मर्कुस 8

येशूले चार हजार मान्सलाइ खाना ख्वायो

(मत्ती १५:२९-३९)

1केइ दिन पछा जब येशू डेकापोलीसको इलाकाइमी थ्या, आजी परमेश्वरका राज्यका बारेमि सुणनाइ निउती ठुलो भिड येशूका वलतिर पलतिर जम्मा भयो, रे तिनसित खानाइ केइ थेइन। तब येशूले शिष्यालाइ आफना वाँ बोलाइबर भण्यो, 2“यइ भीडकि म खाँति माण्नउ, क्याकि यिन मसित रया आज तीन दिन होइय्यो, रे आब यिनसित खानाइ केइ बचेइन। 3यिनमि हइ कोइ-कोइ दुर हइ आइरइछन यदि यिनलाइ केइ नख्वाइबर भोकाइ घर पठाया भण्या यिन बाटाइनि बिहोस होइजान्या हुन।”

4उनरा शिष्याले उनलाइ भण्यो, “यइ एकान्त ठाउँमि यिन सब मान्सलाइ ख्वाउनाइ पुग्दया खानाइ काँ हइ पाउनाउ?”

5येशूले तिनलाइ सोध्यो, “तमनसित कति रोटा छन?” तिननले भण्यो, “हामसित सात रोटा छन।”

6उनले भिडलाइ जमिनमी बस्या हुकुम दिइबर, तइ पछा सात रोटा हातमि समाइ परमेश्वरलाइ धन्यबाद दिया पछा रोटा तोड्यो, रे शिष्यालाइ दियो, रे उनले मान्सनलाइ बाण्यो। 7तिनसित केइ नाना माछा लगइ रइछन, रे येशूले तइकीलाइ लगइ परमेश्वरलाइ धन्यबाद दिइबर शिष्यालाइ तिन माछा बाणन्नाइ भण्यो। 8रे मान्सले खायो रे अगाया। तब शिष्याले रोटाका उपर्या टुकरा सात छापरा जम्मा अर्यो 9ताँ करीब चार हजार बैकान मान्स थ्या, येशूले तिननलाइ बिदाबारि अरि पठायो। 10पइ उन आफना शिष्यासित उतन्जेइ नामि चडिबर दलमनुथाका जिल्लामि गया।

11फरिसि मान्सन येशूका वाँ आइबर उनसित बहस अद्द पस्या, तिननले उनलाइ फसाउन चाहानथ्या, तबइकिलाइ परमेश्वरले उनलाइ अधिकार दिइराइछ भणि हेद्दाइलाइ तिननले येशूलाइ अचम्मका काम धेकाउनाइलाइ भण्यो। 12उनरो अविश्वासका लाग्दा येशू निरास भया रे लामो सास फेरिबर उनले भण्यो, “यइ समयमि मान्सले चिन्ह खोजन्छ। साँच्चि, म तमलाइ भण्नउ, कि यइ समयका मान्सनलाइ केइ चिन्ह दिइन्या आथिन।” 13पइ येशूले फरिसि मान्सनको समुहलाइ छाडिबर, आजी उन आफ्ना शिष्यासित नामि चडिबर गालील समुद्रका पारिबटा गया।

फरिसि मान्सका समुह रे राजा हेरोदको छल

(मत्ती १६:५-१२)

14येशूका शिष्याले संङइनि आफकिलाइ पुग्दया रोटा लैइन्ना बिसरिगइथ्या, रे नामि तिननसित एक मात्र रोटो थ्यो। 15येशूले शिष्यालाइ यिसो भणबर चेताउनी दियो, “तमन फरिसि मान्सन रे राजा हेरोदको खमिर बठेइ साबधान बस।” 16तिननसित आफलाइ पुग्दया रोटा नभया हुनाले येशूले यिसो भण्या हो भणि, तिन आपसमी बहस अद्द लाग्या। 17येशूले तिननले सोच्या कुरणी था पाइबर तिनलाइ भण्यो, “तमनसित प्रयाप्त रोटा आथिन भणि क्याकि तमन बहस अरन्छौ? कि तमनले आफ्नो मनलाइ नबुज्जा कठोर बनाइराइछौ आजी बुज्या आथिनु? 18आँखा भया लगइ कि तमन धेक्दानु? कान भया लगइ कि तमन सुण्नानु? कि तमनलाइ याद आथिन, 19जब मइले पाँच रोटालाइ मान्तर पाँच हजार मान्सलाइ ख्वायाथ्या, तब कति छापरा बच्या तमनले उठाइथ्या?” तिननले येशूलाइ जबाफ दियो, “बार छापरा।” 20आजी येशूले शिष्यालाइ भण्यो, “जब सात रोटा चार हजार मान्सका बिचमि बाण्या थ्यो कति छापरा बच्या रोटा तमनले उठाइथ्या?” तिननले येशूलाइ भण्यो, “सात छपरा।” 21येशूले शिष्यालाइ भण्यो, “आजी लगइ तमन बुज्जानु कि म को हु!”

बेथसेदामि कानो मान्सले धेक्यो

22तब येशू रे उनरा शिष्या बेथसेदा गाउँमी आया, रे मान्सले एक कानो मान्स उनरा वाँ लेइबर आया, रे तइलाइ छोइबर निको अरिदिय भणि उनसित बिन्ति अर्यो। 23येशूले तइ काना मान्सको हात समाइबर तइलाइ गाउँ बठेइ बाइर लेइबर आया, रे येशूले तइका आँखामी आफ्नो थुक लायो, रे येशूले तइलाइ सोध्यो, “कि तु केइ धेक्दाछइ?” 24उइले मल्तिर तकिबर भण्यो, “म मान्सनलाइ देख्दाछु तर नीकेरि धेक्द सक्दारयइन। तिनन रुख घुमीरया जसा धेक्दाछु।” 25तब येशूले आजी तइका आँखामी हात राख्यो, रे तइले मान्सलाइ एकोरो लाइबर हेर्यो। तइले आफ्नो दृष्टि पायो रे सब चिज नीकेरि धेक्द सक्यो। 26तब येशूले तइलाइ आज्ञा दिबर भण्यो, “आफ्नो घर फर्किबर जा रे याँ जी भया छ तइ कुरणी भण्नाइलाइ गाउँमी जन पसेइ।”

पत्रुसले येशूलाइ ख्रीष्ट माण्यो

(मत्ती १६:१३-१६; लूका ९:१८-२१)

27येशू रे उनरा शिष्या बेतसदा गाउँलाइ छाडिबर कैसरिया फिलिप्पी गाउँका नजिकका गाउँमी गया। बाटाइनि हिट्टा हिट्टाइ येशूले आफना शिष्यालाइ यिसो भणबर सोध्यो, “मान्स मेरा बारेमि कि भण्नाहान, म को हु?” 28तिननले उनलाइ भण्यो, “कोइ मान्सन भण्नाहान तम बप्तिस्मा दिन्या यूहन्ना हौ। और भण्नाहान तम एलिया अगमबक्ता हौ, और भण्नाहान कि तम अन्य अगमबक्तामिका एक जाना हौ।” 29तब येशूले तिननलाइ सोध्यो, “तर तमन कि भणन्छौ, म को हु?” पत्रुसले उत्तर दिइबर भण्यो, “तम ख्रीष्ट हौ जो परमेश्वरले पठाया हो।” 30येशूले शिष्यालाइ उनरा बारेमि कसइलाइ केइ जन भण्या भणि आज्ञा दियो।

आफ मद्या बारेमि येशूले भाविस्यबाणी अर्यो

(मत्ती १६:२१-२८; लूका ९:२२-२७)

31येशूले आफ्ना शिष्यालाइ सिकाउन सुरु अर्यो कि म, मान्सको चेलोले भौत दु:ख भोग्दु पड्या हो, रे यहुदि मान्सनका अगुवा, यहुदि मुख्य पुजारि रे मोशाको कानुन सिकाउन्यावाला बठेइ तुच्छ सम्जिबर इन्कार अरिनु पड्या हो, रे मारिनु पड्या हो, पइ तेसरा दिनमि मर्या बठेइ जिउनो हुनु पड्या हो। 32यिसेरी उनले यिन कुरणी खुलस्त भण्यो। तर येशूले आफ्नो दु:ख रे मद्या बारेमि कुरणी अर्या हुनाले पत्रुसले उनलाइ एकतिर लैजाइबर हकाद्द पस्यो। 33तर फर्किबर आफना शिष्यालाइ हेरिबर, पत्रुसलाइ यिसो भणबर हकार्यो, “सैतानले जसेरि मेरो परिक्षा जन अरइ! क्याकि तु परमेश्वरका जसेरि होइन, तर मान्सनका जसेरि सोच्चाछइ।”

येशूका शिष्य बन्नूको अर्थ

(मत्ती १६:२४-२८; लूका ९:२३-२७)

34तब येशूले आफना शिष्याका संङइनि भिडलाइ आफना वाँ बोलाइबर तिननलाइ भण्यो, “कोइ मान्स मेरो शिष्य बन्ना चाहन्छ भण्या तइले आफ्नो सब इच्छा त्यागउ। रे आफ्नो क्रुस उठाइबर शिष्य हुनाइलाइ मेरा पछा लागउ। 35क्याकि जइले यो संसारमी आफ्नो प्राण बचाउन्या मन अरन्छ तइले त्यो अनन्त जीवन गुमाउन्या छ, तर मेरी निउति रे सुसमाचारका निउति आफ्नो प्राण दिन्याले अनन्त जीवन पाउन्या हो। 36तमलाइ कि फाइदा होलो यदि संसारको सब चिज पाउन्छौ तर परमेश्वरसितको अनन्त जीवनको मौका गुमाया भण्या? केइलगइ नइ! 37कि एक मान्स परमेश्वरलाइ कि दिन सकन्छ आफ्नो निउति अनन्त जीवन पाउनाइलाइ? केइलगइ नइ! 38यदि तमनमि हइ कसइले मलाइ आफ्नो परमेश्वरका रुपमि स्वीकार अद्द रे मेरा शिक्षा पालन अद्द इन्कार अरन्छौ भण्या तमन डराउन्छौ कि यइ समयका पापी रे अबिश्वासी मान्स तमरो मजाग बनाउन्या हुन। पइ म, मान्सको चेलो तमनलाइ आफ्नो शिष्याको रुपमि स्वीकार अद्द इन्कार अद्द्या हु, जब म पबित्र स्वर्गदुतसित यइ संसारमी फर्किबर आउन्या छु। तब सबले परमेश्वर मेरा पिताको माहान सक्ति धेक्द्या हुन।”

Currently Selected:

मर्कुस 8: DTYNT

Highlight

Copy