प्रेरित 13

पावलको पइलो प्रचार यात्रा

1एन्टिओखिया सहरका मण्डलिमि अगमबक्तान, रे शिक्षा दिन्याबाला मान्सन भौत थ्या, तिनन बारनाबास, नीगर भणिन्या शिमियोन, कुरेनि सहरका लुकियस, रे देशको एक चउथाइ भागको राजा हेरोदसित हुर्क्या मनेन रे शाउल थ्या। 2तिननले प्रभुको आराधना अद्दारया रे उपवास बस्या बेला पबित्र आत्माले भण्यो, “मेरा निउति बारनाबास रे शाउललाइ तइ कामकी निउति छुट्या, मेरा सेवाकि निउति मइले तिननलाइ बोलाइराइछु।” 3तब तिननले आजी उपवास रे प्रार्थना अरिबर उनमी आफना हात राखिबर उनलाइ परमेश्वरको सेवा अद्दाइ पठायो।

4बारनाबास रे शाउललाइ पबित्र आत्माले पठाया हुनाले तिनन एन्टिओखिया सहर बठेइ सिलुकिया सहरमि गया, रे ताँ बठेइ जहाजमि चड़िबर साइप्रस टापुमि गया। 5सलामिस सहरमि आइपुग्या पछा तिननले यहुदि सभाघरमी परमेश्वरको सुसमाचार प्रचार अद्द पस्या। तिननलाइ सायता अद्दाइ मर्कुस भणिन्या यूहन्ना तिननसित थ्या।

6तइ पछा तिननले सब साइप्रस टापुको एक गाउँ बठेइ अर्खा गाउँमी घुम्या, रे छाड्डीबार तिनन पाफोस सहरमि पुग्या, तब ताँ तिननले एक जाना यहुदि झुटो अगमबक्ता बार येशू भण्न्या एक जादुगर भेट्यो। 7त्यो जादुगर तइ साइप्रस टापुका ठुला हाकिम सर्गियस पौलससित बसन्थ्यो। सर्गियस पौलस बुद्दिमान मान्स थ्यो। तिन ठुला हाकिमले शाउल रे बारनाबासलाइ बोलाइबर परमेश्वरको बचन सुण्न्या इच्छा अर्यो। 8तर एलुमास जादुगरले (एलुमासलाइ ग्रीक भाषामि तइका नाउँको अर्थ जादुगर हो) सर्गियस पौलसलाइ येशूमि बिश्वास बठेइ फर्काउनाइ खोज्यो। 9तर शाउल, जइलाइ पावल लगइ भणिन्छ, पबित्र आत्माले भरिबर एलुमासलाइ एकहोरो हेरिबर भण्यो, 10“तु सैतानको चेलो, सारा धार्मिकताको दुस्मन, सब छल रे दुष्टताले भरिया। कि तु प्रभुको सोजो बाटो बाङो बनाउन छाड्डैनि? 11आब हेर प्रभु तुलाइ सजाय दिन्याबाला छन, रे तु आब केइ समय सम्म घामको उज्यालो नधेक्द्या होइबर कानो हुन्या हइ।”

पइ उतन्जेइ कुइड़ो रे अनाराले तइलाइ ढाक्दियो, रे कसइले तइको हात समाइबर सायता अद्द्या छ भणि त्यो इथउथ जान लाग्यो। 12तब प्रभुको शिक्षामि भया सक्ति धेकबर ठुला हाकिम अचम्म पड्या रे उनले प्रभु येशूमि बिश्वास अर्यो।

पिसिदियास जिल्लाको एन्टिओखिया सहरमि पावलको शिक्षा

13पावल रे तिनरा साथी भाइन पाफोस सहर बठेइ जहाजमि चड़िबर सुरुमि पामफिलिया जिल्लाको पर्गा सहरमि पुग्या, रे मर्कुस भणिन्या यूहन्ना तिनन बठेइ छुटिबर यरुशलेम सहर फर्क्या। 14तर तिनन पर्गा सहर बठेइ जहाजमि चडिबर गलातिया प्रदेसको पिसिदियास जिल्लाको एन्टिओखिया सहरमि पुग्या, रे बिश्राम दिनमि यहुदि सभाघर भितर गइबर बस्या। 15आब मोशाको कानुन रे अगमबक्तानले लेख्या किताब पढ्या पछा यहुदि सभाघरको सासकले तिननलाइ बोलाइबर भण्यो, “ए भाइन हो, तमनसित मान्सनका निउति केइ उत्साहको सन्देश छ भण्या भण।”

16तब कलिबर पावलले हातले इसारा अरि भण्यो, “हे इस्राएल देशका मान्सन रे परमेश्वरसित डर माण्न्या गैर-यहुदि मान्सन हो, सुण, 17इस्राएल जातिका परमेश्वरले हामरा पिता-पुर्खालाइ छानिबर मिश्र देशमि हुन्ज्या तिननलाइ महान बनायो। आफ्नो सक्तिशाली काम धेकाइबर परमेश्वरले तिननलाइ मिश्र देस बठेइ निकाल्यो 18उजाड ठाउँमि लगभग चालिस बर्ष सम्म परमेश्वरले तिनरो हेरचाह अर्यो, पइलगइ तिननले बेर बेरि उनरो आज्ञा माणेइन। 19तब उनले कनान देशका सात जातिलाइ नास पाड़िबर, तइ देस हामरा पिता पुर्खालाइ दियो। यइ प्रक्रियामी लगभग चार सय पचास बर्ष लाग्यो।”

20“हामरा पुर्खाले तिनरा पुर्खालाइ मिश्र देशमि आया चार सय पचास बर्ष पछा कानन देशमि अधिकार अद्द सुरु अर्यो। परमेश्वरले शमुएल अगमबक्ता सम्म इस्राएल देशका मान्सनमि राज्य अद्दाइकिलाइ न्यायकर्ता छान्यो। 21जबकि शमुएल अगमबक्ता अइल सम्म तिनरा न्यायकर्ता थ्या, पछा तिननले राजा माग्यो, रे परमेश्वरले बेन्यामीन कुलका कीशको चेलो शाउललाइ चालिस बर्ष सम्म तिननमि राज्य अद्द दियो। 22रे परमेश्वरले शाउललाइ हटाया पछा तिनरा ठाउँमि दाउदलाइ राजा बनायो। दाउदका बारेमि परमेश्वरले यिसेरी भण्यो, ‘मइले यिशैको चेलो दाउदलाइ भेटन्ज्या मइले मन पण्याको मान्स पाया छु, जइले मेरा सब इच्छा पुरा अद्द्या हो।’”

23“यइ मान्सनको आउन्या सन्तान बठेइ, उनरो बाचा अन्सार, परमेश्वरले इस्राएल देशकि निउति एक मुक्तिदाता पठायो, जो येशू हुन। 24उन आउना हइ पइल्ली यूहन्नाले इसो भणबर प्रचार अर्यो कि इस्राएल देशका सब मान्सलाइ पाप अद्द छाडिबर परमेश्वरतिर फर्कनु रे बप्तिस्मा लिनु जरुरी छ। 25यूहन्नाले आफ्नो काम सकीन्या बेला भण्याथ्यो, ‘तमन मलाइ मुक्तिदाता हो कि भणबर चिन्न चाहान्छौ, त्यो तम ख्रीष्ट होइन। तर म पछा एक जाना आउन्याहुन, उन म हइ भौत महान छन, कि म उनारा खुट्टाको जुता ताना खोलल्या लायकको आथिन।’”

26“ए अब्राहामका बंशका सन्तान, रे तमनमि हइ परमेश्वरको डर माण्न्यावाला गैर-यहुदि भाइन हो, परमेश्वरले हामरा वाँ यो मुक्तिको सन्देश पठाया छ। 27यरुशलेम सहरका मान्सन रे तिनरा अगुवानले येशू ख्रीष्टलाइ पछणेइन रे अगमबक्तानले पबित्र सास्त्रमि लेख्या कुरणी हरेक बिश्राम दिनमि पड्या लगइ तिनन बुज्जाइन। तबइकिलाइ तिननले उनलाइ दोषि बनायो, रे अगमबक्ताको बचन पुरा भयो। 28मृत्यु दण्ड दिन्या दोस केइ नपाया लगइ तिननले येशूलाइ माद्दु पणन्छ भणि पिलातस हाकिमसित बिन्ति अर्यो। 29रे उनरा बारेमि पबित्र सास्त्रमि लेखिया सब कुरणी पुरा अर्या पछा तिननले उनलाइ क्रुस बठेइ निकालिबर चिहानमि राख्यो। 30तर परमेश्वरले उनलाइ मर्या बठेइ जिउना बनायो। 31उनसित गालील जिल्ला बठेइ यरुशलेम सहरमि आउन्याका वाँ उन भौत दिन सम्म धेका पड़िरया, रे जइले उनलाइ धेक्यो तिनन अइल मान्सनमि उनरा गवाही दिन्ना छन।

32परमेश्वरले पिता पुर्खालाइ अर्या त्यो प्रतिज्ञाको सुसमाचार हाम तमरा वाँ ल्याउनाउ। 33परमेश्वरले कसेरी येशूलाइ मर्या बठेइ जिउना बनायो तइ कुरणी हाम, तिनरा सन्तानकि निउति पुरा अरिदियो, जसो भाजन सग्रहमि परमेश्वरले ख्रीष्टका बारेमि भण्या छ, ‘तु मेरो चेलो हइ, आजका दिन बठेइ म तेरो पिता भया छु।’

34परमेश्वरले ख्रीष्टलाइ मर्या बठेइ जिउना बनायो, रे उनले शरीरलाइ कुन दियइन, यइका बारेमि इसो भणिराइछ, ‘म तमनलाइ राजा दाउदलाइ दिया पबित्र रे अटल आशिस दिनौ।’

35राजा दाउदले यइ कुरणी भजनसंग्रहमि लगइ इसेरि भणिराइछ,

‘तम आफना पबित्र जनको लासलाइ कुन दिन्या होइनु।’”

36“हाम जाण्न्नाउ कि राजा दाउदले आफ्ना बारेमि भण्या थेइन, क्याकि परमेश्वरको उद्देश्य अन्सार सेवा अरिबर मर्या पछा उनरा पिता पुर्खानसित राजा दाउद गाणिया, रे उनरो शरीर कुइबर गयो। 37तर जइ येशूलाइ परमेश्वरले मर्या बठेइ जिउना बनायो उनरो लास कुएइन। 38तबइकिलाइ भाइन हो, तमनलाइ था होउ, कि यिनइ मान्स बठेइ पाप क्षमा हुन्छ भणन्या घोषणा तमनलाइ अरिया छ। 39येशूमि बिश्वास अद्द्या सब मान्सन निर्दोष ठहरिबर, परमेश्वरको अगाडी निका भइरइछन, जो छुटकारा मोशाको कानुन बठेइ तमरा निउति सम्भब थेइन। 40तबइकिलाइ होशियार होउ, नति अगमबक्तानका किताबमी भणिएइ यिन कुरणी तमनमि आइ पड्यइ हुन,

41‘ए निन्दा अद्द्या हो, हेर रे अचम्म माण,

पइ नास होउ,

क्याकि तमरा बेलामि म एक काम अद्दउ,

यिसो काम जइका बारेमि कसइले बयान अरिदिया लगइ

तमन कभइ बिश्वास अद्द्या होइनु।’”

42पावल रे बारनाबास सभाघर बठेइ निकलिबर जान्या बेला आउन्या बिश्राम दिनमि लगइ यिन कुरणी सुणाइदिय भणि मान्सनले तिननलाइ बिन्ति अर्यो। 43सभा सकिया पछा भौत यहुदि रे यहुदि धर्म माण्न्या मान्सन पावल रे बारनाबासइका पछा लाग्या, रे तिननले उननसित बोल्ला बोल्लाइ तिननलाइ परमेश्वरको अनुग्रहमी रइरया भणि बिन्ति अर्यो। 44अर्खा बिश्राम दिनमि सब सहरका मान्सन परमेश्वरको बचन सुण्नाइलाइ उल्टिबर आया। 45भीड़ धेकइन्ज्या, यहुदि अगुवान डाहले भरिया रे पावलले भणेइ कुरणीको बिरोध अर्यो, रे तइको निन्दा अर्यो। 46तर पावल रे बारनाबासइले साहास अरिबर भण्यो, “परमेश्वरको बचन सब भण्ना पइल्ली तमनलाइ सुणाउन आवश्यक थ्यो। तमनले यइलाइ अस्वीकार अरिबर आफइलाइ अनन्त जीवनको अयोग्य बनाया हुनाले हाम आब गैर-यहुदि मान्सनका वाँ जानाउ।

47प्रभुले हामलाइ यिसो आज्ञा दिइराइछ,

‘धर्तिका बल्लापल्ला किनारमी जा,

रे तिननलाइ भण कि परमेश्वरले तिननलाइ कसेरी बचाउन चाहानाहान,

मइले तमनलाइ गैर-यहुदि मान्सनको बिचइनि ज्योति दिनाइ नियुक्त अरिराइछ।’”

48जब गैर-यहुदि मान्सनले यिन कुरणी सुण्यो, तिनन खुशी भया, रे परमेश्वरको बचनको प्रसंसा अर्यो, रे अनन्त जीवनका निउति परमेश्वर बठेइ छानिया मान्सनले येशू ख्रीष्टमी बिश्वास अर्यो। 49प्रभुको बचन सब इलाका भरि फैलियो। 50तर पावल रे बारनाबासका बिरोधमी यहुदि अगुवानले भक्त, आदर पाएइ स्वानिन रे सहरका ठुला ठुला मान्सनलाइ उरेयो, रे तिननलाइ आफ्नो इलाका बठेइ बाइर धपाइ दियो। 51तर पावल रे बारनाबास तिननलाइ धेकाउनाइलाइ परमेश्वरले तिननलाइ अस्वीकार अर्यो रे तिननलाइ सजाय दिन्या छन, भणि आफना खुट्टाको धुलो ट्ट्केइ दियो, रे तिनन आइकोनियन सहरमि गया। 52एन्टिओखिया सहरमि भया सब शिष्या आनन्द रे पबित्र आत्माले भरिया।

Currently Selected:

प्रेरित 13: DTYNT

Highlight

Copy

Compare