SAKARIA 4
4
Pengenehenen kerna nahe lampu
1Malekat si enggo pernah ngerana ras aku e reh ka mulihi, jenari ingetina aku tempa-tempa tunduh aku ndube nari. 2Isungkunna aku nina, “Kai si iidahndu?”
“Sada nahe lampu i bas emas nari,” ningku ngaloi. “I datasna lit sada mangkuk ingan minak. I bas nahe lampu e lit pitu lampu, janah i bas tep-tep lampu lit pitu ingan sumbu. 3Jenari lit ka dua batang saitun deherken nahe lampu e, sada arah kawes, sada arah kemuhen.” #Ket 11:4 4Kenca bage kusungkun malekat e, ningku, “Kai ertina e, tuan?”
5“La kin ietehndu?” nina ka nungkun. “Lang tuan,” ningku njabapsa.
10bNina malekat e man bangku, “Lampu si pitu e, e me mata TUHAN si pitu, si ngidah kerina doni enda.” #Ket 5:6
11Kenca bage kusungkun ia, “Kai antusenna batang saitun si lit arah kawes ras kemuhen nahe lampu e? #Ket 11:4 12Janah kai ka ertina dahan saitun si dua e si lit deherken pipa emas si dua dalan minak saitun e maler?”
13Isungkunna ka aku nina, “La kin itehndu?”
“Lang tuan,” ningku ngaloi.
14Kenca bage nina, “E me dua kalak jelma si enggo ipilih dingen iminaki Dibata jadi serayanNa, serayan TUHAN nu kerina doni.”
Padan Dibata man Serubabel
6Malekat e nuruh aku nehken berita i bas TUHAN nari kempak Serubabel. Nina, “Labo erkiteken gegeh tentera, tah pe arah gegehndu jine maka seh sura-surandu tapi arah kesahKu jine nge. #Esa 5:2 7Aminna bagi deleng pe galangna si ngambati kam, tapi kerina jadi kendit i lebe-lebendu. Ipajekkenndu me Rumah Pertoton e, janah tupung itamakenndu batu si perpudina ndungi Rumah e, ersurak-surak me jelma si nterem nina, ‘Mejile kal, mejile tuhu-tuhu!’ ”
8Reh ka berita si deban man bangKu i bas TUHAN nari. 9Nina, “Serubabel enggo majekken palas Rumah Pertoton e, e maka la banci lang idungina nge. Kenca jadi pagi si enda ieteh bangsangKu maka Aku si nuruh kam ku tengah-tengahna. 10aMecekurak ukurna kerina erkiteken seh kal meletna pendahin majekken Rumah Pertoton e. Tapi idahna Serubabel terus majekken Rumah e, e maka meriah ukurna.”
Currently Selected:
SAKARIA 4: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
