Kyananaka 21
21
Pɔlɔ ʉsa anʉ Yelusalɛma
1Iya ka꞉sɨana naɓɔ, kambuɗito masʉa wʉ mepo, kambʉsa anʉ Kosi chʉkɔmʉ nʉ maa nɨngbaa. Kʉɓa ɔngɔ, kambʉɓʉya anʉ Lɔda. Kambʉʉngwa nanɨ, kambʉsa anʉ Patala. 2Tiga nanɨ ka꞉gbʉka masʉa wʉ mepo mungono winyeni kʉtapʉa nʉ wagba wʉ Foenikɛ, kija ka꞉ɗito kambʉsa. 3Isu tiga kʉna oji wʉ Kipulio kʉtaa, kambʉzʉngʉa tiga nʉ wagba wʉ ɨkɔndɔ yɨ moiɔngɔ. Kija ka꞉yumo ɨngbaa kʉsa akʉ gɨpa ʉ Silia, kambʉɓʉya anʉ Tilo akʉ izi ngia masʉa wʉ mepo wi꞉nye‑ɔɔ kʉsa kijiso kumbo. 4Ka꞉kyɨa nanɨ bɛlɛsɛ mʉngana ɨzɔ nʉ ɓakpataka ngiɓa ka꞉ɓʉgbʉka naa. Ɨngbaa akʉ 'Ʉtʉma wɔɔ Tu, ɓombi ngiɓʉnanɨ ɓambusigio Pɔlɔ ɓɔ ɔɔsakɔmʉ anʉ Yelusalɛma. 5Tiga ndʉ bɛlɛsɛ ngiinanɨ a꞉sio, kambʉʉngwɨa kɨnda. Ɓakpataka ngiɓʉnanɨ nʉ ɓoi, nʉ ɓana, ɛɓɔ kʉ ɓuɓomu, ɓambʉtɨnapɨa aɓei ʉ gʉlʉ. Kambʉgbʉkʉmɨa nʉ muwuu anambamba ʉ ɗei, kambʉta Asʉɓɨɨ. 6Iya ka꞉nzono lɨkɔndɔ, kambuɗito masʉa wʉ mepo, ɛɓɔ ɓambʉtʉa kʉ andei.
7Kija ka꞉ʉngwa anʉ Tilo kambʉsa kʉfʉma anʉ Tolemai. Kɨnda ngiindɛsʉ akʉ masʉa wʉ mepo ya꞉sa kʉpa tiga naa. Tiga nanɨ, kambʉnana nʉ ɓombi ɓʉ baya, kambʉkwaa ɨzɔ naɓɔ ɓisi mʉngana. 8Kʉɓa ɔngɔ, kambʉʉngwɨa kɨnda, kambʉɓʉya anʉ Kaisalia. Nanɨ kambukumunio ɔɔ Filipo, mʉpananakɨa wʉ Ɨsaʉ yɛɛ Iɗo, kambʉkwaa nandɔngɔ. Ɛyɔ i꞉nye kʉ mʉngana ʉ ɓadiakɛlɛ ʉmalɨanɨka ngiɓa ɓa꞉ɓʉchwa anʉ Yelusalɛma. 9Gue ngiinanɨ i꞉nye nʉ ɓana ɓʉgɨna ɓɔɔ ɓoi ɓaunabi ɓɔngɔ, iɓa ɓi꞉nye kwa ɨgbɛ kʉngaka moni kʉʉngwa ɔɔ Asʉɓɨɨ.
10Ka꞉kyɨa nanɨ makwaa maja. Ati ngia ki꞉nye‑ɔɔ nanɨ, ɨgbɛ mɨngana ino ɓɔ Agabɔ, a꞉ʉngwa anʉ Yudɛa ambʉka nanɨ. 11A꞉ɓwanɨa ati ʉndɛsʉ, ambʉchɨka 'ʉkaɓa ngua wʉ Pɔlɔ ambʉsangana nawɔ mɨtɨndɨ nʉ lɨkɔndɔ. Kija a꞉sigo ɓɔ: « Uneni moni ngika 'Ʉtʉma wɔɔ Tu wusigoo. Ɓayuda ɓa꞊sanga ɓisi makʉʉ ʉ umiki nguakɛ anʉ Yelusalɛma tʉkʉ ndʉ akʉ mʉsangana‑ɔɔ aka. Kija ɓa꞊mʉgaba akʉ lɨkɔndɔ lʉ ɓombi ngiɓa ɓambʉkɔmʉ Ɓayuda. »
12Iya ka꞉kɔ nayɔ moni ngikʉnanɨ, isu nʉ ɓayoo ɓʉ gʉlʉ ʉ Kaisalia, kambukikilikio Pɔlɔ ɓɔ ɔɔsa ɓaka anʉ Yelusalɛma. 13Ɨkyɛmɨngana, Pɔlɔ ambutisio ɓɔ: « Jʉtanɨ nakʉndɨa nʉ kʉhata nɛmɛ kukwiso ʉɓa? Ndʉ yaɓio nɨfa yɨsɛmɛ kʉndʉ ingyo anʉ Yelusalɛma aka ekoo ʉ ino yɨ Makʉʉɓɨɨ Yeso, ɛmɛ ma tʉkʉ ʉndanɛ. » 14Ndʉ a꞉kʉndakɔmʉ kʉkɔ moni nga kʉndɛsʉ, kambusigo tiga akʉ upipio ɓɔ: « Ɓʉkʉnda ɓʉ Makʉʉɓɨɨ ɓʉkyɨanɨa! »
15Mbise ʉ makwaa ɗɛkɛkɛ ngika ka꞉kwaa anʉ Kaɨsalia, kambʉtambanakɨa kɨnda kʉsa anʉ Yelusalɛma. 16Ɓakpataka ngana ngana ngiɓa ɓa꞉ʉngwa anʉ Kaisalia ɓambʉsa nisu kʉnapɨa nanɨ, ɓambutiɓuiso ɔɔ Manasɔnɨ akʉ izi ngia ki꞉nye‑ɔɔ kʉsa kʉkwaa. Ɛyɔ i꞉nye mombi ʉ Kipulio nʉ 'ʉkpataka wʉ jɛnɛ.
Ɔɔ Pɔlɔ ɓʉsa kujunikio nʉ Yakɔbɔ anʉ Yelusalema
17Iya ka꞉ɓʉya anʉ Yelusalɛma, ɓombi ɓʉ baya ɓambʉtɨjananɨa nʉ ɨgyagya. 18Kʉɓa ɔngɔ, kambʉsa ɨzɔ nʉ ɔɔ Pɔlɔ nʉ Yakɔbɔ akʉ ɓʉkʉʉ ɓʉ kanisa kʉ ɓuɓomu ɓi꞉nye‑ɛɛ ɓʉmʉmanɨɛ. 19Pɔlɔ ambuɓunzo lɨkɔndɔ, ambufaniso naɓɔ ngakɨa moni kʉ muɓomu kʉ tine tine ika Asʉɓɨɨ a꞉kyɨa 'upi akʉ kuu ngiangɔ ekoo ʉ ɓombi ɓʉ baya ngiɓa ɓambikinye Ɓayuda. 20Iya ɓa꞉kɔ moni ngikʉnanɨ, ɓambubibiso Asʉɓɨɨ. Kija ɓa꞉musigio ɓɔ: « Ayoo, ʉna‑zʉ akʉ Ɓayuda ɓaja nadɨndɨ ɓa꞉baya bɛ‑ɛɛ Yeso, nʉ ɓakʉkpata mapanʉ kʉ Mʉsa nʉ kɛkɛɛ. 21Ʉna tɔ, ɓa꞉ɓʉɓɨa bɛ ɓɔ wakʉpanɨa Ɓayuda ngiɓa ɓa ati ʉ mababa kʉ ɓombi nga kɔmɔ ɓɔ ɓɔɔkyananakɨakɔmʉ mapanʉ ngika Mʉsa a꞉tɨndakɨa. Nʉ ɓɔɔtɨnakɔmʉ ɓana ngiɓʉndaɓʉ ganza, nʉ ɓɔɔkpatakɔmʉ ɓata ɨkyananakɨa ngia yɨ Ɓayuda. 22Ka꞊kyɨa tiga aka tanɨ? Jʉ ɓa꞊kɔ tʉkʉ kɔnɨ ɓɔ wʉka‑kaa. 23Kʉ ɓwanɨ, kyɨa tʉkʉ ndʉ akʉ ka‑ɔɔ nɔwɛ kʉngakɨa. Ka aka nʉ ɓombi ɓʉgɨna iɓa ɓa꞉nzo agɔmɔ akʉ Asʉɓɨɨ. 24Sa ɨzɔ naɓɔ, wambukumunio ɨzɔ naɓɔ nʉ jaɓanakɨa amati ʉ ɨkáa yɨ Asʉɓɨɨ, wambunzo ɓata kumbo, ambʉ ɓʉsa kuhoiso ndii. Kʉ ɓwanɨ, ɓombi kʉ ɓuɓomu ɓʉkwanana kʉmbɨa ɓɔ moni ngika ɓi꞉nye bɛ kʉyaka ekoo asɔɔ kambʉkɔmʉ kingono. Nʉ ɓa꞊na ɓɔ abana gɔ ɔwɛ wa kʉ kʉkyananakɨa mapanʉ ngika Mʉsa a꞉tɨndakɨa. 25Tiga ɓombi nga ɓɔmɔ iɓa ɓa꞉baya Yeso ɓambikinye Ɓayuda, ka꞉ɓʉngakɨa bɛ amati ʉ ʉbalʉa lɨngbaa lʉ moni ngika ka꞉maiso. Ka꞉sigo pongo ɓɔ ɓɔɔdyakɔmʉ anzɨɓɔ ʉ ɓanama ngia ɓaanzo ndʉ apɛpɛ akʉ ɓamʉngʉ ɓʉ yakanaka, ɓɔɔdyakɔmʉ miniki kʉ nama ngia ɓaamʉwa ɓʉmʉtɨnenikɔmʉ ɨmɨɔ, nʉ ɓɔɔkyɨakɔmʉ ɨndambʉ. »
26Kija kʉɓa ɔngɔ, Pɔlɔ a꞉chɨka ɓombi ɓʉgɨna ngiɓʉnanɨ ɓambʉsa ɨzɔ naɓɔ kʉjaɓanakɨa. Mbise ɔngɔ ambukumunio amati ʉ aga wʉ ɨkáa yɨ Asʉɓɨɨ kumbiiso wati ngua jaɓanakɨa ya꞉sio‑ɔɔ nʉ iya ɓa꞉nzo‑ɔɔ apɛpɛ ekoo ʉ mombi kʉ nangana nangana ati ʉ ndaɓʉ.
Ɓʉfa Pɔlɔ amati ʉ ɨkáa yɨ Asʉɓɨɨ
27Iya makwaa ʉmalɨanɨka ngikʉnanɨ ki꞉nye tiga tinene kʉndana, Ɓayuda ngiɓa ɓi꞉nye ɓukeni akʉ gɨpa ʉ Azia ɓambʉna Pɔlɔ amati ʉ ɨkáa yɨ Asʉɓɨɨ. Ɓambufaniso pʉpɨa moni ati ʉ ungbutu wʉ ɓombi kʉ uɓomu, kija ɓa꞉mʉfa. 28Ɓambufaniso nachokoo kusigo ɓɔ: « Inu Ɓaɨsalaɛlɛ tɨsalɨeni salɨaa! Mombi ngiakɛ akʉpanɨa ɓombi kʉ ɓuɓomu nʉ akʉ mʉa kʉ uɓomu mapanʉ ngika kakʉtambiso Ɓaɨsalaɛlɛ, nʉ mapanʉ ngika kʉ Mʉsa, nʉ ɨkáa yɨ Asʉɓɨɨ ngia. Nʉ ɓata, ɨtakɨ‑takɨ ngia ukumuniso tiga ɓombi ngiɓa ɓambʉkɔmʉ Ɓayuda amati ʉ ɨkáa yɨ Asʉɓɨɨ kʉ kumunisoo, kʉtambiso mʉa wɔɔ tu ngua. » 29Ɓa꞉yaka moni ngikʉnanɨ jʉ ɓa꞉na Tolofimo ngia a꞉ʉngwa anʉ Ɛfɛsɔ ɛɓɔ nʉ Pɔlɔ amati ʉ gʉlʉ, nʉ ɓi꞉nye kuyo ɓɔ Pɔlɔ ʉ꞉musingo amati ʉ ɨkáa yɨ Asʉɓɨɨ.
30Kija gʉlʉ kʉ uɓomu a꞉maa ɓʉ nzataa nʉ ɓombi kʉɓʉa magba kʉ muɓomu, ɓambʉfa Pɔlɔ, ɓambumuɗuɗuo aɓei ʉ ɨkáa yɨ Asʉɓɨɨ, kija ɓa꞉kuto mimongu yɛngɔ. 31Ati ngia ɓi꞉nye kʉhata nayɔ kʉwa, ɨsaʉ yambʉɓʉya ɔɔ ngama ʉ imbi yɨ ɓasʉda kusigo ɓɔ moni kʉtambɨa anʉ Yelusalɛma kʉ uɓomu tambɨa. 32Kʉ nɨma ngiinanɨ, ambʉchɨka ɓangama ɓʉ ɓasʉda ngiɓa ɓi꞉nye ɛsɨ angɔ, ɨzɔ nʉ ɓasʉda ɓambʉsa ɓangʉ akʉ ndiba ʉ ɓombi inye‑ɛɛ. Iya ɓa꞉na ngama ʉ ɓasʉda ɨzɔ nʉ ɓasʉda, ɓambʉsɨa ɓɛnda Pɔlɔ. 33Kija ngama ʉ ɓasʉda a꞉ɗʉana tinene nʉ Pɔlɔ, ambʉmʉfa, ambutitio ɓɔ ɓʉmʉsanga nʉ ɓaselegeni ɓapɨnɨ. Kija a꞉ɓuɓukuo ɓɔ Pɔlɔ a‑zʉ anɨ nʉ ʉkyɨa ɨmanɨ. 34Ɨkyɛmɨngana, ɓombi ngana ngana amati ʉ ungbutu wʉ ɓombi ɓi꞉nye kʉtʉɓɨa moni. Gwa nga ʉtʉɓɨa kʉ moni nga kangɔ, iya wɔmɔ kʉ moni nga kangɔ. Jʉ ngama ʉ ɓasʉda a꞉mbɨakɔmʉ ɓɔ moni tɨmanɨ ɨkʉnanɨ ki꞉nye kʉkyɨanɨa, ika ka꞉gbʉnganiso gbongbo ngiinanɨ. Kija a꞉titio ɓɔ ɓʉsa nʉ Pɔlɔ akʉ izi ngia ɓasʉda ɓaakyɨa‑ɛɛ. 35Iya Pɔlɔ a꞉ɓʉya nayɔ akʉ mʉa ngua ɓi꞉nye ndakaka‑ɔɔ ɓʉ ga ga ga kuɗito ekoo, kija ɓasʉda ɓa꞉mufuɓuo tii tʉkʉ ɓʉ tisi, jʉ ungbutu wʉ ɓombi wi꞉nye wʉchakanakeni chakanakaa. 36Jʉ ungbutu wʉ ɓombi wɔɔ 'ʉja wi꞉nye nayɔ kʉkpata nʉ kʉtʉɓɨa ɓɔ: « Mʉweni wanɨ! »
Pɔlɔ ʉyaka moni apɛɛ ʉ ungbutu wʉ Ɓayuda
37Ati ngia ɓi꞉nye tiga‑ɔɔ nayɔ kusingo akʉ izi ngia ɓasʉda ɓi꞉nye‑ɛɛ, Pɔlɔ ambʉta ngama ʉ ɓasʉda ngiinanɨ kusigo ɓɔ: « Ajʉ wa꞊kwanana nɛmɛ kʉsɨa wati nɔwɛ kʉngakɨa moni ɓiɛ? » Kija ngama ʉ ɓasʉda ngiinanɨ a꞉ɓukuo Pɔlɔ ɓɔ: « Ajʉ waayo Igiliki yoni ɓiɛ? 38Chʉkɔmʉ‑zʉ ɔwɛ 'Umisili ngua wa꞉titio pongo ɓombi ɓɔ ɓʉchakanaka, wambʉkɨndakiso pongo ɓombi ɓʉ ɗite ɛlɛfʉ ɓʉgɨna akʉ ɨza ɓiɛ? » 39Pɔlɔ ambumutisio ɓɔ: « Ɛmɛ ma 'Uyuda, ma꞉nʉtanɨa akʉ gʉlʉ ʉ Talasɔ amati ʉ gɨpa ʉ Kilikia. Ma mwana ʉ ɨkʉmbʉ wʉ gʉlʉ ɔɔ mbɨanɨɛ. Mʉ꞉nata ɓaka ɓɔ nasɨa‑zʉ mʉyakanaka nʉ ɓombi ngiɓa. » 40Ngama ʉ ɓasʉda ngiinanɨ ambʉmʉsɨa wati ɓɔ ʉyakanaka naɓɔ. Pɔlɔ ambʉmaa ekoo ʉ mʉa ngua ɓi꞉nye ndakaka‑ɔɔ ɓʉ ga ga ga kukumunio akʉ izi ngia ɓasʉda ɓi꞉nye‑ɛɛ, ambʉɓʉgbʉma nʉ ɨkɔndɔ ɓɔ ɓʉkata‑zʉ. Iya ɓombi ɓa꞉kata nayɔ, kija a꞉ɓʉngakɨa moni nʉ ʉɗaɗa wʉ Ɓaɨbalanɨa.
Currently Selected:
Kyananaka 21: BudKoya
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc.
