रोमी 14

बिश्वासमि कमजोर रे बलिया

1बिश्वासमि कमजोर मान्सनलाइ उनरा मान्यताका बारेमि बिना संका स्वीकार अर, तर तिनरो बिश्वास तमरो भण्ना फरक छ भण्या तिनरो न्याय जन अर। 2कसइले सब चिज खानु पणन्छ भणि बिश्वास अरन्छ, तर बिश्वासमि कमजोर हुन्याले सागपात मान्तरइ खान्छ।

3मासु खान्याले सागपात खान्यालाइ तुच्छ जन माणउ, रे सागपात खान्याले मासु खान्यालाइ दोस जन लाउ। क्याकि परमेश्वरले दुएइलाइ स्वीकार अद्दाहान। 4त्यो मान्स प्रभुको दास हो। तबइकिलाइ तमनले औरका नौकरको न्याय जन अर। त्यो सफल हुनु अथवा असफल हुनु तइका मालिकमि भर पणन्छ। त्यो सफल बनाइन्या हो क्याकि प्रभुले तइलाइ सफल बनाउन सक्दाहान।

5तसेरि कसइ मान्सले एक दिनलाइ अर्खा दिन भण्ना बड्ता महत्वको माणन्छ, अर्खा मान्सले सब दिन बराबर माणन्छ। हरेक मान्सन पक्‍का हुनु पणन्छ कि उइले सोच्या सहि हो। 6जइ मान्सले कसइ दिनलाइ बिसेस रुपले पालना अरन्छ, तइले प्रभुलाइ आदर धेकाउनाइ तसो अरन्छ। जइ मान्सले मासु लगइ खान्छ, तइले प्रभुका निउति खान्छ, क्याकि तइले परमेश्वरलाइ धन्यबाद दिन्छ। जइ मान्सले मासु खानइन तइले परमेश्वरको आदरको निउति खानइन रे परमेश्वरलाइ धन्यबाद दिन्छ।

7हाम सब परमेश्वरका हु। तबइकिलाइ हाम बाँच्या अथवा मर्या लगइ हामले आफलाइ होइन तर उनलाइ खुशी पड्डु पणन्छ। 8यदि हाम बाँच्चाउ भण्या प्रभुका निउति बाँच्चाउ, रे मद्दाउ भण्या प्रभुका निउति मद्दाउ। हाम बाँच्चाउ अथवा मरु, हाम प्रभुइका हु। 9क्याकि ख्रीष्ट तबइकिलाइ मर्या रे आजी जिउना भया ताकि उनलाइ जिउना मान्स रे मर्या मान्स दुएइले प्रभु माण्न सकुन।

10तब तमन क्याइ बिश्वासि साथीको न्याय अरन्छौ? अथवा बिश्वासि साथीलाइ क्याकि तुच्छ माणन्छौ? याद अर कि हाम सबको न्याय परमेश्वरले अद्द्या हुन। 11पबित्र सास्त्रमि लेखिरइछ,

“प्रभु भण्नाहान, म आफइले तमनलाइ बाचा अद्द सक्दउ कि हरेकले मेरा अगाडी घुँडा टेक्द्या हो,

रे हरेकले, परमेश्वरलाइ स्वीकार अद्द्या हो।”

12तबइकिलाइ हाममि हइ हरेकले आफ्ना आफ्ना कामको लेखा परमेश्वरलाइ दिनु पड्डया हो।

13तबइकिलाइ हामले एक-अर्खाको न्याय जन अर। तर आफना मनमि यो सोच कि तमनले इसो काम कभइ अददु पड्डइन जइले तमरा संगि बिश्वासिनलाइ पाप अद्द अथवा परमेश्वरमि बिश्वास अद्द बठेइ रोकन्छ।

प्रेमको नियम

14म जाण्नउ, रे प्रभु येशूमि मलाइ पक्‍का छ, कि सब खाना चलन अनसार सुद्द छन, तर जइले त्यो असुद्द माणन्छ, तइका निउति त्यो अशुद्धइ हुन्छ। 15यदि तुइले जी खान्छइ तइ चिजले तेरा बिश्वासि भाइलाइ चोट पाणन्छ भण्या, तु प्रेममि चल्या हुनइनि। तबइकिलाइ हाम होशियार बसु ताकि खान्या चिजले हाम आफ्ना बिश्वासि भाइका बिश्वासलाइ नास जनअरु, क्याकि ख्रीष्ट उइकीलाइ मर्या हुन।

16तबइकिलाइ हामरा बिचारमी केइ असल छ, तर यदि हामरा बिश्वासि भाइको बिश्वासलाइ पिरोलन्छ भण्या, हामले तसो नअर्या उचित हुन्छ, ताकि और मान्सनले हामरो आलोचना जन अरउ। 17क्याकि परमेश्वरको राज्यमि खान्या रे पिउन्या कुरणी महत्वपूर्ण होइन। महत्वपूर्ण कुरणी परमेश्वरसित धर्मि, सान्ति रे पबित्र आत्मामी आनन्दित भइबर जिउनु हो।

18जइले यइ किसिमले ख्रीष्टको सेवा अरन्छ, परमेश्वर तइसित खुशी हुनाहान रे मान्सनले लगइ तिनरा बारेमि असल भण्ना हान। 19तबइकिलाइ हामले सान्ति ल्याउन्या कोशिस अददु पणन्छ, रे एक-अर्खाको बिश्वासलाइ बालियो बनाउनु पणन्छ।

20क्याकि तमनले बिसेस खानेकुरणी खान खोजीबर परमेश्वरका कामलाइ नष्ट जन अर। चलन अनसार सब चिज सुद्द छन, तर यदि यइले और मान्सनलाइ पाप अद्द लाउछ भण्या इसो खानु गलत हो।

21उचित त यो हुन्छ, कि मासु नखानु, दारु नखानु, अथवा केइ यिसा काम नअद्दु जइ बठेइ तेरा बिश्वासि भाइलाइ पाप अद्द लाउन्छ।

22तुइले यो बिश्वास अद्द सकन्छइ कि तुइले अद्दारया काम गलत आथिन, तर यइ कुरणीलाइ आफना रे परमेश्वरका बिचमि राख। धन्यको हो त्यो मान्स, जइले आफले उचित माण्या कुरणिका लाग्दा आफइलाइ दोषि माणनु पड्डइन। 23तर यदि हामरा हृदयमि खान्या बारेमि संका छ तर छाड्डीबार त्यो खानाउ भण्या हाम दोषि हुनाउ, क्याकि हामले हृदयमि बिश्वास अर्या कुरणीको जसोइ अद्दाइन। यदि तमनले ठीक आथिन भणबर बिश्वास अर्या कुरणी अरन्छौ भण्या तमनले पाप अददाछौ।

Currently Selected:

रोमी 14: DTYNT

Highlight

Copy

Compare