लूका 7
7
कप्तानको बिश्वास
(मत्ती ८:५-१३)
1आफना सब कुरणी मान्सलाइ सुणाइसक्या पछा, उन कफर्नहुम गाउँमी गया। 2कोइ एक जाना कप्तानको एक जानो प्यारो नौकर थ्यो, जो बिमार होइबर मद्दाइ बटिरइथ्यो। 3जब येशूका बारेमि तइले सुण्यो, तब तइको नौकरलाइ निको बनाइ दिय भणबर तइले यहुदि मान्सनका अगुवालाइ बिन्ति अद्दाइ पठायो। 4तिनन येशूका वाँ आइबर यिसो भणबर उनलाइ नम्र भइबर बिन्ति अर्यो, तिन तमरो यो सहयोग पाउन्या योग्यका छन, 5क्याकि तिनले हामरो जातिलाइ प्रेम अद्दाहन, रे तिनइले हामरो यहुदि सभाघर बनाइ दिया हुन। 6येशू तिनसित गया। कप्तानको घर नजिकइ उन हुन्ज्या, कप्तानले तिनरा साथीलाइ उनरा वाँ यिसो भणि पठायो, “हे प्रभु दु:ख जन अर, क्याकि तम मेरा घर भितर पस्या योग्यको म आथिन, 7मइले आफइ लगइ तमरा वाँ आउन्या योग्यको माणेइन। तर बचन मान्तरइ बोल्दिय रे मेरो नौकर निको होइजान्या हो। 8क्याकि म लगइ अधिकारीका अधिनमी छु, मेरा अधिनमी सिपाइ छन। म एकलाइ जा भण्नउ, त्यो जान्छ, रे अर्खालाइ आ भण्नउ, त्यो आउन्छ। मेरा नौकरलाइ यो अर भण्नउ, तइले त्यो अरन्छ।” 9यो कुरणी सुणिबर येशूले तइसित अचम्म माण्यो, रे फर्किबर आफना पछा आउन्या भिडलाइ भण्यो, “म तमनलाइ भण्नउ, मइले इस्राएल देशमि लगइ यिसो बिश्वास धेकया आथिन।” 10जब पठाया साथिन घर फर्किबर गया, तिननले तइ नौकरलाइ निको भया पायो।
बिधवाको चेलो जिउनो भया
11तइ पछा उतन्जेइ येशू नाइन नाउँ भया गाउँमी गया, रे उनरा शिष्या रे एक ठुलो भिड उनसित गया। 12जब येशू गाउँका ढोका नजिकइ पुगिरइथ्या, ताँ एक बिधवाको एकइ मान्तर चेलाको लास लैजान्नाथ्या। गाउँको भौत ठुलो भिड बिधवासित थ्यो। 13जब प्रभुले तइलाइ धेक्यो, तब उनले दयाले भारिबर भण्यो, “जनरोइ।” 14पछा नजिक गइबर काट्टोलाइ छोयो, रे बोक्द्यावाला रोकिया। उनले भण्यो, “ए केटा, म तुलाइ भण्नउ, उठ।” 15तब मर्या मान्स उठीबर बस्यो, रे बोल्ल लाग्यो। येशूले तइलाइ उइकी इजाका जिम्मा लाइदियो। 16तब सब डरले भरिया, रे परमेश्वरको महिमा अरिबर भण्यो, “एक जाना महान अगमबक्ता हामरा बिचमि आया छन। रे परमेश्वर आफना मान्सनलाइ सहयोग अद्दाइलाइ आइरइछन।” 17येशूका बारेमि यो चर्चा सारा यहुदिया जिल्ला रे वलतिर पल्तिरका सब जिल्लामि फैलियो।
बप्तिस्मा दिन्या यूहन्नाको प्रश्न
(मत्ती ११:२-१९)
18यूहन्नाका शिष्याले यिन सब कुरणीको समाचार तिनलाइ भणिदियो। 19आफना शिष्यामि हइ दुइ जानालाइ यूहन्नाले प्रभुका वाँ यो सोद्दाइ पठायो, “जो आउन्याहुन, कि तम उनै हउ? कि हाम कसइको बाटो हेद्दाउ?”
20जब तिन मान्सन येशूका वाँ आया, तब तिनले भण्यो, “बप्तिस्मा-दिन्या यूहन्नाले हामलाइ यो सोद्दाइ तमरा वाँ पठाइराइछ, ‘जो आउन्या हुन, कि तम उनै हौ? कि हाम कसइको बाटो हेद्दाउ?’”
21तसइ बेला येशूले भौत मान्सनका रोग ब्यथा रे भूत बठेइ छुटायो, रे अन्धालाइ धेक्द्या बनायो। 22तब उनले तिननलाइ भण्यो, “जा रे जी तमनले धेक्या रे सुण्या, गइबर यूहन्नालाइ भण, कि अन्धा धेक्दाहान, लङडा हिट्टाहान, कोणी निका हुनाहान, टोल्या सुण्नाहान, मर्या जिउना हुनाहान, गरिबलाइ सुसमाचार सुणाइन्छ। 23त्यो धन्य हो, जइले ममि बाधाको कारण पाउनइन।”
24यूहन्नाको खबर पुर्याउन्या मान्सन फर्क्या पछा, उनले यूहन्नाको बारेमि भिडलाइ भण्न पस्या: “तमन उजाड ठाउँमि कि हेद्दाइ गया? कि बतासले हलाया निङालो? 25तर तमन कि हेद्दाइ निकल्या? कि निका लत्ता लाया मान्सलाइ हेद्दाइ? हेर, अकरो लत्ता लाउन्या रे सुख-चैनमि बस्या त राजाका महलमि हुनाहान। 26तर तमन कि हेद्दाइ निकल्या? कि अगमबक्तालाइ? हो म भण्नउ, तमनले अगमबक्ता भण्ना महानलाइ धेक्या। 27यिन तिनै हुन, जइका बिसयमि लेखिरइछ,
‘हेर, म मेरो खबर पुर्याउन्या मान्सलाइ तेरो अगाडी-अगाडी पठाउन्नाछु,
जइले तेरो अगाडी तेरो बाटो तयार अद्दया हो।’”
28म तमनलाइ भण्नउ, “आइमाइ बठेइ जन्म्या मध्ये यूहन्ना भण्ना महान और कोइलगइ आथिन, रे पइलगइ जो परमेश्वरको राज्यमि नानामि हइ नानो छ, त्यो तिन भण्ना आजी महान हुन्या हो।”
29जब तिननले येशूले भण्या कुरणी सुण्यो, तब सब मान्सनले याँ सम्मकि कर उठाउन्याले लगइ यो भण्यो कि परमेश्वर धर्मि छन, क्याकि तिननले यूहन्ना बठेइ बप्तिस्मा लिइराइथ्यो। 30तर फरिसि मान्सनको समुह रे मोशाको कानुन सिकाउन्यावालाले यूहन्ना बठेइ बप्तिस्मा लिनाइ इन्कार अर्या हुनाले, परमेश्वरको उद्देश्य आफना निउति अस्वीकार अर्यो।
31येशूले भण्यो, “यइ पुस्ताका मान्सनलाइ म कि सित तुलना अरु? तिनन कइ जसा छन? 32तिनन त बजारमि खेल्लया बालक जसा छन, जइले एक-अर्खालाइ यिसो भण्नाहान, ‘हामले तमराका निउति ब्यामि बजाउन्या गीत बजाया, तर तमन नाच्यानु। हामले बिलापको धुन बजाया, तर तमन रोर्यानु।’
33बप्तिस्मा दिन्या यूहन्ना आया, उन बर्त बसनथ्या रे अंगुरको रस खानाइन्नथ्या, रे तिनन भण्नाहान, उइलाइ भूत लागिरइछ। 34मान्सको चेलो आयो, उनले खायो रे पियो, रे तमन भणन्छौ, ‘हेद्दा, एक घिचुवा, पिउन्यावालो, कर उठाउन्या रे पापीको साथी!’ 35तर बुद्दि ठीक हो भण्न्या कुरणी बुद्दि अन्सार हिट्टया सन्तानले प्रमाणित अद्दाहान।”
पापी आइमाइलाइ क्षमा
36फरिसि मान्सनको समुहमी हइ एक जनाले उनलाइ खानाइलाइ निउतो दियो, रे उन तइ फरिसिका घर गइबर खानाइलाइ बस्या। 37तइ सहरमि एक अनैतिक जीवन जिउनेइ आइमाइ रइछ। फरिसि मान्सका घरमि येशू खाना खानाइलाइ आइरइछन भण्न्या सुणिबर, एक सिंगमरमरको सिसीमि अकरो अँत्तर लेइबर त्यो ताँ आइ, 38रे पछाडी बठेइ उनरा खुट्टाइतीर कलिबर रुनि उनरा खुट्टा आँउसले भिजाउनाइ निउति रे आफना मुन्टाका रौंले पुछि रे उनरा खुट्टामी भाती खाइबर तइ अकरो अँत्तर घस्स लागी।
39येशूलाइ निउतो दिन्या फरिसि मान्सनले यो धेकिबर मनमनइ यिसो भण्न लाग्यो, “यदि यिन अगमबक्ता भया भएले यिनलाइ छुनेइ को रे कसि आइमाइ हो भणि यिनले जाण्नेइथ्या। क्याकि यो त एक अनैतिक जीवन जिउनेइ आइमाइ हो।”
40येशूले तइ फरिसिको सोच था पाइबर भण्यो, “ए सिमोन, मइले तुलाइ केइ भण्नु छ।” तइले भण्यो, “गुरुज्यू, भण।”
41येशूले यो काहानि भण्यो, “एक जाना साउका दुइ रिणि थ्या। एकले पाँच सय चाँदीका सिक्का रे अर्खाले पचास चाँदीका सिक्का ऋण लइजाइराइथ्यो। 42तर तिनसित तिद्द्या केइलगइ नभया हुनाले तिनले दुएइको ऋण मिन्हा अरिदिय। तबइकिलाइ भण त, यिन दुइमि हइ कइले तिनलाइ बड्ता प्रेम अरिराइछ?”
43सिमोनले भण्यो, “म माण्नउ, जइको बड्ता ऋण मिन्हा भयो।” उनले तिनलाइ भण्यो, “तुइले ठीक भणि।” 44तइ आइमाइतिर फर्किबर उनले सिमोनलाइ भण्यो, “कि तु धेक्दाछइ कि यइ आइमाइले कि अरि? म तेरा घर भितर आया, तर हामरा चलन अन्सार तुइले मलाइ खुट्टा धुनाइ पानी दिइनि, तर यइले त मेरा खुट्टा आँउसले भिजाइबर आफना रौंले पुछ्यो। 45हामरा चलन अन्सार तुइले मलाइ भाती खाइनि, तर यइले तम याँ आया धेकि मेरा खुट्टामी भाती खान छाडेइ आथिन। 46तुइले मेरा मुन्टा तेल हालदिइनि, तर यइले त मेरा खुट्टामी अँत्तर खणेइराइछे। 47तबइकिलाइ म तुलाइ भण्नउ, यइका भौत पाप जो यइले अरेइथि, तिन क्षमा होइरइछन, क्याकि यइ आइमाइले भौत प्रेम धेकाइराइछ। तर जइलाइ थोक्काइ क्षमा अरिन्छ, तइले थोक्काइ प्रेम अरन्छ।”
48उनले तइ आइमाइलाइ भण्यो, “तेरा पाप क्षमा होइरइछन।”
49खान बस्या जम्माइले एक-अर्खासित भण्न्न पस्या, “पाप क्षमा अदद्या यिन को हुन? जो परमेश्वरले मान्तर अद्द सक्दाहान।”
50उनले तइ आइमाइलाइ भण्यो, “परमेश्वरले तुलाइ बचाया छ क्याकि तुइले ममि बिश्वास अरि, सान्ति सित जा।”
Currently Selected:
लूका 7: DTYNT
Highlight
Share
Compare
Copy
Want to have your highlights saved across all your devices? Sign up or sign in
Dotyali (डोटेली) New Testament, by The Love Fellowship is licensed under Creative Commons Attribution-ShareAlike 4.0 License.
