PERNGANDUNGEN 1
1
Ceda ate kerna Jerusalem
1Andiko lengetna Jerusalem; mbarenda seh kal riahna.
Mbarenda ermulia i tengah bangsa-bangsa,
genduari bali ras diberu balu-balu,
si biak raja e enggo jadi budak.
2Gedang-gedang berngi tangis ngandung ia; iluhna maler ku pipina.
Kerina temanna mbarenda la ngapuli ia.
Teman-temanna enggo ngelok, kerina enggo jadi imbangna.
3Kalak Juda enggo jadi budak si musil-musil ipaksa lawes i rumahna nari.
Tading i negeri kalak la lit ingan si ikataken ia empuna.
Ikepung musuh-musuh ia la lit dalanna pulah.
4Genduari la lit kalak si bengket ku bas Rumah Pertoton, nembah tupung wari-wari si badia.
Singuda-nguda ngendeken tangis-tangis janah imam-imam kelsehen nari nge ngenca.
Pintu gerbang enggo melenget, Sion enggo mesui atena.
5Imbang-imbangna enggo menang, ikuasai musuhna ia.
TUHAN kap si mahanca mesui atena, erkiteken dosana si mbelin.
Anak-anakna enggo itangkap dingen iangkut tertaban.
6Kemulian Jerusalem enggo bene,
peminpin-peminpinna desken belkih, si kote perbahan melihe.
Gegehna enggo keri erkiteken iayak-ayak perburu.
7I bas runtuhenna si melenget genduari, Jerusalem nginget kemulianna si nai.
Tupung ia italuken musuh-musuhna, la lit kalak si nampati ia.
Itawai imbangna ia tupung ketalunna.
8Kemulianna enggo bene, manjang-anjang ia janah ciga ate kalak kempaksa.
Kelsehen ia, ibunikenna ayona perban mela iakapna.
Jerusalem jine erbahanca ia melket ibahan dosana si mesangat.
9Kemelketenna teridah kal tapi la icidahkenna sikerajangenna.
Enggo mesangat kal perndabuhna, la lit ise pe si ngasup ngapulisa.
Imbang-imbangna enggo menang, e maka serko ia mindo perkuah ate man TUHAN.
10Imbang-imbangna enggo ngerampuki erta-ertana.
Idahna pe imbangna e bengket ku bas Rumah Pertoton,
ku ja TUHAN ngelarang kalak perbegu bengket ku bas.
11Kelsehen rayatna tupung ia ndaram-ndarami si man pangan.
Itukarkenna erta-ertana guna pangan gelah ola ia mate.
Nina kuta e, “Nehen aku TUHAN, tatap min kiniseranku.”
12“Nehen min aku!” serko ia kempak kalak si mentas arah e.
“La lit pernah kalak ndat ukumen bagi ukumen enda,
ukumen si ibereken TUHAN man bangku tupung paksa Ia merawa.
13IdabuhkenNa api i datas nari api si nciluk pusuhku.
ItogengNa siding man bangku, idampeskenna aku ku taneh.
Jenari itadingkenNa aku ipediatna i bas sui ate si la erngadi-ngadi.
14IpepulungNa kerina dosangku jenari iberkisna jadi sada.
IolahkenNa e i bas kerahungku, seh kote aku nahanken beratna.
TUHAN ngendesken aku man imbangku lanai lit ngasupku ngelawan ia.
15Kerina tenterang si mbisangku iuru-uru TUHAN.
IsuruhNa tentera ngkernepken anak peranangku.
IerikNa bangsangku desken ngerik buah anggur i bas pengeriken.
16E me sabapna matangku teriluh erdire-dire.
La lit kalak si ngasup ngapuli aku, la lit kalak si ngasup petetap ateku.
Musuh enggo naluken aku, bangsangku lanai lit sitandaina.
17Kudadaken tanku, tapi la lit sinampati aku.
Enggo ilebuh TUHAN imbang-imbangku, lako ngepung aku.
Desken barang mbau, ciga ate musuh-musuhku ngenen aku.
18Tapi bujur kap perbahanen TUHAN e, sabap lanai kap ia kuikutken.
O bangsa-bangsa kerina, dengkehkenlah perdiateken kiniseranku.
Anak perana ras si nguda-ngudangku enggo iangkut tertaban.
19Kulebuh teman-temanku, tapi itipuna aku.
Imam-imam ras peminpin-peminpin maten i gedang-gedang pasar-pasar kuta
ndaram-ndarami pangan atena mesuri beltekna si lume.
20O TUHAN, nehen min ateku mesui, mesui kal pusuhku.
Getem kal pusuhku, picet kal ukurku erkiteken dosa-dosangku.
Gedang-gedang dalan lit pembunuhen, i bas rumah pe lit kematen.
21Dengkehken min, kesah-kesah kal aku, la lit si petetap ukurku.
Meriah ukur musuhku perbahan idabuhkenNdu cilaka man bangku.
BerekenNdu dage wari si ipadankenNdu. Bahan dage mesui ate imbang-imbangku bagi si kunanami.
22Ukum min ia kerina perbahan kejahatenna.
Dabuhken min ukumen man bana bagi pendabuhkenNdu ukumen man bangku.
Kelsehen kal aku perban suina, getem kal pusuhku.”
Currently Selected:
PERNGANDUNGEN 1: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.