SAKARIA 9
9
Ukumen man bangsa-bangsa sekelewet Israel
1Enda kata i bas TUHAN nari: Enggo ibelaskenNa ukumen man negeri Hadrah ras man kuta Damaskus. Labo suku-suku Israel saja ngenca sikerajangen TUHAN, tapi ibukota Siria pe Ia empuna. #Jes 17:1-3; Jer 49:23-27; Amos 1:3-5 #Jes 23:1-18; Esek 26:1–28:26; Joel 3:4-8; Amos 1:9-10; Mat 11:21-22; Luk 10:13-14 2Hamat, si sebalengen ras Hadrah e pe sikerajangen TUHAN, bage pe kuta Tirus ras Sidon, rikut ras kerina kepentarenna. 3Kuta Tirus enggo ibahan bentengna janah enggo ipegun-gun i je emas ras pirak seh buena, maka enggo bali buena ras kubang. 4Tapi ibuat TUHAN me kai si lit i bas kuta e. IbenterkenNa kebayakenna ku lawit, janah kuta e iciluk seh radas kerina.
5Kuta Askelon ngidah si enda pagi, e maka mbiar ia. Kuta Gasa pe ngidahsa, e maka mesui kal akapna. Bage ka pe Ekron, e maka bene me pengarapenna. Gasa kebenen raja, dingen Askelon jadi terulang. #Jes 14:29-31; Jer 47:1-7; Esek 25:15-17; Joel 3:4-8; Amos 1:6-8; Sep 2:4-7 6Bangsa peranaken pagi ngiani Asdod. Nina TUHAN, “Kerina si iagahken bangsa Pilisti Kumasapken pagi. 7Lanai pagi ipanna daging si erdareh denga tah pe pangan si deban si pantang. Kerina kalak Pilisti si tading denga bengket pagi jadi bagin i bas bangsangKu janah bali ras sada terpuk i bas suku Juda. Ekron pe jadi sada bagin pagi i bas bangsangKu, bali ras kalak Jebusi nai. 8Kukawali negeringKu janah la Kupelepas tentera kalak mentas arah e. Lanai Kubere raja penindas nindih bangsangKu. Sabap enggo Kuidah uga kiniseran bangsangKu.”
Raja si nandangi reh
9Ersuraklah, ersuraklah, o anak kuta Sion!
Ersuraklah meriah, o kalak Jerusalem!
Nehenlah, rajandu reh ndahi kam!
Ia dem kemulian, dem kemenangen.
Tapi meteruk ukurna, Ia reh ngersak kelede;
kelede si nguda denga e me anak indung kelede. #Mat 21:5; Joh 12:15
10Nina TUHAN man bangsaNa,
“Kusasapken me gereta perang i Israel nari
bage ka pe kerina kuda i Jerusalem nari;
panah si ipake i bas perang, Kukernepken seh keri.
Rajandu e mperdameken bangsa-bangsa;
i lawit nari seh ku lawit iperentahna kerina,
mulai i Lau Eprat nari, se ku tampuk doni enda.” #Msm 72:8
Bangsa Dibata jore ka pagi mulihi
11Nina TUHAN, “Erkiteken perpadanenKu ras kam, si isahken alu dareh persembahen. Kupulahi kam si terbuang i bas lubang si mbages nari si la erlau. #Kel 24:8 12Mulihlah, o kam kalak buangen, si genduari enggo erpengarapen; mulihlah ku bentengndu si aman. Kukataken man bandu maka Kubereken me man bandu pasu-pasu dua kali lipat erkiteken kiniseran si enggo inanamindu, 13Kupake me Juda desken panah, dingen Israel anak panahna. Dilaki si i Sion Kupake desken sada pedang ngelawan kalak Junani.”
14Teridah me TUHAN i babo bangsaNa; anak panahNa kabang desken kilap. TUHAN si Mada Kuasa ngembus terompetNa, dingen reh Ia i bas angin kaba-kaba i Selatan nari. 15Ikawali TUHAN si Mada Kuasa kap bangsaNa maka ikernepkenNa kerina musuh-musuhna. Ersurak ia i bas perang desken kalak mabuk erkiteken anggur; dareh musuh-musuhna iamburkenna, seh maler desken dareh persembahen si niamburken i bas mangkuk nari ku suki-suki batar-batar.
16I bas wari e pagi, ikelini TUHAN me bangsaNa bali ras permakan ngkelini rarasenna i bas bahaya nari. Bangsa e ersinalsal i bas negerina bali ras permata i bas mahkota. 17Nehen me uga ulina ras jilena pagi taneh e! Anak perana ras singuda-nguda mejuah-juah kerina erkiteken gandum ras anggur si mbaru.
Currently Selected:
SAKARIA 9: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
