1 Ɓakolito 4

Ɓʉka‑ɓʉkaɨ ngiɓa ɓʉ ɓatitima ɓʉ Yeso Klisito

1Kʉ ɓwanɨ, nʉkwanana nisu kʉchɨka ndʉ ɓabayo ɓʉ Klisito nʉ ndʉ ɓombi ngiɓa kakʉkyɨa kuu yɛɛ ngakanakise moni kʉ ɓaɗi ngika kʉ Asʉɓɨɨ. 2Ɨkyɛmɛ ngia yɨtanɨa akʉ ɓombi ɓɔɔ ɓʉmayɛ kuu ngiɓʉnanɨ, ya tʉkʉ kuɓio ngbingbii. 3Yiɓio inu nʉ꞉tɨna 'ʉkɔmbɔ nguʉsɛmɛ gʉ ɓɔ ɓombi ngiɓa ɓaatɨna 'ʉkɔmbɔ ɓʉ꞉ʉtɨnaa, akʉ ɛmɛ yambʉkɔmʉ nʉ ɨkyɛmɛ. Ɛmɛ makʉɔngɔ mambʉkʉkwanana kʉtɨnana 'ʉkɔmbɔ nguʉsɛmɛ kʉ ɛmɛ makʉɔngɔ kʉ ɓwanɨ.

4'Ʉtʉma nguʉsɛmɛ wambʉkʉ nɛmɛ kʉpana ɨngbaa yɨ moni yɛɛ ɓɨɓɨ gʉkʉ mɨngana amati asɛmɛ. Tɔ, yambʉkɔmʉ kusigo ɓɔ ma mombi ɔɔ ngbingbii. Tʉkʉ Makʉʉɓɨɨ kʉ nangana akwanana kʉtɨna 'ʉkɔmbɔ nguʉsɛmɛ. 5Kʉ ɓwanɨ, nɔɔtɨnakɔmʉ 'ʉkɔmbɔ wʉ mombi wati wɔngɔ wambʉndanenikɔmʉ. Ati ngia Makʉʉɓɨɨ a꞊tʉa‑ɔɔ, ɛyɔ a꞊iso moni ngika ka꞉ɓatanɨa amati ʉ umomo akʉ ɓʉmba, nʉ kʉpana itungwio ngia ya amati ʉ mɨtʉma yɨ ɓombi. Kʉ ɓwanɨ, Asʉɓɨɨ a꞊nzo mombi kʉ nangana nangana ɨbɨba ngia ʉkwanana nayɔ apɛɛ angɔ.

6Inu ɓayoo, mʉ꞉yaka moni ngikʉnanɨ tʉkʉ aka ekoo Apɔlɔ nʉ ekoo asɛmɛ makʉɔngɔ kʉpananiso moni ngikʉnanɨ, ambʉ yiɓio isisinio akʉ inu. Ndʉ napimiso inyi yɨ moni ngika ɓa꞉sigo ɓɔ: « Ɓieni ɓʉmaɨ tʉkʉ aka ekoo moni ngika ɓa꞉tɨndakɨa », ambʉ mombi gʉkʉ mʉngana ati ʉndɛnʉ ɔɔɓiokɔmʉ kʉbɨbana ekoo mombi mʉngana, ambuɓio kʉbʉla iya wɔmɔ. 7Anɨ‑zʉ iya a꞉nʉnapɨa kuɓio ekoo ɓangɛ. Ajʉ chʉkɔmʉ‑zʉ tʉkʉ Asʉɓɨɨ kʉ a꞉nanzo kumbo kʉ uɓomu ngia wanayɔ ɓiɛ? Ndʉ yaɓio ɓɔ kʉ Asʉɓɨɨ a꞉nanzo kumbo ngiinanɨ, jʉtanɨ wa tiga nʉ 'ʉtʉma wɔɔ ʉja ndʉgʉ wa꞉nyɨakɔmʉ nayɔ ndʉ apɛpɛ?

8Tiga ɨtakɨ‑takɨ ngiakɛ nakʉnana ndʉ na tiga nʉ kumbo kʉ uɓomu ngia nanʉ taa yengo. Nʉ na tiga kʉ nʉ lɨkyɛmɛ! Nʉ na tiga ɓangama, nambʉtɨchɨka isu ndʉgʉ kambʉkɔmʉ ɓangama. Makʉkʉnda ɓɔ ɓieni tɔ kingono ɓangama, ambʉ isu kʉdya tiga ɓʉngama ɓɔngɔ kʉ izi mɨngana ninu. 9Jʉ yanɛmɛ kʉnyɨa ɓɔ Asʉɓɨɨ a꞉tɨnapɨa isu ɓatitima kuɓio ambise ʉ ɓombi kʉ ɓuɓomu, ngbanga ndʉ ɓombi ngiɓa ɓa꞉tɨna 'ʉkɔmbɔ wʉndaɓʉ ɓɔ ɓa꞊ɓʉwa waa, iɓa ɓa꞉ɓumaiso tiga akʉ ɓʉmba. Nʉ ka tiga ɨkyɛmɛ ngia yakʉmbangɨa ɨtaka kʉ iɓomu, kʉndʉ ɓombi, nʉ ɓamalaika kʉtaa.

10Ɓombi ɓaatɨchɨka isu ndʉ kanʉ ɓaumu aka ekoo ʉ Klisito. Ɨkyɛmɨngana, ɓambʉnɨchɨka inu ndʉ na ɓombi ngiɓa nanʉ 'ʉtʉma wɔɔ pimise moni amati ʉ jubunio ngia nanayɔ nʉ ɔɔ Klisito. Nʉ ɓɔ isu ka tʉkʉ ɓadʉɓa, ɨkyɛmɨngana inu nanʉ angu. Ɓombi ɓaanɨna inu nʉ ɨbɨba, ɓambuɓio nisu kʉna tʉkʉ ɨsʉkʉɓwanɨ! 11Yiɓio kʉndʉ ɨtakɨ‑takɨ ngiakɛ, kakuwo taa, nʉ taa yɨ mepo. Nʉ kakʉkwa unduu, ɓanisu kugbolo, nʉ kakʉyɨnganaka kʉ gbaɨ chʉkɔmʉ nʉ mʉa ngua kakwanana‑ɔɔ kuwulo ɨkʉmbʉ. 12Kaandokono nʉ kuu yɛɛ ɓʉmʉ nʉ lɨkɔndɔ ngilʉndɛsʉ aka ekoo nyɨa nʉ idyo. Iya ɓombi ɓaakyɨa‑ɔɔ nisu kʉzɨaka, isu kaakyɨa naɓɔ tʉkʉ kumbuiso. Iya ɓaakyɨa‑ɔɔ nisu kʉkyananaka, isu kaakyɨa tʉkʉ kʉpɨa ɓʉka‑ɓʉkaɨ ngiɓʉnanɨ, 13ati ngia ɓaatɨchwa‑ɔɔ nɨngbaa yɨ moni kʉɓʉʉ, kaatisio tʉkʉ nʉ 'ʉtʉma wʉ majɨɔ. Kʉɓʉya kʉndʉ ɓʉɓʉnɨ, ɓombi ɓaatɨchɨka tʉkʉ ndʉ ɨkaka yɨ ɓombi ɓʉ ɨtaka, nʉ tʉkʉ ndʉ ɨkyɛmɛ ngia yambʉkɔmʉ nʉ dada.

Pɔlɔ akʉpanɨa ɓana ngiɓangɔ ɓʉ ɓʉkʉnda

14Mambʉkɔmʉ ninu kʉtɨndakɨa ʉbalʉa nguakɛ ninu kʉndapiso, ɨkyɛmɨngana tʉkʉ ninu kunzo ʉpanʉ ndʉ ɓana ɓʉsɛmɛ ɓʉ ɓʉkʉnda. 15Amati ʉ ʉɓɨɨ nguʉndɛnʉ ɨzɔ nʉ Klisito, abana ndʉ naɓio nʉ ɓapananakɨa ɛlɛfʉ kumi, atɔ ʉndɛnʉ akʉ baya a tʉkʉ mʉngana. Jʉ ma꞉nɨtanaka tiga ndʉ atɔ ʉndɛnʉ akʉ ʉɓɨɨ nguʉndɛnʉ amati ʉ Yeso Klisito ati ngia ma꞉ka‑ɔɔ ninu kʉpanɨa Ɨsaʉ yɛɛ Iɗo. 16Kʉ ɓwanɨ, maninu kʉta ɓɔ kpateni tʉkʉ isisinio ngiisɛmɛ. 17Ya aka ekoo moni ngikʉnanɨ iya mʉ꞉nɨtʉmɨa‑ɔɔ Timɔtɛɔ. Ɛyɔ a mwana asɛmɛ wʉ ɓʉkʉnda iya a mombi ɔɔ ngbingbii amati ʉ Makʉʉɓɨɨ. Ɛyɔ a꞊kwanana ninu kutungwiso lɨngbaa lʉ moni ngila maalɨkpata amati ʉ ʉɓɨɨ nguʉsɛmɛ ɨzɔ nʉ Yeso Klisito, ila maakʉpanɨa mʉa kʉ uɓomu amati ɓakanisa kʉ ɓuɓomu.

18Yanʉ ɓombi ɓɔmɔ ati ʉndɛnʉ iɓa ɓanʉ 'ʉtʉma wɔɔ ʉja, ɓambuɓio kʉna ndʉgʉ ɓɔ mambʉkʉka sina ɓata ninu kʉna. 19Ɨkyɛmɨngana, ndʉ Makʉʉɓɨɨ akʉnda, ma ɓisi kʉka na andɛnʉ kʉ ɨtakɨ‑takɨ. Kʉ ɓwanɨ, makwanana kʉmbɨa chʉkɔmʉ tʉkʉ moni ngikʉndaɓʉ ɓaayaka akʉ moni nʉ 'ʉtʉma wɔɔ ʉja, mambɨa tiga angu ngiʉndaɓʉ ɔɔkyɨɛ ɨkyɛmɛ kʉ mbɨaa. 20Jʉ Ɓʉngama ɓʉ Asʉɓɨɨ ɓambakapananɨa tʉkʉ akʉ moni ɨsʉkʉɓwanɨ, ɨkyɛmɨngana ɓaapananɨa kʉ ɨngbaa akʉ ɨkyananakɨa yɨ angu. 21Na tiga kʉkʉnda tanɨ? Ajʉ nakʉkʉnda ɓɔ mʉka ɓisi na andɛnʉ muniɓutieni tiga 'ufimbo ɓiɛ, gʉ ɓɔ mʉka nʉ 'ʉtʉma wʉ ɓʉkʉnda nʉ 'ʉtʉma wʉ ɨgyɛtɛ?

Currently Selected:

1 Ɓakolito 4: BudKoya

Highlight

Copy