२ तिमोथी 4

परमेश्वरको बचन प्रचार अर

1जब येशू ख्रीष्ट राजा भइबर सासन अददाइ आउन्याहुन, उनले दुएइको न्याय अद्द्या हुन जो जिउना छन रे जो मर्या छन। तबइकिलाइ परमेश्वर रे ख्रीष्टलाइ साक्षिका रुपमि राखिबर म तुलाइ बिन्ति अद्दउ। 2कि तुइले परमेश्वरका बचनको प्रचार अर, परिस्थिति असल रे खराब जी भया लगइ यइलाइ प्रचार अददाइ तयार बस। तुइले मान्सनले अर्या गल्ती धेकाउनु पणन्छ, रे तिनरा पापकिलाइ तिननलाइ हप्काउनु पणन्छ। तर तुइले धैर्यसित मान्सनलाइ सिकाउङया उत्साह लगइ दे।

3क्याकि इसो समय आउन्ना छ, जब तिननले सत्य शिक्षालाइ स्वीकार अद्द्या होइन्न, तर तिननले आफ्ना इच्छा अन्सार हिट्या हुन रे तिननले भौत शिक्षकका कुरणी सुणन्या हुन। 4तिननले परमेश्वरको सत्य बचन सुणन्या होइन्न तर असत्य, दन्त्य काहानिलाइ सुणन्या हुन। 5तर जी भया लगइ तुइले सदाइ आफइलाइ नियन्त्रण अददु पणन्छ, रे दुःख भोग्दु पणन्छ। तुइले सुसमाचार प्रचार अद्दाइ कडा मिहेनत अददु पणन्छ रे परमेश्वरको सेवक भया हुनाले परमेश्वरले दिया सब काम पुरा अददु पणन्छ।

6म तमनलाइ यो आदेस दिन्नाछु क्याकि मेरो जीवन परमेश्वरलाइ बलिको रुपमि चडाइ सकिया छ, क्याकि मलाइ था छ कि मेरो संसार बठेइ बिदाइको बेला आइरइछ। 7युद्दमि असल सिपाइकि जसेरि जइले कभइ लडाइ लड्ड छाड्डइन, मइले, लगइ ख्रीष्टकिलाइ कडा मेहनत अददु कभइ छाड्डइन, येशू ख्रीष्टले मलाइ अददाइ दिया काम पुरा अरिसक्या छु, म अन्तिम सम्म बिश्वासयोग्य होइरइछु। 8आब, प्रभुले स्वर्गमि मेरा निउति एक इनाम राख्या छन क्याकि मइले उनलाइ खुशी पाड्डया जीवन बिताया छु। प्रभु, जइले सबको ठीकसित न्याय अददाहान, उनले मलाइ इनाम त्यो दिन दिन्या हुन जब उन फर्कि आउन्याहुन। तर यो इनाम उनले मलाइ मान्तर होइन, तर तिनन सबलाइ दिन्या हुन जइले उनरो फर्कि आउन्या दिनकिलाइ उत्सुक भइबर पखिरइछन।

व्यक्तिगत कुरणी

9तिमोथी, तु मेरा वाँ छिट्टाइ आउनाइलाइ कोशिस अर। 10क्याकि डेमासले यइ संसारमी भया चीजलाइ प्रेम अरन्छ रे मलाइ त्यागिबर उ थेसलोनिके सहरमि गया छ, भाइ क्रेसेन्स गलातिया प्रदेशमि गया छ, रे तीतस दलमातिया प्रदेशमि गया छ।

11लूका मान्तर मसित छ। जब तु आउछइ, मर्कुसलाइ लगइ आफसित लेइबर आ, क्याकि उइले याँ मेरा काममी सहयोग अद्दया हो। 12तर तुखिकसलाइ मइले एफिसस सहरमि पठाया छु। 13जब तु आउछइ मइले त्रोआस सहरमि भया कार्पसका घरमि छाडया कोट लेइबर आ। रे मेरा किताब लेइबर आ जो बिसेस अरिबर भेडाका छाला बठेइ बन्या छन।

14धातुको काम अद्द्या अलेकजेन्डरले मलाइ हर किसिमले दुःख दियो। प्रभुले तइसित तइका दुष्ट काम अन्सार बदला लिन्या हुन। 15तु तइ बठेइ आफइ होशियार बस, क्याकि तइले ख्रीष्टका बारेमि हामरो शिक्षाको भौत बिरोध अर्यो। 16जब म पइल्ली बेर अदालतमि आफइलाइ सत्य साबित अददाइ गया तब कोइलगइ मेरो पक्षमि थेइन्न। तर सबले मलाइ छाड्यो। परमेश्वरले यइ कुरणिका बिरोधमी तिननलाइ केइ जन अरुन। म प्रार्थना अद्दउ कि तिननले मलाइ छाड्या कुरणीकिलाइ परमेश्वरले क्षमा अरुन।

17तर प्रभु मेरा पक्षमि थ्या, रे उनले मलाइ बल दियो, ताकि मइले येशू ख्रीष्टका बारेमि सुसमाचार निक्केरि प्रचार अद्द सकु ताकि तिन सब गैर-यहुदि मान्सन जो अदालतमि थ्या, तिनन सबले यो सुण्न सकुन। भोकाया सिंहका मुख बठेइ बच्या जसेरि उनले मलाइ मृत्यु बठेइ बचायो। 18रे प्रभुले मलाइ सब दुष्ट आक्रमण बठेइ बचाउन्या हुन, रे उनले मलाइ उनरो स्वर्गीय राज्यमि लइजान्या हुन, जाँ उन राजा भइबर राज्य अददाहान। उनलाइ सदासर्वदा महिमा होउ। आमेन।

आखिरी अबिबादन

19प्रिस्किला रे उइको लोगन्या अकिलासलाइ रे ओनेसिफरसको परिवारलाइ मेरो अबिबादन भणिदिय। 20इरास्तस कोरिन्थ सहरमि बस्यो, रे त्रोफिमसलाइ मइले मिलेटस सहरमि बिरामी अवस्थामी छाड्या। 21सकभर हिउन लाग्दा हइ पइल्ली आउन्या कोशिस अर। और सब भाइन: युबुलस, पुडेस, लिनस, क्लौडियाले लगइ तिनरो अबिबादन पठाइराइछ।

22म प्रार्थना अद्दउ कि प्रभु तुसित रउन रे उनरो अनुग्रह लगइ तुसित होउ।

Currently Selected:

२ तिमोथी 4: DTYNT

Highlight

Copy

Compare