1 Ɓakolito 5

Ɨkyananakɨa yɛɛ ɓɨɓɨ amati ʉ kanisa

1Ɨsaʉ yakʉnadaa mʉa kʉ uɓomu ɓɔ ɨndambʉ ya ati ʉndɛnʉ. Ɓakusigo ɓɔ ɨndambʉ ngia nakʉkyɨa engo ati ʉndɛnʉ yɨ꞉ɓaana tʉkʉ ɓʉ chɨla chɨla, iya ɓɔ abana tʉkʉ ɓombi ngiɓa ɓambʉkɔmʉ Ɓayuda ɓambʉkyɨakɔmʉ sina 'ʉgbʉ wɔngɔ. Jʉ ɓakusigo ɓɔ yanʉ mombi mʉngana ati ʉndɛnʉ iya a꞉kɨnda pongo nʉ moi wʉ ɨsɛ!#5:1 Ya kʉyaka moni ekoo ʉ kɨnda nʉ moi wʉ atɔ inyeni‑zʉ kʉkʉʉ, ɓɔ ya moni kɔɔ ɓɨɓɨ. Popoko Tung 18:7-8. 2Nʉ inu nanʉ 'ʉtʉma wɔɔ ʉja. Ʉna tɔ, ambʉ́ nakʉdya ikoko akʉ 'ʉgbʉ wʉ ɨkyananakɨa ngiinanɨ, nʉ yɨkwanana ɓuungwiso mombi ngiinanɨ ati ʉndɛnʉ tʉkʉ ungwisoo.

3Abana ndʉ mambʉkɔmʉ ɨzɔ ninu akʉ ndʉtʉ, ɨkyɛmɨngana akʉ 'ʉtʉma pɛpɛ ka tʉkʉ izi mɨngana. Akʉ ino yɨ Makʉʉɓɨɨ, ma꞉tɨna bɛ 'ʉkɔmbɔ wʉ mombi ngia a꞉kyɨa pongo ɓʉɓɨɓɨ ngiɓʉnanɨ tʉkʉ ndʉ ma kʉ ati ʉndɛnʉ. 4Pimiseni kusigo ɓɔ ati ngia na꞊junikio‑ɔɔ, ɛmɛ maɓio kʉ ɨzɔ ninu akʉ 'ʉtʉma, nʉ angu ngia wʉ Makʉʉndɛsʉ Yeso aɓio akati ʉndɛnʉ. 5Kʉ ɓwanɨ, nʉkwanana kʉsɨa mombi ngiinanɨ akʉ lɨkɔndɔ lʉ Sɨtanɨ, aka ekoo ngia ɓɔ ɨkyananakɨa yɛɛ ɓɨɓɨ ngiangɔ yiwu woo, ambʉ 'ʉtʉma nguangɔ wʉkwanana tiga kʉhɨa isiya Makʉʉɓɨɨ a꞊tʉa sina‑ɔɔ.

6Ya ɓɨɓɨ inu kuɓio nʉ 'ʉtʉma wɔɔ ʉja! Ajʉ inu nambakambɨa‑zʉ iya ɓaasigo‑ɔɔ ɓɔ ɓʉtɨ ngiɓa ɓaaya naɓɔ mikati ɗɛkɛkɛ ɓaafukiso ikandi‑kandi yɛɛ ɨja yɨ mukati wɔɔ kpole kʉ uɓomu ɓiɛ? 7Kʉ ɓwanɨ, nʉkwanana kʉjaɓanakɨa, nambuungwiso ɓʉtɨ ɓʉ mikati ngiɓa ɓʉ jɛnɛ ɓʉ ɓʉɓɨɓɨ kʉ ɓuɓomu, nambuɓio ɨkyɛmɛ yɨ ɨtakɨ‑takɨ iya yambʉkɔmʉ nʉ ɓʉɓɨɓɨ. Nʉ inu na tii tʉkʉ ɓʉjaɓanakɨɛ jʉ ɓa꞉nzo Klisito ndʉ apɛpɛ wʉ mwana ʉ kɔndɔlɔ wʉ ʉmbɔ wʉ Pasɨka. 8Iiya ɓɔ kutiniseni ʉmbɔ wʉ Pasɨka, chʉkɔmʉ nʉ mikati ngia ɓa꞉ikpolo nʉ ɓʉtɨ ɓɔɔ ɓɔɔɓufukise iɓa ɓʉ jɛnɛ, iya yakusigo ɓɔ chʉkɔmʉ nʉ ɓʉɓɨɓɨ, gʉ ɓɔ ambɛlɛ‑mbɛlɛ. Ɨkyɛmɨngana, kʉdyeni tʉkʉ mukati ngua wʉ ɨtakɨ‑takɨ uwa wambʉkɔmʉ nʉ ɓʉtɨ ɓɔɔ ɓufukise, iya yakusigo ɓɔ jaɓanakɨa, nʉ ɓingono.

9Amati ʉ ʉbalʉa ngua ma꞉nɨtɨndakɨa, amati ɔngɔ ma꞉nɨɓɨa ɓɔ nɔɔjubuniokɔmʉ ɨzɔ nʉ ɓombi ɓʉ ɨndambʉ. 10Mambʉkɔmʉ kusigo ɓɔ nambukujubunio nʉ ɓombi kʉ ɓuɓomu ngiɓa ɓaakyɨa ɨndambʉ akʉ ɨtaka ngia, gʉ ɓɔ ɓombi ɓɔɔ ɓʉtananakɨɛ kumbo, gʉ ɓɔ ɓombi ɓɔɔ ɓʉ hinyoe kumbo, gʉ ɓata ɓɔ ɓombi ngiɓa ɓaabibiso ɓamʉngʉ ɓʉ yakanaka. Jʉ kʉɗʉkana nʉ ɓombi ngiɓʉnanɨ ya tʉkʉ kusigo ɓɔ nʉkwanana kʉʉngwa akʉ ɨtaka ngia!

11Ɨkyɛmɨngana, ma꞉nɨtɨndakɨa kusigo ɓɔ nɔɔjubuniokɔmʉ nʉ mombi ngia akusukunio ɓɔ a muklisito inyeni ɓata kʉ kʉkyɨa ɨndambʉ, ambuɓio nʉ 'ʉtʉma wɔɔ tananakɨɛ kumbo, mombi ɔɔ bibise ɓamʉngʉ ɓʉ yakanaka, mombi ɔɔ zɨakɛ ɓangɛ, mombi ʉ ɨdamʉ, nʉ mombi ɔɔ hinyoe kumbo. Nʉkwananakɔmʉ gʉkʉ kʉdyakaka ɨzɔ nʉ ikanzi yɨ mombi ngiinanɨ. 12-13Kʉ ɓwanɨ, iya yɨsɛmɛ kʉtɨna 'ʉkɔmbɔ wʉ ɓombi ngiɓa ɓambʉkɔmʉ ɓaklisito yakwa tiga tanɨ? Tʉkʉ Asʉɓɨɨ kʉ a꞊tɨna sina 'ʉkɔmbɔ nguʉndaɓʉ. Ɨkyɛmɨngana, inu nʉkwanana kʉtɨna 'ʉkɔmbɔ wʉ ɓombi ɓʉ kanisa ngiʉndɛnʉ, jʉ Mubio kʉ Asʉɓɨɨ kakusigo ɓɔ: « Kpinyeni mombi ɔɔ ɓɨɓɨ anambamba ʉndɛnʉ kpinyoo. »#Popoko Tung 17:7

Currently Selected:

1 Ɓakolito 5: BudKoya

Highlight

Copy