प्रेरित 19

पावल एफिसस सहरमि

1पइ इसो भयो अपोल्लोस कोरिन्थ सहरमि हुन्या बेला पावल गलातिया प्रदेस रे फ्रिगिया प्रदेस होइबर एफिसस सहरमि आया, पइ ताँ तिनले प्रभुमि बिश्वास अद्द्या शिष्यालाइ भेट्यो। 2तिनले उनलाइ भण्यो, “जब तमनले प्रभुमि बिश्वास अर्या, कि तमनले पबित्र आत्मा पाया?” पइ तिननले उनलाइ भण्यो, “पबित्र आत्मा छन भण्न्या कुरणी त हामले सुण्या आथिन।”

3पावलले उनलाइ भण्यो, “तसो भया तमनले कसो बप्तिस्मा लिया?” पइ उनले भण्यो, “हामले त्यो बप्तिस्मा लिया, जो यूहन्नाले दिन्थ्या।”

4तब पावलले भण्यो, “यूहन्नाले दिया बप्तिस्मा चाइ पाप अद्द छाडिबर परमेश्वरतिर फर्क भण्न्या बप्तिस्मा थ्यो। यूहन्नाले इस्राएल देशका मान्सनलाइ भण्यो, ‘म भण्न्ना पछा आउन्या मान्समि बिश्वास अर।’ उनरा पछा आउन्या मान्स येशू ख्रीष्टइ हुन।” 5यो कुरणी सुण्या पछा तिननले प्रभु येशूका नाउँमि बप्तिस्मा लियो। 6जब पावलले तिननमि हात राख्यो, तब पबित्र आत्मा तिननमि आया, रे तिननले फरक फरक भासा बोल्या रे भविष्यवाणी अर्यो। 7तिनन सब बार जाना बैकान थ्या।

8पावल यहुदि सभाघर भितर गया रे तीन मैना सम्म नडराइबर मान्सनलाइ शिक्षा दियो। उनले परमेश्वरको राज्यको बारेमि तिननसित वाद-बिबाद अर्यो रे तिननलाइ बिश्वासका बारेमि बुजाइराख्यो। 9तर जब कसइ कसइ मान्सनले मन कठोर बनाइबर बिश्वास अद्द इन्कार अर्यो, उल्टाइ तिननले प्रभुले दिया त्यो उद्दारको बाटाका बिरुद्दमि भइबर खिसि काट्ट लाग्या, तबइकिलाइ पावल तिनरा सभाघरमी जानुइ छाडदियो, रे प्रभुमि बिश्वास अद्द्या शिष्यालाइ आफसित लैया। तइ पछा पावल टुरान्नसको बिद्यालयमि दिन दिनइ मान्सनसित भेटबर उद्दारका बारेमि वाद-बिबाद अर्यो। 10पइ यो कुरणी दुइ बर्ष सम्म हुनोइ रयो, इसो भया हुनाले एसिया प्रदेशमि बस्या, यहुदि रे गैर-यहुदि मान्सनले प्रभुको बचन सुण्यो।

11परमेश्वरले पावल बठेइ भौत अचम्मका काम अर्यो। 12याँ सम्मकि मान्सनले उनरो सरीरमि भया रुमाल अथवा तौलिया बिरामिका वाँ लैजान्थ्या रे बिमारी निका हुन्थ्या, रे भूत लगइ निकलन्थ्या।

13तर ठाउँ ठाउँमि घुम्द्या केइ झारफुक अद्दया यहुदि बैकानले लगइ प्रभु येशूको नाउँमि भूत निकाल्लु खोज्यो, तिननले भूतलाइ झारफुक अरिबर भण्यो, “पावलले प्रचार अर्या येशूको नाउँमि म तुलाइ बाइर निकल्ल्या आज्ञा दिनउ।” 14स्केवास नाउँ भया यहुदि मुख्य पुजारिका सात जाना चेला थ्या, तिननले इसो अरन्थ्या। 15भूतले जबाफ दिइबर तिननलाइ भण्यो, “येशूलाइ म चिन्नउ रे पावललाइ लगइ म चिन्नउ तर तमन को हौ?” 16त्यो भूत लाग्या मान्स तिननमि उफडिबर आयो, रे तिनन सबलाइ आफ्ना बसमि पाणिबर तिननलाइ घोच्यो, रे तिनन तइ घर बठेइ नाङाइ रे चोट पाइबर भाग्या।

17पइ यो कुरणी एफिसस सहरमि बस्या सब यहुदि रे गैर-यहुदि मान्सनले लगइ सुण्यो, रे तिनन सब डराया। तिननले प्रभु येशूको नाउँको महिमा अर्यो। 18बिश्वास अद्द्यामि हइ भौत जाना आया रे आफले अर्या ननिका काम सबइ मान्सनका अगाडी स्वीकार अर्यो। 19टुना-मुना रे झारफुकका बारेमि लेख्या आफना किताब सबका अगाडी ल्याइबर पोल्यो, पइ तिननले पोल्या किताबको मोल जोड्यो रे तिन किताबको मोल पचास हजार चादीका सिक्काको हिसाब भयो। 20यिसेरी परमेश्वरको बचन सक्तिशाली रुपमि फैलिनोइ रे बड्डोइ गयो।

21यिन कुरणी भइ सक्या पछा पावल माकेडोनिया प्रदेस रे अखैया प्रदेशका बिश्वासीसित भेट्यो रे तइ पछा यरुशलेम सहरमि जान्या फैसला अर्यो। तिनले भण्यो, “यरुशलेम सहरमि पुग्या पछा म रोम सहरमि जानुइ पणन्छ।” 22तइ पछा तिनले आफ्नो साथी तिमोथी रे इरास्तसलाइ माकेडोनिया प्रदेसमि पठायो, तर तिन आफ केइ दिन एसिया प्रदेशमि बस्या।

एफिसस सहरमि हुलदङ्गा

23पइ तसइ बेलामि उद्दारको बाटो ख्रीष्ट मान्तर हुन भण्या प्रचार अर्या हुनाले एफिसस सहरमि ठुलो हुलदङ्गा मच्चियो। 24क्याकि डेमेत्रियस नाउँ भया एक जाना सुनारले युनानी देशका मन्दिरमि राख्या आर्तेमिस देबीको चाँदीका नान-नाना मुर्ति बनाउन्थ्या। यो काम अरबर त्यो रे तइसित काम अद्द्या कारिगर लगइ भौत रुप्या कमाउनथ्या। 25तब डेमेत्रियसले आफ्ना कारिगरलाइ बोलायो रे तिनन जसोइ काम अद्द्या कारिगरलाइ लगइ एकहठ्ठा अरिबर भण्यो, “भाइन हो, तमनलाइ थाइछ, कि यइ काम बठेइ हामले रुप्या कमाया हु। 26तर त्यो पावल कि भण्ना छ, तमन आफइ धेक्दाछौ रे सुण्नाछौ। मान्सनका हातले बनाया देबता चाइ देबताइ होइन, भण्ना छ। उइले एफिसस सहरमि मान्तर होइन तर एसिया प्रदेशका भौत मान्सनलाइ उसकाइबर भडकाउन्नाछ। 27तबइकिलाइ हामरो काम मान्तर होइन, तर महान देबी आर्तेमिसको मन्दिर लगइ हेला हुन्या हो, पइ एसिया प्रदेस रे संसार भरिका मान्सनले माणेका महान देबी अर्टेमिसको आराधना अद्द लगइ बन्द हुन्या हो।”

28यो सुणिबर सब कारिगर रिसले चुर भया, रे कला हालिबर इसो भण्न लाग्या, “एफिसस बासिकि देबी आर्तेमिस महान हुन।” 29सहरका और भौत मान्सनले कला हाल्या आवाज सुण्यो रे ताँ गइबर तिननसित मिलिबर माकेडोनिया प्रदेस बठेइ आया पावलका साथी गायस रे अरिस्तार्खसलाइ समाइबर रङ्गशाला भितर घसाडिबर लैया। 30पावल लगइ रङ्गशाला भितर गइबर मान्सनसित कुरणी अद्द खोज्यो, तर प्रभुका शिष्याले उनलाइ जान दिएन। 31एसिया प्रदेशका केइ सरकारि हाकिमले लगइ पावलकिलाइ भलाइ सोचिबर भण्यो, “रङ्गशालाका भितर जाइबर आफ्नो ज्यानलाइ खतरामी जन पाणै।”

32रङ्गशाला भितर सब मान्सन, कोइ एक कुरणी कोइ अर्खि कुरणी भणबर कला हाल्लाथ्या, रे सब कुरणी गडबड थ्यो। रे भौत मान्सनलाइ क्याइ जम्मा भया हुन त्यो लगइ था थेइन। 33भिडमि भया केइ मान्सनले अलेक्जेण्डर भण्न्या मान्सलाइ भिडका अगाडी सारदियो। यहुदि मान्सनले कला हालिबर उनलाइ हुन्नारया घटनाका बारेमि भण्यो। अलेक्जेन्डरले हातले इसारा अरिबर मान्सनलाइ सान्त बस्साइ भण्यो, रे केइ बोल्ल खोज्यो। 34तर उनलाइ यहुदि मान्स, बिश्वासि मान्सनकि जसेरि मुर्तिपुजा अद्दाइन, सब जनाले एकइ आवाजमी लगभग दुइ घन्टा जति, “एफिसस बासिकि देबी आर्तेमिस महान हुन” भणबर कला हाल्यो।

35सहरका हाकिमले मान्सनलाइ सान्त अर्या पछा भण्यो, “हे एफिसस बासि हो, सब मान्सन जाण्नाहान कि एफिसस सहरका मान्सनले महान देबी आर्तेमिसको मन्दिरको हेरचाह अद्दा छन, रे उनरो मुर्ति अग्गास बठेइ झण्याथ्यो। 36यिसो हुन्ज्या तमन सान्त हो, यिसेरी जोसमि आइबर केइ नसोचि केइ काम अद्दु निको होइन। 37तमनले समाइबर लेया मान्सनले न त हामरो मन्दिरलाइ लुट्या छ, न त तिननले हामरो देबीको निन्दा अर्याछ। 38तबइकिलाइ डेमेत्रियस रे उनरा कारिगर साथिन कसइको बिरोधमी केइ कुरणी छ भण्या, तिननले अदालतमि गइबर, मान्सनको न्याय अद्द्या मान्सका अगाडी एक अर्खालाइ दोस लाउन सक्दाहान। 39आजी तमन तइ भण्न्ना बड्ता केइ कुरणी अद्दु चाहान्छौ भण्या सहरका सभाघरमी बोलाइबर तइ कुरणीको सोधपुछ अद्द सकन्छौ। 40मलाइ डर छ कि ठुला हाकिमले यो सब हुल दङ्गाका बारेमि सुण्यो भण्या, हामलाइ भण्न्या छन कि हाम रोमी सरकारका बिरुद्दमि हुलदङ्गा अद्द्या कोशिस अद्दाथ्या।” 41यिन कुरणी भणबर उनले सभालाइ बिदा अर्यो।

Currently Selected:

प्रेरित 19: DTYNT

Highlight

Copy

Compare