लूका 11
11
प्रार्थना बारेमि येशूको शिक्षा
(मत्ती ६:९-१३; ७:७-११)
1येशू कसइ एक ठाउँमि प्रार्थना अद्दाथ्या। उनले प्रार्थना अरिसक्या पछा शिष्यामि हइ एक जनाले उनलाइ भण्यो, “हे प्रभु, यूहन्नाले आफना शिष्यालाइ सिकाया जसो हामलाइ लगइ प्रार्थना अद्द सिका।” 2उनले तिननलाइ भण्यो, “तमनले प्रार्थना अद्दया बेला यिसो भण:
हे पिता, तमरो नाउँ पबित्र होइजाउ,
तमरो राज्य आइजाउ।
3हामलाइ हामरो दिन-दिनकिलाइ खानाइ दिय।
4हामरा पाप क्षमा अरिदिय,
क्याकि हाम लगइ हामरा बिरुद्दमि अपराध अद्द्यालाइ क्षमा अद्दाउ।
हामलाइ परीक्षामि पड्ड जन दिय।”
मागी राख
(मत्ती ७:७-११)
5येशूले तिननलाइ भण्यो, “माण कि, तु मध्यरातमि आफना साथिका वाँ गइबर भणन्छइ, ‘साथी, मलाइ तीन रोटा पैंचो दि हाल। 6क्याकि मेरा एक जाना साथी यात्रा बठेइ मेरा वाँ आइरइछन। तिनलाइ ख्वाउनाइलाइ मसित केइलगइ आथिन।’
7उन तमनलाइ घरका भितर बठेइ जबाफ दिइबर भण्नाहान, ‘मलाइ जन सता। आब दार बन्द होइय्यो, रे मेरा चेलाचेली मसित बिस्तरामि छन। म उठीबर तमलाइ केइलगइ दिन सक्दइन।’ 8म तमनलाइ भण्नउ, यदि साथीको नाताले उनले उठीबर तिनलाइ केइलगइ नदिन्ना, तर तिनले लगातार माग्या हुनाले उनले उठीबर खाँचो पड्या जति तिनलाइ दिन्या हुन।
9म तमनलाइ भण्नउ, माग, तमलाइ दिइन्या हो। खोज रे तम पाउन्या हौ, ढकढक अर तमरा निउति उगाड्या हो। 10क्याकि हरेक जइले मागन्छ तइले पाउछ, जइले खोजन्छ तइले भेट्टाउछ, रे जइले ढकढक अरन्छ तइकि निउति उगाडिन्छ।
11तमनमि हइ को बा होलो, जइका चेलाले रोटा मागन्ज्या तइलाइ ढुङा देलो, कि माछा मागन्ज्या माछा सट्टा स्याप देलो? 12कि यदि अण्डा मागन्ज्या तइलाइ बिच्छि देलो? 13तमन दुष्ट होइबर लगइ आफना चेला चेलीलाइ निको चिज दिन जाणन्छौ भण्या, तमनका स्वर्गीय पिताले उनसित माग्द्यालाइ कति बड्ता अरिबर पबित्र आत्मा दिनाहान।”
येशू रे सैतान
(मत्ती १२:२२-२९; मर्क ३:२०-२७)
14उन एक भूत निकाल्लाथ्या, जो लाटो थ्यो। भूत निकल्या पछा त्यो लाटो मान्स बोल्ल पस्यो, रे मान्स सब अचम्म पड्या। 15तर तिननमि हइ कसइ-कसइले भण्यो, येइ मान्सले भूतका मालिक सैतान बठेइ मान्तर भूत धपाउछ। 16औरले चाइ उनरो परिक्षा अद्दाइ उनसित स्वर्ग बठेइ एक अचम्मका काम धेकाउनाइलाइ भण्यो। 17तर तिनरा बिचार था पाइबर उनले तिननलाइ भण्यो, “यदि कोइ राज्यका मान्स समुहमी बाणिनाहान, आपसमी लडाइ अद्दहान रे त्यो राज्य पक्का नास हुन्या हो, रे यदि कोइ सहर अथवा परिबार आफ्नाइ बिचमि फाटो भयो भण्या तिन लामो समय सम्म टिक्दाइन्न। 18यदि भूतका मालिकले भूतलाइ निकालन्छ भण्या त्यो आफइ नास हुन्छ। क्याकि तमन भणन्छौ, कि म भूतका मालिक सैतान बठेइ भूत धपाउनउ। 19म भूतका मालिक बठेइ भूत निकाल्लौ भण्या, तमरा चेलाले कइ बठेइ तिनलाइ निकाल्ल्या हुन? तिननले तमरो न्याय अद्देहुन। 20तर परमेश्वरको औंलाले म भूत निकाल्लउ भण्या, परमेश्वरको राज्य तमनका वाँ आइरइछ।” 21हतियारले सजी सित बलियो मान्सलाइ आफना घरको सुरक्षा अरन्छ भण्या, तइका मालसमान सुरक्षित रनाहान। 22तर तइ भण्ना बलियो मान्स आइबर तइमि जाइ लागीबर तइलाइ जित्यो भण्या, उइले भर पड्या तइका जम्माइ हतियार खोसीबर लैजान्या हो, रे तइका मालसमान लुटिबर बाणन्या हो। 23जो मेरीतिर आथिन, त्यो मेरा बिरुद्द हुन्या हो, रे जइले मसित वटोल्लैन, तइले छरबट्ट पाणन्छ।
भूतले बस्साइ ठाँउ खोज्यो
(मत्ती १२:४३-४५)
24जब भूत मान्स बठेइ निकलिबर जान्छ, तब त्यो ओबानो ठाँउ हुनोइ आराम खोज्ज जान्छ, रे काँइ कोइ ठाँउ नपाउन्ज्या, तइले भणन्छ, म निकलिबर आया मेराइ घर फर्किबर जानउ। 25जबइ त्यो फर्किबर आउँछ, तइले त्यो घर झाडिबर सजाइराख्या पाउछ। 26तब त्यो गइबर आफ भण्न्ना बड्ताइ और सात खराब भूत लेइबर आउँछ, रे तिनन भितर पसिबर ताँ बास बस्साहान, रे तइ मान्सकि पछाकि दसा पइल्लीकी भण्न्ना झिक खराब हुनेइहो। 27जब येशूले यिन कुरणी बोल्लाथ्या तब भिड बठेइ कोइ स्वानिले जोरले भण्यो, “धन्य त्यो नारी जइले तमलाइ जन्म दियो रे आफ्नो दुध ख्वायो।” 28तर उनले भण्यो, “बरु तिनन धन्यका हुन, जइले परमेश्वरको बचन सुण्नाहान रे पालन अद्दाहन।”
स्वर्गको चिन्हको माग
(मत्ती १२:३८-४२)
29मान्स भरिनाइ जान्ज्या उनले भण्यो, “यो दुष्ट पुस्ता हो। यइले चिन्ह खोजन्छ, तर येइ पुस्तालाइ योना अगमबक्तालाइ भया चिन्ह बाहेक और चिन्ह दिइन्या आथिन।” 30क्याकि जइ रितले योना निनवे देशका मान्सकि निउति चिनो होइरइथ्या, तइ रितले म, मान्सको चेलो लगइ यइ पुस्ता निउति चिनो हुन्या हो। 31न्यायमि यइ पुस्ता मान्ससित दक्षिण देशकि रानीले उठीबर यिनलाइ दोषि ठहर्याउन्या हो, क्याकि तिन पल्ला किनार हइ सोलोमनको बुद्दि सुण्नाइलाइ आइरइथी। तर हेर, याँ एक जाना छ, जो सोलोमन भण्ना महान छ। 32निनवे देशका मान्सले न्यायमि यइ पुस्तासित खडा होइबर यइलाइ दोषि माण्न्याहुन, क्याकि तिननले योनाका प्रचारमि पश्चात्ताप अरिराइथ्यो, तर हेर, योना भण्नालगइ और महान कोइ याँ छ।
सरिरको बत्ति
(मत्ती ६:२२-२३)
33कसइले लगइ बत्ति बालिबर गोप्य ठाउँमि अथवा भाँडाले छोप्दाइन,, तर भितर जान्या सबले उजालो धेकन्ना भणबर उच्चा ठाउँमि राख्दाहान। 34तेरो सरिरको बत्ति तेरो आँखा हो। तेरो आँखा ठीक छ भण्या तेरो सारा शरीर उजालो हुन्छ, तर त्यो खराब छ भण्या तेरो शरीर लगइ अनारो हुन्छ। 35तबइकिलाइ होस अर्या, तुमि भया उजालो अनारो नहोउ। 36यदि तमरो पुराइ शरीर उजालाले पूर्ण छ भण्या, रे कोइ भाग अनरो आथिन भण्या त्यो पुराइ उजालो हुन्या हो, जसेरि बत्तिको किरणले तमनलाइ उजालो दिन्छ।
फरिसीनलाइ धिक्कार
(मत्ती २३:१-३६; मर्क १२:३८-४०; लूका २०:४५-४७)
37येशू बोलिसक्या पछा एक जाना फरिसि मान्सनले उनलाइ खानाइ निउतो दियो। उन घर भितर पसिबर खानाइ बस्या। 38तर खानाइ अगाडी उनले हात नधोया धेकिबर त्यो फरिसि मान्सन छक्क पड्यो। 39तर प्रभुले तइलाइ भण्यो, तम फरिसि मान्सनको समुह कटौरा रे थालको बाइर मान्तर माजन्छौ, तर तमरो भितर लुट रे दुष्टताइले भरिया हुन्छ। 40मुर्ख मान्स हो, जइले बाइरको भाग बनायो, तइले भितरको लगइ बनाया होइन ब? 41तर भितरका चिज दानका रुपमि दिय, रे तेरो निउति सब कुरणी सुद्द हुन्या हो।
42तर तम फरिसि मान्सनको समुहलाइ धिक्कार! क्याकि तमन पदम रे आरुद रे सब जडिबुटिको दशांश दिन्छौ, तर न्याय रे परमेश्वरका प्रेमको अपेक्षा अरन्छौ। तर और कामको लगइ अपेक्षा नअरिबर यिन काम लगइ तमनले अद्दु पड्या थ्यो। 43तमन फरिसि मान्सन भयानक समस्यामि पड्डया हौ! क्याकि तमन यहुदि सभाघरमी मुख्य ठाउँ रे मान्सनले बजारमि मान दिइबर अबिबादन अर्या मन पडाउन्छौ। 44तमन भयानक समस्यामि छौ! क्याकि तमन तिन चिहान जसा छौ जो धेकीनाइन रे थाइ नपाइबर मान्सन तिनमि हिट्टाहान।
45मोशाको कानुन सिकाउन्यावालामि हइ एक जनाले उनलाइ भण्यो, “गुरुज्यू, यिन कुरणी अरिबर तमले हामरो लगइ लाज अद्दाछौ।”
46उनले भण्यो, तम मोशाको कानुन सिकाउन्यावालालाइ लगइ धिक्कार! क्याकि बोक्द नसक्द्या भारि मान्समि तमन लादन्छौ, तर तमन आफ चाइ एक आउलाले लगइ तिन भारि छुनान।
47तमन भयानक समस्यामि छौ! क्याकि तमरा पुर्खाले मार्या अगमबक्ताको चिहान तमन बनाउन्छौ। 48यिसेरी तमन आफना पुर्खा काममी साँच्चि छौ, रे तिननसित सहमत हुन्छौ, क्याकि तिननले उनरो हत्या अर्यो, रे तमन चाइ उनरा चिहान बनाउछौ। 49तबइकिलाइ परमेश्वरको बुद्दिले लगइ भणन्छ, म तमन वाँ अगमबक्ता रे छान्या शिष्य पठाउन्या हु। उननमि हइ कसइलाइ तिनन माद्दया हुन रे कसइलाइ सताउन्याहुन। 50संसार सुरु बठेइ सब अगमबक्ता रगतको लेखा यइ पुस्तासित लिइन्या हो। 51हो, म तमनलाइ भण्नउ, हाबिलको रगत बठेइ लैजाइबर, बेदि रे मन्दिरको पबित्र ठाँउको बिचइनी मारिया जकरिया सम्मका रगतको लेखा यइ पुस्ता बठेइ लिइन्या हो।
52तम मोशाको कानुन सिकाउन्यावालालाइ धिक्कार! क्याकि तमनले ज्ञानको साँचो लइन त लैय्या, तर तमन आफइ लगइ भितर गयान, रे और जान्यालाइ लगइ रोक्या।
53जब उन ताँ बठेइ निकल्या, तब मोशाको कानुन सिकाउन्यावाला रे फरिसि मान्सनको समुहले उनरो घोर बिरोध अद्दाइ भौत बिसयमि उनलाइ प्रश्न अद्द पस्या, 54रे उनरा मुख बठेइ निकलेका कुरणीमि उनलाइ पकोड्ड्या दाउमि बस्या।
Currently Selected:
लूका 11: DTYNT
Highlight
Share
Compare
Copy
Want to have your highlights saved across all your devices? Sign up or sign in
Dotyali (डोटेली) New Testament, by The Love Fellowship is licensed under Creative Commons Attribution-ShareAlike 4.0 License.
