ENDE-ENDEN SALOMO 5
5
Dilaki
1O kemberahenku lawes aku ku pekenku,
i je kupan cambang wani ras tengguli.
Kuinem susu ras lau anggur,
kupepulung rempah-rempah ras mur.
Diberu-diberu
Pangani ras inemlah o teman-teman kerina,
seh maka kerina kam mabuk ate ngena.
Ende-enden si peempatken
Diberu
2Medem aku tapi pusuhku la tertunduh,
ernipi aku impalku nuktuk pintun jenari nina.
Dilaki
Pelepas aku bengket, o jadi ateku,
tambaten pusuhku, manuk mbulanku.
Enggo litap takalku kena embun
bukku enggo lembab kena remang.
Diberu
3Pakenku enggo kutangtangi,
ngkai ka maka kupake mulihi?
Nahengku enggo kuburihi
ngkai maka kumelketi?
4Enggo ijemak impalku pintun,
e maka debet-debet pusuhku perban ia enggo ndeher,
5janah enggo sikap aku nalangi pintun.
Tanku kusapui alu mur,
i bas jari-jaringku nari mur naktaken,
tupung kujemak eruk-eruk pintun.
6Kutalangi pintun maka ku bas impalku ateku,
tapi lanai ia i je.
Lanai kal langlang rincuhna aku megiken sorana,
kudarami ia, tapi sia-sia.
Kulebuhi ia
tapi la lit sora ngaloi.
7Jumpa aku ras si njaga benteng kuta,
ipekpeki dingen ilukaina aku.
Selendangku isintapkenna jenari icaingkenna.
8O diberu-diberu Jerusalem, erpadanlah kam,
adi jumpa kam ras impalku,
katakenlah man bana maka aku sanga mabuk asmara.
Diberu-diberu
9O kam singuda-nguda si mejilena,
lain kin impalndu ras si debanna?
Kai kin i bas ia si man ayaken,
maka terpaksa kami erbahan padan?
Diberu
10Mbestang dingen megegeh kap impalku,
sada i bas sepuluh ribu kap ia.
11Ayona melinang desken perunggu,
bukna keriting dingen mbiring, bali ras perik kak.
12Matana seri jilena ras nderpati i tepi lau mbelin si maler,
nderpati si mbaru meridiken lau susu, jenari cinep i tepi lau.
13Pipina bali jilena ras peken rempah-rempah si merim,
biberna desken bunga encole
erlau-lau ibahan mur.
14Tanna mejile, mejile tempasna,
ipakena gelang emas dem alu permata,
dagingna mbestang desken gading si itamburi alu nilam.
15Pahana bali ras marmar mbentar si ipajekken i bas palas emas
mehaga kal ia bali ras Deleng Libanon,
rikut ras batang kayu arasna si meganjang.
16Biberna ntebu ngemaisa,
asa si lit ibassa, tertambat ibanna pusuhku.
Bage me tempasna impalku e,
o diberu-diberu Jerusalem.
Currently Selected:
ENDE-ENDEN SALOMO 5: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
