PERNGANDUNGEN 2
2
Ukumen man Jerusalem
1Rawa TUHAN enggo nutupi Sion alu kegelapen.
Kemulian Israel si meganjang enggo idabuhken.
I bas wari e Rumah Pertoton pe itadingken TUHAN.
2Ikernepken TUHAN kerina kuta-kuta Juda, sada pe lanai ikelengiNa.
IruntuhkenNa benteng-benteng si mbentengi negeri e.
IruntuhkenNa kerajan ras raja-rajana.
3Alu rawana si gara iripukkenNa gegeh Israel.
La Ia nampati tupung reh musuh-musuh.
RawaNa gurlah man banta bali ras api, kai pe kernep ibahanNa.
4IrentangNa anak panahNa man banta desken musuh.
Kerina kita si ermeriah ukur ras ersenang-senang ibunuhNa.
I Jerusalem enda kerina kita ngenanami rawaNa si gara.
5Desken musuh, TUHAN enggo ngeradasken Israel.
Benteng-benteng ras istanana enggo runtuh ibahanNa.
Kepiceten si la erpeltep-peltep enggo ibabaNa man Juda.
6Rumah Pertoton inganNa i sembah enggo meripuk igudamNa.
Wari-wari si badia ras Sabat lanai inget kalak.
Raja ras imam enggo ngenanami gegehna rawa TUHAN.
7Batar-batarNa enggo itulak TUHAN, Rumah PertotonNa si badia enggo itadingkenNa.
IpediatNa imbang ngeruntuhken tembok-tembokna.
Ersurak-surak ia i bas Rumah Pertoton bali ras tupung ia nembah alu dem keriahen.
8 TUHAN enggo netapken maka tembok-tembok Sion la banci lang runtuh.
Enggo ibahanNa ketetapenNa maka la banci lang kuta e radas kerina.
Menara-menara ras tembok-tembokna enggo runtuh kerina.
9Pintu-pintu gerbangna enggo tanem i bas taneh, tiang-tiangna perper seh getem.
Raja ras bangsawanna genduari enggo ibuang.
Undang-undang lanai iajarken, nabi-nabi lanai ndatken pengenehenen i bas Dibata nari.
10Tua-tua Jerusalem kundul i bas taneh, sip saja.
Abu itamakenna i babo takalna, uis guni tanda ceda ate nutupi dagingna.
Singuda-nguda mungkuk takalna seh ku taneh.
11Seleng matangku ndekahsa ngandung, getem kal pusuhku.
Keri gegehku, ceda kal ateku perbahan enggo radas kal bangsangku.
Anak-anak ras anak gara-gara terketes gedang-gedang dalan kuta e.
12Muas ras melihe ia, ngandung ia man nandena.
Gulingen ia i gedang-gedang dalan tempa-tempa luka,
janah manjar-anjar perpatena i bas ampun nandena.
13O Jerusalem si kukelengi, kai nari si banci kubelasken?
Uga denga ningku ngapuli kam? La lit kalak si pernah ngenanami kiniseran si bage kelekna.
Desken lawit si mbelang si la tersibari bage kap kiniseran si jadi man bandu, lanai kap lit si man arapenken.
14Lanai lit si man turinken nabi-nabindu seakaten nuriken si la tuhu.
Khotbahna nebu-nebu kam ngenca sabap la pernah icidahkenna dosa-dosandu.
Ibahanna perukurenndu maka la kam perlu jera.
15Kalak si mentas arah kuta e megombang ngenehen kam.
Ngupir dingen, tawa ia ngidah Jerusalem si enggo runtuh.
Nina, “Enda kin kuta si mejile nai? Enda kin kuta si ihagaken i doni enda?”
16Kerina imbang-imbangndu nguru-nguru kam, merlang matana ngenen kam perban segatna atena.
Incum-incumi kalak kam janahna nina, “Enggo radas si bahan ia!
Enda me kap wari si itimai-timai kita!”
17Enggo ibahan Tuhan sue ras si isurakenNa, sitik pe la ateNa mekuah,
sue ras si enggo isingetkenNa nai-nai nari.
IbahanNa maka menang imbang-imbangta, iberekenNa man bana keriahen i bas kita guling.
18O Jerusalem, pelepas tembok-tembokndu serko man TUHAN!
Pediat iluhndu erdire-dire suari ras berngi.
Latihi bandu alu tangis ceda ate!
19Gedang-gedang berngi kekelah, jenari terusken ka ngandung man TUHAN.
Kusekenlah isi pusuhndu, pindolah perkuah ateNa guna anak-anakndu.
Anak-anak si sangana lumben i bas tep-tep suki gedang-gedang dalan!
20O TUHAN nehenlah! Uga suina ate kami ibahanNdu!
Pernanden-pernanden mangani daging anak-anak si ikelengina.
Imam-imam ras nabi-nabi ibunuhi i bas Rumah Pertotonna jine!
21Nguda ras metua seri kerina, maten i gedang-gedang dalan.
Anak perana ras singuda-nguda, mate ipan pedang musuh.
Tupung paksa warina Kam merawa ibunuhNdu ia alu la sitik pe ateNdu mekuah.
22ItenahkenNdu imbang-imbangku erbahan pesta meriah i sekelewet kami.
Janah la lit sekalak pe si ngasup pulah tupung warina kam merawa.
Itanemkenna anak-anakku si kuasuhi ras kukelengi.
Currently Selected:
PERNGANDUNGEN 2: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
