१ कोरिन्थी 8

मुर्तिलाइ चडाया खाना

1आब मुर्तिलाइ चडाया खान्या कुरणीका बारेमि तमनले सोध्या प्रस्नको उत्तर यो हो: हाम जाण्नाउ, कि हाम सबलाइ यिन कुरणिका बारेमि था छ। यिन सब कुरणी जाण्या हुनाले हाम घमण्ड अददाउ, तर प्रेमले हामलाइ औरकि निउति सहयोग बनाउन्छ। 2यदि तमनलाइ केइ था छ भणन्या कसइलाइ लगन्छ भण्या, अइल सम्म तइले साच्ची जाण्नु पड्डया कुरणी केइलगइ जाणन्या हुनइन। 3तर कसइले परमेश्वरलाइ प्रेम अरन्छ भण्या परमेश्वरले तइलाइ चिन्नाहान।

4तसेरि म मुर्तिलाइ चडाया खान्या कुरणीका बारेमि उत्तर दिनउ। हाम जाण्नाउ कि एक मान्तर जिउना परमेश्वर छन, रे यइ संसारमी भया मुर्तिमि जीवन आथिन। 5स्वर्ग रे धर्तीमि इसा भौत कुरणी छन जइलाइ मान्सनले देबी देउता अथवा प्रभु भण्नाहान।

6तर हामरा निउति एकइ परमेश्वर छन, रे उन हमरा पिता हुन।

उनले सब कुरणी बनायो, रे उनइ बठेइ हाम बाँच्चाउ।

तसेरि, हामरा निउति एक प्रभु छन, रे उन येशू ख्रीष्ट हुन।

उनइ बठेइ सब कुरणी बनाइयो रे उन बठेइ हाम जिउना छु।

7तर हामरा कोइ बिश्वासीले अइल सम्म बुज्या आथिन कि मुर्तिमि केइ सक्ति आथिन। क्याकि तिननले पइल्ली यिन मुर्तिको पुजा अद्दया अर्न्थ्या, अइल तिननले जब मुर्तिलाइ चडाया खानाइ खानाहान, तब तिनन गल्तिले यिसो सोच्चाहान कि तिनन अइल लगइ मुर्तिपुजामि सामेल छन। तिनन आफ्ना सोचाइमि पक्‍का आथिन, तिननले गल्तिले सोच्चाहान कि मुर्तिलाइ चडाया खानाइ खायाले तिनन पाप अददाहान।

8तर खान्या कुरणीले हामलाइ परमेश्वरका नजरमि ग्रहणयोग्य बनाउनइन। नखायाले परमेश्वरका नजरमि हाम अयोग्य हुनाइन, रे खाया हुनाले परमेश्वरका नजरमि हाम असल हुनाइन। 9तर होशियार हो, तमरो यो स्वतन्त्रता बिश्वासमि कमजोर भया मान्सनका निउति बिश्वास छाड्डया कारण जन हो। 10तमनलाइ था छ कि यिन मुर्तिमि जीवन आथिन, रे तबइकिलाइ तमनले मुर्तिलाइ चडाया खान्या कुरणी खान सकन्छौ। तर बिश्वासमि कमजोर भया कसइले तमनलाइ ताँ खन्नार्या धेक्द सकन्छ, रे त्यो मान्स लगइ ताँ जान्छ, रे मुर्तिलाइ चडाया खान्या कुरणी खान्छ, जबकि उइले सोचन्छ कि यो खानु पाप हो।

11रे तसो भया हुनाले त्यो बिश्वासमि कमजोर भया बिश्वासीले ख्रीष्टमी बिश्वास अद्द छाणन्छ, जइकिलाइ ख्रीष्ट मर्या हुन। 12रे जब और बिश्वासि भाइनलाइ था छ कि तसो अददु गलत हो, तर तमनले तिननलाइ तसो अददाइ प्रोत्साहित अरिबर तइका बिरोधमी पाप अरन्छौ भण्या, तमन ख्रीष्टका बिरोधमी पाप अरन्छौ। 13तबइकिलाइ यदि मुर्तिलाइ चडाया खान्या कुरणी खाया हुनाले और बिश्वासिलाइ तिनरो बिश्वास छाड्डया कारण हुन्छ भण्या, म कभइ तसा किसिमको खाना खान्या होइन, ताकि म और बिश्वासिलाइ तिनरो बिश्वास छाड्डया कारण जनहु।

Currently Selected:

१ कोरिन्थी 8: DTYNT

Highlight

Copy

Compare