Ɓalɔma 7

Ɓununikio ngia yɨ muklisito akʉ mapanʉ kʉ Ɓayuda

1Inu ɓayoo ɓʉsɛmɛ, jʉ inu na ɓombi ngiɓa naambɨa mapanʉ muɗo, nakʉmbɨa moni ngika makʉkʉnda ninu kʉɓɨa akɛ. Mapanʉ kaakyɨa nʉ angu ekoo ʉ mombi tʉkʉ ambʉ a‑zʉ kʉkʉʉ. 2Ya ngbanga kʉndʉ moi ʉ ɨɓaa. Ndʉ swaɨ aɓio‑zʉ kʉkʉʉ, aɓio‑zʉ tʉkʉ ɛsɨ ʉ ʉpanʉ wʉ jubunio ngiangɔ nʉ swaɨ. Ɨkyɛmɨngana, ndʉ swaɨ awo ambʉ u꞉ɓununikio akʉ mapanʉ ngika ka꞉ɓujobo ɓununikioo. 3Kʉ ɓwanɨ, ndʉ moi ngiinanɨ achɨkana nʉ gue ɔmɔ swaɨ inyeni kʉkʉʉ, ɓamʉchɨka ndʉ a moi ʉ ɨndambʉ. Ɨkyɛmɨngana, ndʉ swaɨ awo a tiga 'uɓununikie akʉ mapanʉ ngika ka꞉ɓujobo nʉ swaɨ. Kʉ ɓwanɨ, ati ngiinanɨ abana ndʉ achɨkana nʉ gue ɔmɔ, mombi ambʉkɔmʉ asigo ɓɔ ʉ꞉kyɨa ɨndambʉ.

4Inu ɓayoo ɓʉsɛmɛ, moni ngikakɛ ka andɛnʉ ngbanga kʉ ɓwanɨ aka ekoo ʉ mapanʉ. Inu na꞉wu woo jʉ na꞉jubunio nʉ ndʉtʉ ngia yɨ Klisito. Ɨtakɨ‑takɨ ngiakɛ inu na tiga ɓombi ɓʉ mombi ɔmɔ, iya yakusigo ɓɔ ɓombi ɓʉ mombi ngia a꞉jʉkana akʉ ingyo aka ekoo ngia ɓɔ ɨkyananakɨa ngiindɛsʉ yiɓio ɨkwananakɛ akʉ kuu ngia yɨ Asʉɓɨɨ. 5Jʉ ati ngia ki꞉nye‑ɔɔ amati ʉ kpata taa yɨ ndʉtʉ, tananakɨa yɛɛ ɓɨɓɨ ngia yakʉʉngwa akʉ mapanʉ, yi꞉nye kʉkyɨa kuu amati ʉndɛsʉ nʉ nisu kutito akʉ ingyo. 6Ɨkyɛmɨngana, ɨtakɨ‑takɨ ngiakɛ ka tiga ɓuɓununikie akʉ mapanʉ ngikʉnanɨ, jʉ ka꞉wo akʉ lɨngbaa lʉ moni ngila li꞉nye tɨsangaka. Kʉ ɓwanɨ, ka꞊kwanana tiga kʉkyananakɨa Asʉɓɨɨ nɨngbaa yɛmɔ nʉ angu wʉ 'Ʉtʉma wɔɔ Tu, chʉkɔmʉ tii ndʉ aka ki꞉nye kyɨa‑ɔɔ pɛɛ ati ngia ki꞉nye‑ɔɔ kʉkpata moni ngika ɓa꞉tɨndakɨa amati ʉ mapanʉ.

Kuu ngia yɨ ʉpanʉ

7Tiga nanɨ, kasigo tiga ɓata tanɨ? Ajʉ mapanʉ ka ɓʉɓɨɓɨ ɓiɛ? Chʉkɔɔ, yambʉkɔmʉ ɓwanɨ gʉkʉ ɗɛkɛkɛ. Jʉ yambikinye tʉkʉ mapanʉ, ambʉ́ ma꞉mbɨakɔmʉ ɓɔ ɓʉɓɨɓɨ ɓa ɨmanɨ. Nʉ ambʉ mambɨakɔmʉ ɓɔ tananakɨa yɛɛ ɓɨɓɨ ya ɨmanɨ, ambʉ́ ndʉ mapanʉ ka꞉gbʉmakɔmʉ ɓɔ: « Wɔɔtananɨakɔmʉ ɨkyɛmɛ. »#Popoko Kʉɓ 20:17; Tung 5:21 8Kʉ ɓwanɨ, ya aka ekoo ʉ mapanʉ iya ɓʉɓɨɓɨ ɓa꞉nyɨa‑ɔɔ nɨngbaa kʉjʉkaniso mɨgbʉ yɨ taa yɛɛ ɓɨɓɨ amati asɛmɛ. Jʉ mapanʉ kambikinye piɛ, ambʉ́ ɓʉɓɨɓɨ ɓa ndʉ mʉnda.

9Jɛnɛ pɛɛ, mi꞉nye kʉkʉʉ chʉkɔmʉ kʉmbɨa mapanʉ, ɨkyɛmɨngana ati ngia ʉpanʉ wa꞉ɓʉa tiga‑ɔɔ, ɓʉɓɨɓɨ ɓambufaniso kyɨa kuu kʉtɔ, 10ɛmɛ mambuwo. Kʉ ɓwanɨ, ʉpanʉ ngua wa꞉kwanana nɛmɛ kunzo ʉɓɨɨ, wa꞉nanzo tiga ingyo. 11Jʉ aka ekoo ʉ ʉpanʉ nguʉnanɨ, ɓʉɓɨɓɨ ɓa꞉nyɨa tiga nɨngbaa nɛmɛ kʉpɨtaka, nʉ nɛmɛ kʉwa.

12Kʉ ɓwanɨ, ʉpanʉ nguʉnanɨ wa tu, nʉ ʉpanʉ wɔɔ titie wa kʉ tu, ngbingbii nʉ uɗo.

13Kʉ ɓwanɨ, ajʉ yakusigo ɓɔ ɨkyɛmɛ ngia yɛɛ iɗo kʉ ya꞉nziso ingyo ngiisɛmɛ ɓiɛ? Chʉkɔɔ, yambʉkɔmʉ ɓwanɨ gʉkʉ ɗɛkɛkɛ! Tʉkʉ ɓʉɓɨɓɨ iɓa ɓa꞉nanziso ingyo. Ɨkyɛmɨngana, aka ekoo ngia ɓɔ ɓʉɓɨɓɨ ɓʉpananɨa ɓɔ ɓa ɓɨɓɨ kingono, ɓa꞉ɓaa ɨngbaa akʉ ɨkyɛmɛ ngia yɛɛ iɗo nɛmɛ kuwisiso. Kʉ ɓwanɨ, ɨngbaa akʉ ʉpanʉ wɔɔ titie nguʉnanɨ ɓʉɓɨɓɨ ɓa꞉ka tiga ɓaja kʉɓaana.

Ɓʉɓɨɓɨ ɓaamana nʉ ɓuɗo amati ʉ 'ʉtʉma wʉ mombi

14Kakʉmbɨa ɓɔ ʉpanʉ waakanga moni kʉ 'ʉtʉma, ɨkyɛmɨngana, ɛmɛ ma tʉkʉ mombi ngia wʉ ndʉtʉ yɨ ɨtaka jʉ ɓa꞉nagaba ngbanga ndʉ bayo ʉ ɓʉɓɨɓɨ. 15Kingono, mambʉkɔmʉ kupimiso ɨkyɛmɛ ngia makʉkyɨa engo. Jʉ ɨkyɛmɛ ngia makʉkʉnda kʉkyɨa, mambʉkɔmʉ kʉkyɨa engo. Ɨkyɛmɨngana, ɨkyɛmɛ ngia maayaa, ɛyɔ tiga iya makʉkyɨa engo. 16Ndʉ yaɓio ɓɔ makʉkyɨa ɨkyɛmɛ ngia mambakakʉnda, yakusigo ɓɔ makʉbaya ɓɔ ʉpanʉ wa uɗo. 17Kʉ ɓwanɨ, chʉkɔmʉ ɛmɛ kʉ makʉkyɨa engo, ɨkyɛmɨngana tʉkʉ ɓʉɓɨɓɨ ngiɓa ɓa amati asɛmɛ ɓakʉkyɨa engo. 18Jʉ makʉmbɨa iɗo ɓɔ yambʉkɔmʉ nʉ ɨkyɛmɛ yɛɛ iɗo amati asɛmɛ gʉkʉ mɨngana, iya yakusigo ɓɔ amati ndʉtʉ ngiisɛmɛ. Tɔ, taa yɛɛ kyɨɛ moni kɔɔ muɗo ya amati asɛmɛ, ɨkyɛmɨngana ya ɓʉkaɨ ɛmɛ kʉkyɨa engo. 19Jʉ moni kɔɔ muɗo ngika makʉkʉnda kʉkyɨa engo, mambʉkɔmʉ nakɔ kʉkyɨa. Ɨkyɛmɨngana, ɓʉɓɨɓɨ ngiɓa mambʉkɔmʉ kʉkʉnda kʉkyɨa engo, ɨɓɔ iɓa ma tiga naɓɔ kʉkyɨa. 20Kʉ ɓwanɨ, ndʉ maɓio kʉkyɨa moni ngika mambʉkɔmʉ kʉkʉnda kʉkyɨa engo, yakusigo ɓɔ chʉkɔmʉ ɛmɛ kʉ makʉkyɨa engo, ɨkyɛmɨngana ya tʉkʉ ɓʉɓɨɓɨ ngiɓa ɓa amati asɛmɛ.

21Kʉ ɓwanɨ, ma꞉pimiso pongo ʉpanʉ nguʉnanɨ wa amati asɛmɛ. Ndʉ maasigo ɓɔ mʉkyɨa moni kɔɔ muɗo, tʉkʉ ɓʉɓɨɓɨ ɓatɨnganɨa mamɓʉɓʉkyɨa. 22Ɨkyɛmɨngana, amati ʉ 'ʉtʉma nguʉsɛmɛ ʉpanʉ ngua wʉ Asʉɓɨɨ waanakataa kataa. 23Ɨkyɛmɨngana, makʉna amati asɛmɛ ʉpanʉ nga wɔmɔ uwa wakʉɓɨndana nʉ ʉpanʉ ngua 'ʉtʉma nguʉsɛmɛ waakʉnda. Nʉ yanɛmɛ kʉsɨa kuɓio bayo ʉ ʉpanʉ wʉ ɓʉɓɨɓɨ ngua wakʉkyɨa kuu amati asɛmɛ. 24Ikoko nɛmɛ! Anɨ iya a꞊kwanana nɛmɛ kʉɓwanakiso kʉʉngwa akʉ ndʉtʉ ngiakɛ ya nɛmɛ kutito akʉ ingyo? 25Ɨbɨba akʉ Asʉɓɨɨ 'upi akʉ Makʉʉndɛsʉ Yeso Klisito!

Kʉ ɓwanɨ, makʉkyananakɨa ʉpanʉ wʉ Asʉɓɨɨ nʉ mbɨmbanaka ngiisɛmɛ, ɨkyɛmɨngana aka ekoo ʉ ndʉtʉ ngiisɛmɛ yɛɛ bata bata, ma tii tʉkʉ bayo wʉ ʉpanʉ wʉ ɓʉɓɨɓɨ.

Currently Selected:

Ɓalɔma 7: BudKoya

Highlight

Copy