प्रेरित 24

ठुला हाकिम फेलिक्सका अगाडी पावल

1पाँच दिन पछा यहुदि प्रधान पुजारि हननिया रे केइ यहुदि मान्सनका अगुवा, तर्तुल्लस नाउँको एक जाना वकिलसित कैसरिया सहरमि आया, रे तिननले पावलका बिरोधमी ठुला हाकिमका अगाडी मुद्दा पेस अर्यो। 2पावललाइ ताँ बोलाया पछा तर्तुल्लसले तिनलाइ यिसो भण्नोइ दोस लाउन पस्यो, “माननीय फेलिक्स, हजुर बठेइ हामले ठुलो सान्ति पाइराइछु, रे हजुरले यइ जातिका निउति सुधार सुरु अर्या छौ। 3यिन कुरणी हर किसिमले सब ठाउँमि हाम धन्यवादसित स्वीकार अद्दाउ। 4तर म हजुरको बड्ता समय लिन चाहानइन, पइलगइ हामरो बिन्ति छोटकरीमी सुणि दिय। 5क्याकि हामले यइ मान्सलाइ जाँइ ताँइ दु:ख दिइबर हिट्या, संसार भरिका जम्माइ यहुदि मान्सनका बिचइनि हुलदङ्गा मचाउन्या, रे नासरी दलका मुख्य अगुवाको रुपमि भेटिराइछौ। 6यइले मन्दिरलाइ अपबित्र बनाउन्या लगइ कोशिस अर्याथ्यो, तर यइलाइ हामले पकड्या। हामरो यहुदि कानुन अन्सार हाम उइलाइ दण्ड दिन चाहानथ्या। 7तर रोम सहरका हाकिम क्लौडियस लुसियसले हामरा वाँ आइबर जबरजस्ती यइलाइ हामरा हात बठेइ खोसीबर लैय्या, रे यइका बिरोधमी आरोप लाउन्यालाइ हजुरका वाँ आउन्या आज्ञा दियो। 8आब हजुर आफइले यइको सोधपुछ अरेले हामले यइलाइ लाया दोस यिन सब कुरणीको सच्चाइ तइ बठेइ था पाउन सकन्छौ।”

9और यहुदि मान्सनले लगइ तिन कुरणी सब ठीक हुन भणि गवाही दियो।

10ठुला हाकिमले तिनलाइ बोल्या आज्ञा दिया पछा पावलले जबाफ दियो, “भौत बर्ष बठेइ हजुर यहुदि मान्सनका न्यायधिश भया कुरणी था पाया हुनाले म आफना बयान दिनाइकिलाइ उत्साह बड्या छ। 11हजुर पत्ता लाउन सकन्छौ कि म यरुशलेम सहरको मन्दिरमि आराधना अद्दाइ गया बार दिन होइया। 12यिननले न त मलाइ मन्दिरमि, न त यहुदि सभाघरमी कसइ मान्ससित वाद-बिबाद अद्दारया अथवा न त सहरमि काइ मान्सनलाइ उर्याउन्नारया भेट्यो, 13न त मलाइ अइल दोस लाउन्नारया कुरणीको यिननले प्रमाण दिन सक्दाहान। 14तर यो म हजुरकाइ अगाडी स्वीकार अद्दउ कि, म ख्रीष्टको उद्दारका बाटालाइ पछ्याइबर आफ्ना पुर्खाका परमेश्वरलाइ आराधना अद्दाछु, जइलाइ यहुदि अगुवानले झुटो बाटो हो भण्न्नाछन, तर म अगमबक्ताका किताबमी लेखिया सब कुरणी रे मोशाका कानुनमी बिश्वास अद्दउ। 15धर्मि रे अधर्मि दुएइलाइ परमेश्वरले मर्या बठेइ जिउना बनाउनाहान भण्न्या यिन आफइले स्वीकार अर्या जसेरि म परमेश्वरमि आसा राख्दउ। 16तबइकिलाइ परमेश्वरसित रे मान्ससित म सधान सुद्द बिबेक राख्द्या कोशिस अद्दउ। 17आब केइ बर्ष पछा मेरा मान्सनलाइ उपहार दिनाइ, जो गरिब छन रे परमेश्वरलाइ बलिदान चडाउनाइ म यरुशलेम सहरमि आयाथ्या। 18तइ बेला मलाइ मन्दिरमि सुद्द हुन्या रित मइले पुरा अद्दार्या यिननले धेक्थ्यो। ताँ केइ भिड थेइन, रे हल्ला लगइ थेइन। 19तर एसिया प्रदेशका केइ यहुदि मान्सन ताँ थ्या। यदि तिननलाइ लागन्छ कि मइले गलत अर्या छु भण्या, मलाइ दोस लगाउनाकिलाइ तिनन याँ तमरा अगाडी हुन पणन्थ्यो। 20अथवा यिन मान्सनलाइ सोध कि म यहुदि महासभाका अगाडी कल्लिया बेला तिननले ममि कि दोस पायाथ्यो। 21एक मान्तरइ दोस जो तिनन मेरा बिरोधमी लाउन सक्दाहान, जब मइले आगनमी कल्लिबर जोरले भणिराइथ्या, ‘मर्या बठेइ जिउना हुनाहान भण्न्या कुरणीमि मइले बिश्वास अर्या हुनाले आज तमरा अगाडी मेरो मुद्दा चलिरइछ।’”

22यइ उद्दारका बाटाका बारेमि ठुला हाकिम फेलिक्सलाइ ठीक ज्ञान भया हुनाले उनले यिन कुरणी सुण्या पछा तिननलाइ यिसो भणि मुद्दा सकीबर पठाइदियो, “रोम सहरका सेनापति क्लौडियस लुसियस याँ आया पछा म तमरा मुद्दाको फैसला अरिदिन्या हु।” 23तब उनले पावललाइ नीकेरि परेइबर राख्या रे तिनलाइ केइ स्वतन्त्रता दिया, रे तिनरा कसइ साथिनलाइ तिनका जरुरी कुरणी पुरा अद्दाइ जन रोक्या भणि कप्तानलाइ आज्ञा दियो।

24केइ दिन पछा ठुला हाकिम फेलिक्स आफ्नि यहुदि स्वानी द्रूसिल्लालाइ लेइबर कैसरिया सहरमि आया, रे उनले पावललाइ बोलाइबर येशू ख्रीष्टका बिश्वासका बारेमि तिन बठेइ सुण्यो। 25जब पावलले जो परमेश्वरका अगाडी सहि छ, रे आफ्ना इच्छालाइ रोकबर रे परमेश्वर बठेइ आउन्या न्यायको बारेमि बताउन सुरु अर्यो, तब ठुला हाकिम फेलिक्स डराइबर यिसो भण्यो, “अइल तु जा, जब मसित समय होलो तब म आफइ तुलाइ बोलाउलो।” 26ठुला हाकिम फेलिक्सले पावल बठेइ घुस रुप्या मिललो कि भणि उइले आसा अरिराइथ्यो। तबइकिलाइ त्यो पावललाइ बेर बेरि बोलाइबर कुरणीकानी अरन्थ्यो।

27तर दुइ बर्ष पछा जब हाकिम फेलिक्सको बदलामि अर्खा ठुला हाकिम पर्किअस फेस्तस आयो, तब ठुला हाकिम फेलिक्सले यहुदिलाइ खुशी राख्दाइ निउति पावललाइ नछाडीबर आजी झेलमि राखिबर गयो।

Currently Selected:

प्रेरित 24: DTYNT

Highlight

Copy

Compare