લોકુહુને પસંદ કેયાહા, જે જગતુ લોકુ નજરીમે મુર્ખ હાય. 28આને પરમેહેરુહુ તીયાહાને પસંદ કેયા જે જગતુ નજરીમે નીચ આને ખારાબ, આને જીયાહાને ઈયા જગતુ કાયજ માન નાહ મીલતો તીયાહાને બી પસંદ કી લેદાહા જે ઈયા જગતુમે મહત્વ લોક ગોણવામે આવતાહા તીયાહાને નક્કામા કી દેદા. 29પરમેહેરુહુ એહેકી ઈયા ખાતુરે કેયો કા કેલ્લો બી માંહુ તીયા હુંબુર ઘમંડ નાય કી સેકે. 30પેન પરમેહેરુ દયાકી તુમુહુ ઇસુ ખ્રિસ્તુમે એક વીયાહા, આને ખ્રિસ્તુ મારફતેજ તીયાહા આપનેહે તીયા જ્ઞાન આપ્યોહો. આને પરમેહેરુહુ આપનેહે તીયા નજરીમે ધર્મી બોનાવેહે. ખ્રિસ્તુ મારફતે આપનેહે પવિત્ર કેરામે આવેહે આને તોઅ આપનેહે પાપુમેને છોડાવેહે. 31કા જેહેકી પવિત્રશાસ્ત્રમે લેખલો હાય, તેહેકીજ વેઅ, “જો કેડો બી ઘમંડ કે તોઅ પ્રભુહુ કેયોહો આને તીયાપે કે.”

Currently Selected:

1 કુરિંથીઓ પત્રો 1: DUBNT

Highlight

Copy

Compare