मर्कुस 14
14
येशूलाइ माद्दाइ निउति चालबाजी
(मत्ती २६:१-१६; लूका २२:१-६)
1आब दुइ दिन पछा निस्तार काजबार#14:1 निस्तार काजबारयहुदि मान्सनले तइ समयलाइ याद अद्द्यालाइ यो काजबार बनाउन्थ्या, जब परमेश्वरले आफ्ना पुर्खालाइ मिश्र देशको गुलामी हइ मुक्त अर्यो। रे अखमिरी रोटिको काजबार#14:1 अखमिरी रोटिको काजबार अखमिरी रोटिको अर्थ यो हो कि एक कजबार जइलाइ यहुदि मान्स सात दिन सम्म बनाउन्थ्या। यइ दिनमि उन बिना खमिर बन्या रोटी खान्थ्या। सुरु हुन्नाथ्यो, यहुदि मुख्य पुजारिन रे मोशाको कानुन सिकाउन्यावालाले कसेरी येशूलाइ गोप्यमी पकड्डाउ रे माद्दाउ भणि मौका खोज्जाथ्या। 2रे तिननले भण्यो, “हामले निस्तार काजबारका बेला येशूलाइ पकोडडु हुनइन रे उइलाइ माद्दु हुनइन। न ति त मान्सन कला माचाउन्या हुन।”
येशूको बेथानियामि अभिषेक
(मत्ती २६:६-१३; लूका १२:१-८)
3तइ समयमि येशू बेथानिया गाउँको सिमोनका घरमि थ्या, जइलाइ पइल्ली कोड रोग लाग्या थ्यो, येशू तइका घरमि खाना खानाइ बस्याथ्या। एक स्वानी तइ घरमि आइ। तइ स्वनीले एक सिसाको बोतल ल्याइबर आइ जइलाइ सिगमरमर भणिन्थ्यो। तइ बोतलमि अँत्तर भरिरइथ्यो। अँत्तर सुद्द जटामसिको तेलले बनाइराइथ्यो, रे तइको भाउ भौत महंगो थ्यो, रे तइ स्वानिले बोतलको मुखलाइ खोलिबर येशूलाइ सम्मान अद्दाइ निउति सब अत्तर उनरा मुन्टाइनि खण्याइ दियो। 4पइ केइ मान्सन एक-आपसमी रिसाइबर भण्न लाग्या, “तइले येशूका मुन्टाइनि इति महंगो सुगन्धित अत्तर कस्या हाल्ल सकी, रे यइ अँत्तरलाइ इसेरि बर्बाद अद्द सकी? 5क्याकि यो तेल लगभग तीन सउ चादीका सिक्का#14:5 तीन सउ चादीका सिक्का तीन सउ चादीका सिक्का तइ बेला एक जानाको लगभग एक सालको द्याणी को बराबर थ्यो। भण्ना बरतामि बेच्च सकिन्थ्यो रे पैसा गरिबलाइ बाड्न सकिन्थ्यो।” आजी शिष्यले तइ स्वानिलाइ गालि दियो। 6येशूले भण्यो, “तइलाइ एकलि छाडिदिय, रे तइलाइ दु:ख दिन बन्द अर। उइले म प्रति भौत असल काम अरिराइछ। 7गरिब त तमसित सदाइ भरि छनइछन रे जनज्या तमलाइ इच्छा लागन्छ उतनजेइ तम उनरो भलाइ अद्द सकन्छौ तर म त तमसित सदाइ रन्या हुनु। 8जी यो स्वानी अद्द सकन्थी, तइले सबहइ निको काम अरिराइछ। तइले मेरा सरीरमि तेल घस्साइ रे म मद्दा हइ पइल्ली मलाइ गाड्या तयारि अरि। 9साँच्चि, म तमलाइ भण्नउ, सारा संसारमी जाँ यो सुसमाचार प्रचार अरिन्या हो, तिनन यो भण्या हुन कि तइ स्वानीले जी अर्यो, रे मान्सन तइलाइ सम्जिन्या हुन।”
येशूलाइ यहुदा बठेइ धोका
10पइ यहूदा इस्करियोत जो बार शिष्यामि हइ एक थ्यो, उ यहुदि मुख्य पुजारिका वाँ गयो रे येशूलाइ पकोड्डाइ सहयोग अद्दया हु भण्यो। 11यो सुणिबर तिन खुशी भया रे तिननले करियोत गाउँको यहूदालाइ रुप्या दिन्या कबुल अर्यो, पइ तिनले येशूलाइ धोका दिइबर कसेरी यहुदि मुख्य पुजारिनका हातमि पकोडाउनाइ मदत गरु भणबर उ असल मौका खोज्ज पस्यो।
अंतिम भोज
(मत्ती २६:१७-१९; लूका २२:७-२३; यूह १३:२९-३०; १ कोरि ११:२३-२५)
12अखमिरी रोटाका काजबारका पइल्लिका दिनमि जब तिन निस्तार काजबारको पाठालाइ बलिदान अरन्थ्या, येशूका शिष्याले उनलाइ भण्यो, “तम हामलाइ काँ पठाउन चाहन्छौ कि हाम निस्तार काजबारको भोज तयार अरु, ताकि हाम यइ लगइ खान सकु?”
13पइ येशूले आफना शिष्या मध्ये दुइ जनालाइ यो भणबर पठायो, “यरुशलेम सहरमि जा रे एक मान्स पानीको फोलो समाइबर जन्नारया भेट्या हौ, रे तम उसइका पछा लाग्या। 14जइ घरमि उ पसन्छ, तेइ घरका मालिकलाइ तम भण: गुरु जी भण्नाहान कि त्यो व्यवस्थित पाउना कोठा काँ छ जा म लगइ आफना शिष्यासित निस्तार काजबारको भोज खान्या हु? 15पइ उ तमनलाइ निक्केरि व्यवस्थित तयार पाण्या मल्तिरको कोठा धेकाउन्या हो रे तइ कोठामी हामकिलाइ निस्तारको भोज खानाइकिलाइ तयार अर।”
16पइ येशूका दुइ शिष्या सहरतिर आया रे येशूले भण्या जसोइ पाया पइ तिननले ताँ निस्तार काजबारको भोज तयार अरे।
17पइ बसाइतिक भयो, येशू आफ्ना बारै जना शिष्यासित तइ घरमि आया। 18जब उन बसिबर खाना खान्या बेला येशूले भण्यो, “साँच्चि, म तमनलाइ भणनउ कि तम जो मसित खानाइ खान्नाछौ, तम मध्ये एकले मलाइ दुसमनका वाँ पकडाउनालाइ सहयोग अद्द्या हो।”
19जब येशूका शिष्याले यो भण्याको सुणयो तिन दुःखित भया रे एक-एक अरिबर येशूलाइ सोद्द लाग्या, “म होइन, कि त्यो म हु?”
20येशूले जबाफ दियो, “त्यो बार शिष्यमि हइ एक हो जइ मान्सले मसित आफ्नो रोटो हमरो थालमि चोपिराइछ।” 21म, मान्सको चेलो मद्द्या हु क्याकि यो पबित्र सास्त्रमि लेखिरइछ पइ तइ मान्सलाइ ठुलो सजाय हुन्या छ जइले मलाइ पकडाउनालाइ दुस्मनलाइ मदत अरन्छ। त्यो मान्स त कहिलै नजन्म्या भए निको हुनेइथ्यो।
शिष्यासित प्रभुभोज
(मत्ती २६:२६-३०; लूका २२:१५-२०; १ कोरि ११:२३-२५)
22जब तिनन खानाइ तयार थ्या, पइ येशूले रोटा समाइबर परमेश्वरलाइ धन्यबाद दिइबर तोड्यो, रे रोटाका टुकरा उठाइबर आफ्ना शिष्यालाइ दियो रे भण्यो, “लिय यइ खा, यो मेरो शरीर हो।” 23आजी उनले अंगुरका रसको कटौरा समाइबर परमेश्वरलाइ धन्यबाद दिइबर आफ्ना शिष्यालाइ दियो, रे तिनन सबैले त्यो पियो। 24येशूले तिनलाइ भण्यो, “यो अंगुरको रस नयाँ करारको मेरो रगत हो। यो भौत मान्सनका निउति बलिदानका रुपमि बागाइन्या छ, परमेश्वरले आफना मान्सनसित बाध्या बाचालाइ अंगुरको रसले साबित अद्या हुन। 25साँच्चि, म तमनलाइ भण्नउ, आजी म तइ समय सम्म कभइ अंगुरको रस पिउनइन, जबसम्म परमेश्वरका राज्यमा म नयाँ अंगुरको रस पिउनइन।” 26जब येशू रे उनरा शिष्याले परमेश्वरको प्रसंसाको गीत गायो रे यरुशलेम सहर नजिकको जैतुन डाङामि गया।
पत्रुसले धोका दिन्या अगमबाणी
(मत्ती २६:३१-३५; लूका २२:३१-४३; यूह १३:३६-३८)
27जब येशू रे उनका शिष्या पहाड तिर जन्नाथ्या, येशूले तिननलाइ भण्यो, “तम सब मलाइ छाडिबर भाग्द्या हौ, क्याकि मेरा बारेमि पबित्र सास्त्रमि लेखिरइछ रे त्यो पुरा हुनु पणन्छ तइ मान्सलाइ मारीदिनउ जइले गोठाला जसेरि हेरचाह अरन्छ, रे उन भेडा जसेरि तितर बितर हुन्या हुन। 28पइ म मर्या बठेइ जिउना भया पछा तम भण्ना पइल्ली गालील जिल्लामि जान्या हु रे म ताँ भेटिन्या हु।” 29पत्रुसले येशूलाइ भण्यो, “सबले छाडिबर भाग्या लगइ, म भाग्द्या होइन।” 30येशूले तइलाइ भण्यो, “साँच्चि, म तमलाइ भण्नउ कि इसइ रात दुइ बेर भाल्या बास्सा हइ पइल्ली तुइले मलाइ तीन बेर सम्म चिन्नइन भणन्या हइ।” 31पत्रुसले आजी जोर दिबर भण्यो, “यदि मइले तमसित मद्दु पण्या लगइ म तमलाइ चिनैइन भणबर कभइ भण्न्या आथिन” इसेरि सबले एकै कुरणी भण्यो।
गेतसमनिमी येशूको प्रार्थना
(मत्ती २६:३६-४६; लूका २२:३९-४६)
32पइ येशू रे उनरा शिष्या गेतसमनी नाउँ भया बगैचामि पुग्या, तब येशूले आफना शिष्यालाइ भण्यो, “तम याँइलाइ बस म परमेश्वरसित प्रार्थना अद्द जानउ।” 33येशूले पत्रुस, यूहन्ना रे याकुबलाइ आफसित बगैचाको पलतिर लइय्या रे येशू भौत ब्याकुल रे बिचलित हुन पस्या। 34रे उनले तिननलाइ भण्यो, “म भौत ब्याकुल छु, इसो हुन्नाछ म मरिन्या हु, तम याँइलाइ होउ रे जागा बस।”
35-36पइ येशू थोक्काइ उथ जाइबर भैयाइनि घुडा टेकिबर आफ्नो मुख जमिनमी घोप्टिबर परमेश्वरसित प्रार्थना अर्यो, “अब्बा, मेरो पिता यदि यो तमरा योजनामि सम्भब भयाबर, मलाइ तइ दु:ख बठेइ बचाइ दिय जो मेरा वाँ आउन्ना छ। तमकीलाइ सब कुरणी सम्भब छ। यइ दु:खलाइ आउन जन दिय। रे तम तसोइ अर जो तम चाहन्छौ, यो नइ कि जो म चाहानौ।” 37जब येशू प्रार्थना अरिबर फर्कि आया उनले आफना तीन जाना शिष्यालाइ सिइर्या धेक्यो रे सिमोन पत्रुसलाइ भण्यो, “सिमोन कि तु सिइरइछइ? कि तम एक घन्टा लगइ जागा रन सक्दानु? 38तम जाग रे प्रार्थना अर कि कोइ पापका परीक्षामि जन पणया, तमरो मन निको अद्दाइ चाहन्छ, तर तमरो शरीर कमजोर छ।”
39आजी उन फर्किबर, उइ कुरणी भणबर प्रार्थना अद्द लाग्या। 40येशू फर्किबर आया, रे आजी शिष्यालाइ सिएइका भेट्यो। क्याकि तिनन निकै थग्या थ्या, रे कि जबाफ दिनु पड्डया हो उनले जाणेन पइ उनले तिननलाइ उठायो। 41पइ येशू तेसर्या आया रे तिनलाइ भण्यो, “आब सिरउ रे आराम अर। आब भौत भयो! बेला आइयो म, मान्सको चेलो धोका दिइबर पापी मान्सनका हातमि पकोडिना हो। 42उठ, हाम जानाउ! जो मलाइ पकडाउनाइ निउति मदत अद्दा छ, त्यो याँ आउन्ना छ!”
येशूलाइ पकडायो
(मत्ती २६:४७-५६; लूका २२:४७-५३; यूह १८:३-११)
43जब येशू बोल्ला बोल्लाइ बार शिष्यमि हइ यहूदा आयो, उ एक ठुलो भिडसित आयाथ्यो, तिनन सब आफसित तरबार रे हतियार ल्याइबर आयाथ्या। तइ मान्सनलाइ यहुदि मुख्य पुजारि रे मोशाको कानुन सिकाउन्यावाला रे यहुदि मान्सनका अगुवाले पठायाथ्यो। 44पइ उननले येशूलाइ पकडाउनालाइ मदत अद्द्या यहूदाले तइ भिडका मान्सलाइ पइल्ली भणिराइथ्यो कि जइलाइ म गुरु जी भणबर अबिबादन अद्दउ, उन त्यो मान्स हुन उनलाइ पकडीबर चौकिदारका वाँ लैजा। 45रे जब यहूदा आयो त्यो उतन्जेइ येशूका वाँ गयो रे भण्यो, “गुरु जी!” यहूदाले येशूलाइ अंगालो हाल्यो रे भात्ति खायो। 46तिननले येशूलाइ पकोड्यो रे आफसित लैया। 47पइ उनरा नज्जिकैका एक जाना शिष्यले यहुदि प्रधान पुजारिका दासलाइ तरबारले हाणिबर एक कान काटदियो। 48पइ येशूले तिननलाइ भण्यो, “कि तम मलाइ डाँका माणिबर म किलाइ तरबार रे लठ्ठा लेइबर पकोड्डयाइ आया हौ? 49म दिन दिनै तमसित मन्दिरमि बसिबर शिक्षा दिन्थ्या, रे तमले मलाइ पकोड्यानु, तर यो पबित्र सास्त्रकि कुरणी पुरा होनलाइ इसेरि भया हो।” 50पइ येशूका शिष्या उनलाइ छाडिबर भाग्या। 51पइ नाङाइ सरीरमि सुतिका लत्ता बेड्या एक जबान मान्स उनरा पछा लाग्यो, रे मान्सनका भिडले तइलाइ पकोडयो। 52पइ त्यो सुतिका लत्ता छाडिबर तिनरा वाँ हइ नाङङोइ बिचल्यो।
येशू यहुदि महासभाका अगाडी
(मत्ती २६:५७-६८; लूका २२:५४-५५,६३-७१; यूह १७:१३-१४,१९-२४)
53तिननले येशूलाइ यहुदि प्रधान पुजारिका घर लैया, ताँ सब यहुदि मुख्य पुजारिन, यहुदि मान्सनका अगुवा रे मोशाको कानुन सिकाउन्यावाला जम्मा भयाथ्या। 54रे पत्रुस दुर हइ यहुदि प्रधान पुजारिका घरका आगन सम्म येशूका पछा-पछा गयो, रे ताँ पत्रुस मन्दिरका चौकीदार सित आगो ताप्दाथ्यो।
55भितर, यहुदि मुख्य पुजारिन रे यहुदि महासभाका और सदस्य येशूलाइ माद्दाइ निउति उनरा बिरोधमी साक्षि खोज्जाथ्या, रे पाएइन। 56रे भौतले येशूको बिरोधमी झुटि गवाही दियो, रे जो तिननले भण्या कुरणी और मान्सका गवाही सित मिलेइन।
57कत्तिले उठीबर इसो भणबर येशूका बिरोधमी झुटि गवाही दियो: 58हामले येइलाइ इसो भण्या सुण्या, “म मान्सनले बनाया यइ मन्दिर भत्काउन्या हु, रे तीन दिनमि म अर्खो मन्दिर बनाउन्या हु जो मान्सका हातले बनायाको होइन।” 59रे त्यो कुरणी लगइ तिननले भण्या और मान्सका गवाही सित मिलेइन।
60तब यहुदि प्रधान पुजारिले तिनरा अगाडी कल्लिबर येशूलाइ सोध्यो, “तु केइ लगइ जबाफ दिनइनि? यिन मान्स जो तेरा बिरोधमी गवाही दिन्ना छन तिनरा बारेमि तु कि भणन्छइ?” 61रे येशू चुप्प लाग्या रे केइ जबाफ दिएइन। आजी यहुदि प्रधान पुजारिले उनलाइ सोध्यो, “कि तम जइको हम आराधना अद्दाउ उनइ परमेश्वरका चेला ख्रीष्ट हौ?”
62येशूले भण्यो, “हो म हु: तमले म, मान्सको चेलालाइ सर्ब सक्तिमान परमेश्वरको दाइन हाततिर सक्तिका ठाउँमि बस्या रे तमनले मलाइ बादलले घेर्याको अग्गास बठेइ आइरयाका धेक्द्या हो।”
63यहुदि प्रधान पुजारिले येशूले भण्या कुरणी सुणबर रिसले आफना लत्ता चिरिबर भण्यो, “हामलाइ कोइ साक्षि चाइनइन! 64तमनले उइले परमेश्वरको बिरोध अर्याको सुणिहाल्या। यइमि तम सबैको निर्णय कि छ?” तिनन सबैले निर्णय अर्यो कि येशूले परमेश्वरको निन्दा अर्या हुनाले उन दोषि छन, रे उनरो सजाय मृत्यु हुनुपण्न्छ। 65तइ पछा कोइ उनलाइ थुक्द लाग्या, कोइ मुक्कि हाण्न पस्या, रे तिननले उनरा आँखा बुजिबर भण्न लाग्या, “यदि तु अगमबक्ता हइ भण्या, भण कइले तुलाइ हाण्यो!” रे मन्दिरका चौकिदारनले उनलाइ समाइबर थप्पडी हाण्यो।
पत्रुसले येशूलाइ इन्कार अर्याको
(मत्ती २६:६९-७५; लूका २२:५६-६२; यूह १८:२५-२७)
66जब पत्रुस आगनमी आगो तापिबर बसिरइथ्यो, तसइ बेला यहुदि प्रधान पुजारिका नौकर्नी हइमि एक ताँ आइ। 67रे पत्रुसलाइ आगो ताप्दारया धेकिबर उइलाइ नजिक आइबर ध्यान दिबर हेरि रे भणि, “तु लगइ नासरत गाउँका येशूसितइ थ्येइ।” 68रे तिनले इसो भणबर इन्कार अर्यो, “तम क्या भण्नाछौ म जाण्नैन रे म बुज्जइन” तइ पछा तिन ताँ बठेइ आगनका मुल ढोका बठेइ निकल्या, रे भाल्या बास्यो। 69जब त्यो नौकर्नीले पत्रुसलाइ ताँ कल्लिया धेक्यो उइले और मान्सनलाइ भण्न लागी, “यो मान्स येशूका शिष्यामि हइ एक हो।” 70रे पत्रुसले आजी इन्कार अर्यो, पइ थोक्काइ पछा पत्रुसका नजिकै कल्लिरयाले आजी उइलाइ भण्यो, “पक्कालगइ तु येशूका शिष्यामि हइ एक हइ, क्याकि तेरि बोलाइले था हुन्छ कि तु लगइ गालील जिल्लाको हइ।” 71रे पत्रुस इसो भणबर आफलाइ सराप्द पस्यो, “म कसम खाइबर सत्य भण्ना छु, जैका बारेमि तम भण्नाछौ तइ मान्स म चिन्नै चिन्नैन।” 72तब उतन्जेइ दोसर्या भाल्या बास्यो, पइ येशूले तइलाइ भणेइ कुरणी पत्रुसलाइ याद आयो, “दुइ बेर भाल्या बास्सा हइ पइल्ली तीन बेर सम्म तु मलाइ इन्कार अद्दाहै।” तब पत्रुसले आफना दुखलाइ समालि नसकिबर धुरु-धुरु रुन पस्यो क्याकि उइले येशूलाइ धोका दियाथ्यो।
Currently Selected:
मर्कुस 14: DTYNT
Highlight
Share
Copy
Want to have your highlights saved across all your devices? Sign up or sign in
Dotyali (डोटेली) New Testament, by The Love Fellowship is licensed under Creative Commons Attribution-ShareAlike 4.0 License.
