१ थेसलोनिकि 4

परमेश्वरलाइ भौत खुशी बनाउनु

1निष्कर्ष यो हो कि बिश्वासि भाइन हो, प्रभु येशूमि हाम तमनलाइ आग्रहपुर्वक बिन्ति अद्दाउ रे माग्दाउ कि परमेश्वरलाइ भौत खुशी बनाउन्या जीवन बिता, जसेरि हामले तमनलाइ सिकायाछौ। तमनले पइल्ली बठेइ इसेरि जीवन बितायाछौ, रे हामले तमनलाइ झिक बड्ता अददाइ उत्साह दिनाउ। 2क्याकि तमनलाइ था छ कि यिन आदेस प्रभु येशूको अधिकार बठेइ हाम तमनलाइ दिनाउ।

3क्याकि परमेश्वरको इच्छा यो हो कि तमन पबित्र हुनु पणन्छ, रे तमनले शरीरका दुष्ट इच्छा अनसार काम अददु पड्डइन। 4पबित्रता रे आदरसित तमन हरेकले आफना शरीरलाइ आफना बसमि राख्द सिक्दु पणन्छ। 5तर तमन परमेश्वरलाइ नचिन्न्या अविश्वासीकी जस्या आफना शरीरका दुष्ट इच्छाको दास जन बन। 6तसोइ अरिबर कसइले आफना बिश्वासीनका बिरुद्दमि पाप जन अरउ अथवा तइको फाइदा जनउठाउ। क्याकि प्रभु येशूले इसा सब काम अद्द्यालाइ दण्ड दिन्या हुन। हामले तमनलाइ यइ बारेमि पइल्ली गम्भीर चेतावनी दियाछौ।

7क्याकि परमेश्वरले हामलाइ अनैतिक जीवन बिताउनाइलाइ होइन तर पबित्र जीवन बिताउनाइलाइ बोलाया छ। 8तबइकिलाइ जइले यो आज्ञा माणनइन तइले मान्सनको होइन तर परमेश्वरको आज्ञा माणनइन, जइ परमेश्वरले तमनलाइ आफ्नो पबित्र आत्मा दिनाहान।

प्रेम रे काम

9तर बिश्वासि भाइनकिलाइ प्रेमको बारेमि कसइले तमनलाइ लेख्द जरुरी आथिन, क्याकि एक-अर्खालाइ प्रेम अद्दु भण्न्या कुरणी तमन आफइले लगइ परमेश्वर बठेइ शिक्षा पायाछौ। 10माकेडोनिया प्रदेसमि भया आफ्ना भाइनलाइ तमनले पइल्ली आफ्नो प्रेम धेकायाछौ। तर बिश्वासिन हो, झिक बड्ता तसोइ अद्दाइ जा भणि हाम तमनलाइ बिन्ति अददाउ। 11हामले तमनलाइ आज्ञा दिया जसेरि तमन सान्ति सित जीवन बिता, रे और मान्सनका काममी हस्तक्षेप जन अर आफ्नि खाचोकी निउति आफइ काम अर। 12ताकि अबिश्वासीले हरक दिन तमरो ब्यबहार धेक्द्या हुन रे तमनलाइ आदर अद्दया हुन। रे तमन आफना खाचोकीलाइ कसइका भर पड्डया होइन।

प्रभुको फर्कि आउन्या दिन

13बिश्वासि भाइन हो, जो पइल्ली मरिसक्या छन तिन बिश्वासिनलाइ कि हुन्या हो तइ बिसयमि हाम तमनले जाण्याको चाहानाउ अददाउ, रे तमनले आसा नहुन्या मान्सनकि जसेरि सोक अद्दु पड्डइन। 14क्याकि हाम बिश्वास अद्दाउ कि येशू मर्या रे मर्या बठेइ जिउना भया, तसेरि परमेश्वरले तिन बिश्वासिन जो पइल्ली मर्या छन तिननलाइ येशूसित ल्याउन्या हुन। 15प्रभु येशूको बचन बठेइ हाम तमनलाइ घोषणा अद्दाउ, कि हाम, जो जिउनाछौ जब प्रभु फर्कि आउन्याहुन तब पइल्ली मर्या बिश्वासि भण्ना अगाडी हाम उनलाइ भेट्या आथिन।

16क्याकि प्रभु येशू स्वयम आज्ञाको ठुलो गर्जनसित, प्रधान स्वर्गदुतको आवाज रे परमेश्वरका तुरहिको आवाजसित स्वर्ग बठेइ ओल्लया हुन, रे ख्रीष्टमी मर्या बिश्वासि पइल्ली जिउना हुन्या हुन। 17तब हाम जो बाँच्याछौ रे छाडियाछौ प्रभु येशूलाइ अग्गासमी भेट्टाइ तिनन सङ-सङइ बादलमि उठाइबर लइयइन्या हु, रे तइ बेला बठेइ हाम सदाइ प्रभुसित रन्या हु। 18तबइकिलाइ एक-अर्खालाइ यिन बचनले उत्साह दिय।

Currently Selected:

१ थेसलोनिकि 4: DTYNT

Highlight

Copy

Compare