१ तिमोथी 5

मण्डलिका मान्सन सितको ब्यबहार

1आफ भण्ना बड्ता उमेर भया मान्सलाइ अपमान अरिबर जन हप्का, रे आफ्नाइ बालाइ जसेरि तिननलाइ सल्लाह दिय, आफ भण्ना कान्छालाइ आफ्नाइ भाइलाइ जसोइ ब्यबहार अर। 2आफ भण्ना बड्ता उमेर भया आइमाइसित आफ्नि इजालाइ जसोइ ब्यबहार अर, आफ भण्ना कान्छीसित आफ्नि बहिनिलाइ जसोइ ब्यबहार अर। यो सुद्द ह्रदयले अर।

बिधवालाइ आदर

3तिन बिधवालाइ आदर धेका जइसित तिनरो खाचो पुरा अद्द्या रे हेरचाह अद्द्या कोइ आथिन। 4कसइ बिधवाका चेला-चेली रे नाति-नतिना छन भण्या तिननले सब भण्ना पइल्ली आफनी परिबारको हेरचाह अरिबर परमेश्वरका सन्तानकि जसेरि जीवन बिताउनु पणन्छ, रे तिनरा इजा-बा अथवा बज्या-बजेइको हेरचाह अरिबर गुण तीददु पणन्छ। क्याकि परमेश्वरलाइ इसोइ मन पणन्छ।

5तिन बिधवा जइसित तिनरो खाचो पुरा अद्द्या रे हेरचाह अद्द्या कोइ आथिन, तिनले परमेश्वरइमी आसा राखन्छिन, रे रातदिन नम्र निबेदन रे प्रार्थनामि परमेश्वरसित सहायता मागेइकि हुन्छिन। 6तिन बिधवा जइले आफ्नो सब समय सुखमि बिताउछिन तिन सरीरमि बचेइ हुन्छिन तर आत्मामी मरेइ हुन्छिन।

7यिन सब आदेस बिश्वासिनलाइ भणिदिय ताकि कसइले तिननलाइ दोस लाउन जन सकुन। 8तर यदि कोइ आफ्नोइ नातेदारको रे बिसेस अरिबर आफनाइ परिवारको हेरचाह अद्दइन भण्या त तइले प्रस्ट धेकाउन्छ कि तइले ख्रीष्टमी बिश्वास अद्दइन रे बिश्वास नअद्दया भण्नालगइ खराब हुन्छ।

9जब कोइ बिधवा साठी बर्ष भण्ना मल्तिरकि छ, रे उ एकइ बैकान कि स्वानी छ भण्या तइलाइ मान्तर तमनले बिधवाको सुचीमि राख्द सकन्छौ। 10और मान्सन पक्‍का हुनु पणन्छ कि तइले सदाइ निको काम अर्याछ, उदाहरणकिलाइ: तइले आफ्नो चेला-चेलीलाइ निक्केरि हुर्काया, नचिन्या मान्सनलाइ आफना घरमि स्वागत अर्या, तइले परमेश्वरका जनको नम्र भइबर सेवा अर्या, रे तइले समस्यामि भया मान्सनलाइ सहयोग अर्या। तइले यिन सब असल कुरणी अद्दाइलाइ आफइलाइ समर्पित अर्या हुनु पणन्छ।

11जबान बिधवाको नाउँ बिधवाको सुचीमि जन लेख्या क्याकि जब तिनरो बिधवा रइबर ख्रीष्टलाइ सेवा अद्द्या बाचा भण्ना मानब इच्छा बड्ता हुन्छ, तब तिनन आजी ब्या अददाइ चाहान्छिन। 12आजी ब्या अरिबर तिनन आफइ न्यायको कारण बन्नेइ हुन, क्याकि तिननले आफ्नो पइलो बाचा तोड्या छन।

13तइ बाहेक तिनरि अल्छी हुन्या बानि हुन्छ, घर-घर घुमीन्छिन। तिनन अल्छी मान्तर हुनिन्न तर अर्खाकि कुरणी काट्नछिन, रे और मान्सन काँ वाँ जाइबर तिननलाइ काम अद्दा बठेइ रोक्दाहान, रे भणनु नपड्डेइ कुरणी भणन्छिन। 14तबइकिलाइ म सल्लाह दिनउ। जबान बिधवाले ब्या अरुन चेलाचेली पाउन घरबार सम्हालुन। ताकि बिरोधिले तिनरा बिरुद्दमि केइ भणन सक्द्या होइन। 15म यो भणनउ क्याकि केइ जबान बिधवानले परमेश्वरको आज्ञा माणन छाड्या छन बरु सैतानले खोज्याको काम अददाछिन। 16यदि कसइ बिश्वासि स्वानिका परिबारमि बिधवा छन भण्या स्वानिले तिनरो हेरचाह अददु पणन्छ रे। उइले और मण्डलिका मान्समि तिननलाइ सहयोग अद्दइ आसा जनराखुन। ताकि मण्डलिका मान्सले औरलाइ सहयोग अद्द सकुन जइको सहयोग अद्द्या कोइ आथिन।

बचन सिकाउन्याको आदर

17कोइलगइ मण्डलिको अगुवा जइले आफ्नो काम निक्केरि अरन्छ, तइलाइ उचित आदर रे पर्याप्त पैसा पाउन्या सम्जीनु पणन्छ, बिसेस अरि तिनन जइले परमेश्वरको सन्देश सिकाउनाइ रे प्रचार अद्दाइ कडा मेहनत अद्दाहान। 18क्याकि पबित्र सास्त्रमि लेखिया छ, “दाँइ अरङया गोरुका मुखमि मानो जनलाया,” रे आजी अर्खा ठाउँमि पबित्र सास्त्रमि लेखिया छ, “खेताला आफना द्याणीको लायक हुन्छ।”

19एक मण्डलिका अगुवाका बिरुद्दमि लायाको आरोपलाइ तब सम्म जन सुण जबसम्म दुइ अथवा तीन मान्सनले एकइ कुरणीकिलाइ तइलाइ आरोप जनलाउन। 20जइ मण्डलिका अगुवाले पाप अरिराख्दाहान सब मण्डलिका मान्सका अगाडी तिननलाइ हप्का, ताकि बाकि मण्डलिका अगुवा डराउन।

21म तमनलाइ परमेश्वर रे ख्रीष्ट येशूका अगाडी रे चुनिएका स्वर्गदुतका अगाडी यिन कडा आदेस दिनउ, तमनले जी लगइ अरन्छौ तइमि कसइ मान्सनको पक्ष अथवा पक्षपात जन अर। 22कसइमी हात राखिबर तइलाइ अगुवाका रुपमि नियुक्त जन अर, जबसम्म तइले आफलाइ ख्रीष्ट प्रति बिश्वासयोग्य प्रमाणित अद्दइन। नतित तमन लगइ तइका पापकिलाइ जिम्मेबार हुन्या हउ। पक्‍का हो कि तमन पाप जन अर।

23तमन पानी मान्तर जन खा रे बेर बेरि बिराम भया हुनाले तमरा पेटकिलाइ थोकाइ अंगुरको रस खान्या अर। 24कसइ मान्सले पाप अददाहान रे तिनरो ब्यबहार हेद्दाहइ पइल्ली था हुन्छ कि तिननले पाप अर्या छन। तर और मान्सका पाप भण्या भौत समय पछा मान्तर था हुन्छ। 25तसोइ अरिबर कसइ मान्सनले अर्या असल काम और बिश्वासिनलाइ था हुन्छ। यदि कसइ मान्सनले अर्या असल काम अइल नधेक्या लगइ पछा था हुन्छ।

Currently Selected:

१ तिमोथी 5: DTYNT

Highlight

Copy

Compare