२ कोरिन्थी 8

उद्दारताकी निउति प्रोत्साहान

1बिश्वासि भाइन हो, माकेडोनिया प्रदेसका मण्डलिका बिश्वासिनलाइ परमेश्वरले अर्याको अनुग्रहका बिसयमि हाम तमनलाइ बताउन चाहानाउ। 2जब तिनन भौत कष्ट बठेइ परीक्षामि पण्या, तिनन भौत आनन्दित भया रे तिनन भौत गरिब भया लगइ तिननले उदार-चित्तले और बिश्वासिनलाइ सहयोग अददाइ दान दियो। 3क्याकि म गवाही दिनउ कि तिननले आफ्नो योग्यता अन्सार रे योग्यता भण्ना बरता लगइ आफना इच्छा अनसार दियो। 4तिननले यरुशलेम सहरमि भया पबित्र जनका सहायताका निउति भाग लिन्या मौका पाउँ भणबर हामलाइ आग्रहपुर्वक बिन्ति अर्यो। 5हामले तसो अपेक्षा अर्या लगइ थेइन, तर तिननले पइल्ली आफइलाइ प्रभुमि अर्पण अर्यो रे तइ पछा तिननले परमेश्वरको इच्छामि आफइलाइ हामरो अनुसरण अददाइलाइ सुम्पिदियो।

6तबइकिलाइ तीतसले पइल्ली बठेइ तमरा बिचमि यो दान उठाउन्या काम सुरु अर्या हुनाले, त्यो पुरा लगइ अरुन भणि हामले तिनलाइ बिन्ति अर्या। 7तर जसेरि सब कुरणीमि तमन बडिबर गया छौ, त्यो भण्या बिश्वासमि, प्रचारमि अथवा सिकाउनामि, ज्ञानमि, सब जोसमि रे हाम प्रतिको तमरो प्रेममि, तसेरि गरिब बिश्वासिनलाइ दान दिन्या यइ काममी लगइ बड्डाइ जा।

8मइले यो आज्ञाका रुपमि भण्या होइन तर औरका जोससित तुलना अरिबर तमरो प्रेम लगइ सत्य हो भण्न्या प्रमाणित अद्दाइलाइ मइले यो भण्या हु। 9क्याकि हामरा प्रभु येशू ख्रीष्टको अनुग्रह तमनलाइ था छ, उन धनि थ्या, पइलगइ तमरा खातिर उन गरिब भया ताकि उनरो गरीबी बठेइ तमन धनि हुन सक।

10पोर साल तमन दिन्या काममी सब भणन अगाडी मान्तर होइन, तर तसो अद्दया इच्छामि लगइ सब भणन अगाडी थ्या। यइ बारेमि तमरा निउति मेरो उत्तम सल्लाह यइ हो:

11आब तमनले सुरु अर्या कामलाइ पुरा अर तमनसित भया अनसार जाति दिन सकन्छौ दिय। तमन यइ कामलाइ सुरु अददाइ उत्सुक भया जसेरि यइलाइ पुरा अददाइ लगइ उत्सुक हुनु पणन्छ। 12क्याकि यदि तमन और मान्सनलाइ दान दिन चाहन्छौ भण्या तमनसित भया अनसारको दानइ ग्रहणयोग्य हुन्छ, नभया ए अनसार होइन।

13और मान्सनको जीवन सजिलो बनाउनाइ तमरो जीवन असजि होस भणन्या म चाहानइन। तर सबलाइ यो समान रुपमि हुनु पणन्छ। 14अइल तमरा प्रसस्ता बठेइ तिनरा खाचोमी सहयोग अर, ताकि भविष्यमी तिननसित प्रसस्त भया बेला तमरो अभावमि तिननले तमनलाइ सहयोग अद्द्या हुन। इसेरि सबइको खाचो पुरा हुन्छ। 15जसो पबित्र सास्त्रमि लेखिया छ, “भौत बटोल्ल्या सित बरताइ केइ रएइन रे कम बटोल्ल्यालाइ अभाब भएन।”

तितस कोरिन्थ सहरमि

16म परमेश्वरलाइ धन्यबाद दिनउ, जइले तीतसका हृदयमि तमरा निउति तसइ फिक्री राख्दियो, जसो म अद्दया अद्दउ। 17क्याकि हामले तमरा वाँ जानाइ अनुरोध अरन्ज्या तिनले हामरो अनुरोधलाइ माण्या मान्तर होइन, तर आफइ लगइ भौत उत्साहित होइबर आफनाइ इच्छाले तमरा वाँ आउन्ना छन। 18रे हाम तिनसित अर्खो बिश्वासि भाइलाइ पठाउन्नाछु, जइले सुसमाचार प्रचारका काममी सब मण्डलिका बिश्वासीका बिचमि उच्च आदर पाया छ। 19रे इति मान्तर होइन तर प्रभुका महिमाको निउति रे यरुशलेम सहरका बिश्वासिनलाइ हाम सहयोग अददाइ उत्सुक छौ भणि धेकाउनाइलाइ हामले अददार्या असल काममी भेटी लेइबर हामसित यात्रा अददाइ मण्डलि बठेइ तिन नियुक्त भया छन। 20उदारचित्तले दिया यो दान दुरुपयोग अद्दतक तइ बिसयमि कसइले हामलाइ दोस जन ला भणबर हाम तितससित तइ बिश्वासि भाइलाइ पठाउन्नाछु। 21क्याकि हाम प्रभुको नजरमि मान्तर होइन तर मान्सका नजरमि लगइ जी आदरणीय छ त्यो काम असल तरिकाले अददाइ आफ्नो ध्यान दिनाउ।

22रे तितससित हाम एक अर्खा बिश्वासि भाइलाइ पठाउन्नाछु, जइलाइ हामले भौत बेर जाँचिबर भौत कुरणीमि जोसिला पाया छु। तमन प्रति भया तिनरो ठुलो भरोसाका लाग्दा तिन आजी बरता जोसिला भया छन। 23तीतस मेरा संगी रे तमरा सेवामि मेरा सहकर्मी हुन रे भाइन भण्या तिनन मण्डलिका छान्या शिष्या हुन रे तिनरो जीवन ख्रीष्टको प्रशंसाकि निउति हो। 24तबइकिलाइ तमनले तिननलाइ आफ्नो प्रेम धेका, रे मण्डलिका सब बिश्वासिनलाइ प्रमाणित अर कि हामले तमरा बारेमि अर्या घमण्ड सत्य हो।

Currently Selected:

२ कोरिन्थी 8: DTYNT

Highlight

Copy

Compare