Kyananaka 22
22
1Ambusigo ɓɔ: « Inu ɓatidoo, nʉ inu ɓayoo Ɓayuda, keni moni ngika maninu kutisio ekoo ʉ moni ngikakɛ kʉbɨana dyaa. » 2Ati ngia ɓa꞉kɔ‑ɔɔ ɓɔ Pɔlɔ anaɓɔ kʉyakɨa nʉ ʉɗaɗa wʉ Ɓaɨbalanɨa, ɓambʉkata tii tʉkʉ ɓʉ nyɛ, kija a꞉ɓusigio ɓɔ: 3« Ɛmɛ ma 'Uyuda, nʉ ma꞉nʉtanɨa anʉ Talasɔ amati ʉ gɨpa ʉ Kilikia. Ɨkyɛmɨngana, ɓa꞉nahuo tʉkʉ anʉ Yelusalɛma aka, nʉ Gamalɨɛlɛ a꞉napanɨa kʉkpata ʉpanʉ wʉ ɓakuku kingono. Mi꞉nye kpata moni kʉ Asʉɓɨɨ nʉ kɛkɛɛ, ngbanga kʉndʉ inu kʉ ɓuɓomu nakʉkpata engo ɓʉɓʉnɨ ngia.#22:3 Gʉ ɓɔ, Gamalɨɛlɛ i꞉nye mʉpananakɨa wɔɔ ʉja wʉ mapanʉ ngika kʉ Mʉsa.
4Ma꞉kyananaka ɓombi ngiɓa ɓi꞉nye kʉkpata Ɨngbaa yɨ Makʉʉɓɨɨ kʉɓʉya tʉkʉ aka mi꞉nye ɓʉwa‑ɔɔ tʉkʉ esinini. Mi꞉nye titio ɓɔ ɓʉsanga ɓugue nʉ ɓoi, nʉ naɓɔ kugiso akʉ ɨkáa yɨ boloko. 5Ɓatɛmʉ ɓʉsɛmɛ tʉkʉ kumu‑kumu ngia ɔɔ 'ʉja nʉ basa ʉ ɓʉkʉʉ kʉ 'ubomu. Ɛɓɔ ɓa꞉nanzo mabalʉa ngika kʉ ɓayoo Ɓayuda ngiɓa ɓa anʉ Damaseki. Kija ma꞉sa akʉ gʉlʉ ngiinanɨ kʉsanga ɓayoo amati ʉ baya, kʉka naɓɔ anʉ Yelusalɛma aka ekoo ngia ɓɔ ɓuɓudyiso ɓʉka‑ɓʉkaɨ. »
Pɔlɔ ʉngaka moni ekoo ʉ nicho 'ʉtʉma nguangɔ
6« Ɓisi mʉngana tiga nʉ 'usoti, ɛmɛ tii tʉkʉ nɨngbaa, tinene nʉ Damaseki, ma꞉jʉkanɨa tʉkʉ wanga kʉjɨa kʉʉngwa ekoo ʉ ɓisi wʉnakungueni tʉkʉ ɓʉ kuu. 7Kija ma꞉kwa akɛsɨ, mambʉkɔ iyo mɨngana nɛmɛ kusigio ɓɔ: ‹ Saulo, Saulo, wanɛmɛ kʉkyananaka akʉ moni kɨmanɨ? › 8Kija ma꞉ɓukuo ɓɔ: ‹ Makʉʉɓɨɨ, ɔwɛ wa‑zʉ anɨ? › Iyo ngiinanɨ yambutisio ɓɔ: ‹ Ɛmɛ ma Yeso ngia wʉ Najalɛtɛ iya wanayɔ kʉkyananaka. › 9Ɓombi ngiɓa ki꞉nye naɓɔ ɓambʉna wanga nguʉnanɨ kʉtaa, ɨkyɛmɨngana chʉkɔmʉ ɓambʉkɔ iyo yɨ mombi ngia i꞉nye nɛmɛ kʉyakɨa. 10Kija ma꞉ɓukuo ɓɔ: ‹ Makʉʉɓɨɨ, mʉkwanana tɔ tiga kʉkyɨa tanɨ? › Makʉʉɓɨɨ ambʉnasigio ɓɔ: ‹ Ʉngwa ɨkʉʉ, wambʉsa anʉ Damaseki akʉ ɓabinasigio‑ɛɛ moni kʉ muɓomu ngika Asʉɓɨɨ a꞉tambanaka ɓɔ kyɨa. › 11Tiga ndʉ wanga wɔɔ nzɛkpɛ nzɛkpɛ nguʉnanɨ wi꞉nye wunakuteni mesu, kija ɓombi ngiɓa ki꞉nye naɓɔ ɓa꞉naɓoto ɨkɔndɔ nɛmɛ kuɓuiso anʉ Damaseki.
12Nanɨ yi꞉nye nʉ mombi mʉngana ino ɓɔ Anania iya i꞉nye mombi ɔɔ ngbingbii apɛɛ ʉ Asʉɓɨɨ, nʉ i꞉nye kpata ʉpanʉ ngua wʉ Mʉsa kingono. Ɓayuda kʉ ɓuɓomu ngiɓa ɓʉ Damaseki ɓi꞉nye mʉchwa uduɓa uɗo. 13Mombi ngiinanɨ ambʉka nɛmɛ kʉgbʉka, ambʉmaa anambamba asɛmɛ ambʉnasigio ɓɔ: ‹ Saulo, ayoo asɛmɛ, faniso kʉna kʉtɔ! › Tʉkʉ nɨma ngiinanɨ mesu kambʉnagananɨa, mambufaniso nayɔ kʉna. 14Kija Anania a꞉nasigio ɓɔ: ‹ Asʉɓɨɨ ngia wʉ ɓakuku ngiɓʉndɛsʉ a꞉nachwa jɛnɛ ɔwɛ tʉkʉ pɛɛ aka ekoo ngia ɓɔ pimiso ɓʉkʉnda ngiɓangɔ. Wambʉna mombi ngia ɔɔ ngbingbii, wambʉkɔ tʉkʉ iyo ngiangɔ makʉɔngɔ. 15Jʉ ɔwɛ waɓio tɛmʉ ngiangɔ kʉɓɨakɨa ɓombi kʉ ɓuɓomu moni ngika wa꞉na bɛ nʉ ika wa꞉kɔ bɛ. 16Tiga ɨtakɨ‑takɨ ngiakɛ, wa ɓata kusiɓo ɨmanɨ? Ʉngwa ɨkʉʉ ɓunaɓatiso wambʉjaɓanakɨa nʉ ɓʉɓɨɓɨ ngiɓʉsɔɔ, ɨngbaa kʉnɨchwa ino ngiangɔ. › »
Makʉʉɓɨɨ usoko Pɔlɔ kʉsa ati ʉ ɓombi ngiɓa ɓambʉkɔmʉ Ɓayuda
17« Iya ma꞉tʉa anʉ Yelusalɛma, ati ngia mi꞉nye‑ɔɔ kʉta akʉ ɨkáa yɨ Asʉɓɨɨ, mambʉna ɨkyɛmɛ mɨngana ndʉ ʉtakanaka. 18Ma꞉na Makʉʉɓɨɨ ambʉnasigio ɓɔ: ‹ Ʉngwa gagaa anʉ Yelusalɛma aka, jʉ ɓombi ɓambʉkɔmʉ kʉbaya ɨsaʉ ngia wakʉɓɨakɨa akʉ ɓɨngono ekoo asɛmɛ. › 19Kija ɛmɛ ma꞉matɨa tiga ɓɔ: ‹ Makʉʉɓɨɨ, ɛɓɔ ɓakʉmbɨa iɗo ɓɔ ɛmɛ iya mi꞉nye sa akʉ lɨkáa lʉ nɨta ngila lʉ Ɓayuda kʉnga ɓombi ngiɓa ɓa꞉nabaya ɔwɛ akʉ boloko nʉ naɓɔ kuɓindiso. 20Nʉ ɓata ati ngia ɓa꞉wa‑ɔɔ Sɨtɨfana, jʉ i꞉nye tɛmʉ wʉ Ɨsaʉ yɛɛ Iɗo ngiisɔɔ, ɛmɛ mi꞉nye kʉ ananɨ nʉ mambʉmʉdʉɨa litindi ɓɔ uwo‑zʉ iɗo. Kʉ ɛmɛ iya ma꞉ɓoto lɨpʉkʉ ngila lʉ ɓombi ngiɓa ɓa꞉mʉwa. › 21Kija ɛyɔ Makʉʉɓɨɨ a꞉nasigio ɓɔ: ‹ Sa, ma꞊natʉma danga akʉ mababa kʉ ɓombi nga kɔmɔ ka‑ɛɛ. › »
Pɔlɔ ʉbandana ɓɔ a 'Ʉlɔma
22Ati ngiinanɨ ungbutu wʉ ɓombi winye‑zʉ tʉkʉ kutikio Pɔlɔ kʉɓʉya tʉkʉ aka asigo‑ɔɔ moni ngikʉnanɨ, kija ɓa꞉faniso nachokoo ɓɔ: « Mungwiseni! Mʉweni waa! Ʉkwananakɔmʉ aɓio kʉkʉʉ. » 23Ɓi꞉nye tii tʉkʉ kʉnachokoo nʉ giso lɨpʉkʉ lʉ vɛvʉ ngilʉndaɓʉ ekoo, nʉ kinyiso aɓungu ekoo.#22:23 Gʉ ɓɔ, ɨkyananakɨa ngiinanɨ yakʉpananiso ʉnganga. 24Ngama ʉ ɓasʉda ambunzo ʉpanʉ ɓɔ ɓusingo Pɔlɔ amati ʉ aga ʉ ɓasʉda, ɓʉmʉɓɛnda fimbo ambʉ ʉngaka inyi yɨ moni ngika ɓombi ɓa‑ɔɔ nayɔ kʉjʉmɨa. 25Ɨkyɛmɨngana, ati ngia ɓa꞉mʉsanga‑ɔɔ nʉ miki ɓɔ ɓʉmʉɓɛnda fimbo, Pɔlɔ ambuɓukuo ngama ʉ ɓasʉda mʉngana ngia i꞉nye 'ʉmaɨ nanɨ ɓɔ: « Ajʉ ʉpanʉ wakutitio ɓɔ ɓʉɓɛnda mwana ʉ ɨkʉmbʉ 'Ʉlɔma fimbo ɓambʉtɨnenikɔmʉ 'ʉkɔmbɔ nguangɔ ɓiɛ? »
26Iya sʉda ngiinanɨ a꞉kɔ moni ngikʉnanɨ, ambʉsa kʉngakɨa ngama ʉndaɓʉ ɔɔ 'ʉja wʉ ɓasʉda ɓɔ: « Wa‑zʉ kʉkʉnda kyɨa tanɨ? Mombi ngia a tʉkʉ mwana ʉ ɨkʉmbʉ 'Ʉlɔma! » 27Kija ngama ʉ ɓasʉda a꞉ɗʉana anambamba ʉ Pɔlɔ, ambumuɓukuo ɓɔ: « Naɓɨa‑zʉ ɓɔ ajʉ wa mwana ʉ ɨkʉmbʉ 'Ʉlɔma ɓiɛ? » Pɔlɔ ambumutisio ɓɔ: « Oo, ma mwana ʉ ɨkʉmbʉ 'Ʉlɔma. » 28Ngama ʉ ɓasʉda ambumusigio ɓɔ: « Ɛmɛ ma꞉nzo falanga 'ʉja kʉnɨtanaka mwana ʉ ɨkʉmbʉ 'Ʉlɔma. » Kija Pɔlɔ a꞉musigio ɓɔ: « Ɨkyɛmɨngana, ɛmɛ ma mwana ʉ ɨkʉmbʉ 'Ʉlɔma akʉ nʉtanɨa. » 29Tʉkʉ nɨma ngiinanɨ ɓombi ngiɓa ɓi꞉nye kʉhata nayɔ kʉɓɛnda fimbo, ɓambʉnanzana. Abana tʉkʉ ngama ʉ ɓasʉda ngiinanɨ ambʉkwa kʉ ʉɓa ati ngia a꞉mbɨa‑ɔɔ ɓɔ Pɔlɔ a mwana ʉ ɨkʉmbʉ 'Ʉlɔma jʉ i꞉nye ɓɔ utitieni ɓɔ ɓʉmʉsanga nʉ likpenze.
Pɔlɔ ʉmaa apɛɛ ʉ basa ʉ 'ʉkɔmbɔ wʉ Ɓayuda
30Tiga kʉɓa ɔngɔ, ngama ʉ ɓasʉda i꞉nye kʉkʉnda kʉmbɨa kingono ɓɔ Ɓayuda ɓʉnapɨa‑zʉ Pɔlɔ nʉ 'ʉkɔmbɔ jʉtanɨ. Ambutitio ɓɔ ɓumuɓonoko likpenze, ambusoko ɓangama ɓʉ ɓakumu‑kumu nʉ Ubua wɔɔ ʉja wʉ ɓakumu‑kumu kuwulio ubua. Kija a꞉ka nʉ Pɔlɔ ambumumaiso ati ʉndaɓʉ.
Currently Selected:
Kyananaka 22: BudKoya
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
