RUT 4
4
Rut ras Boas erjabu
1Ingan runggu i bas kuta e biasana deher kerabangen. E maka lawes Boas ku je kundul. Tupung si e mentas si biak senina Elimelek ndube. Idilo Boas nina, “Mari kundul i jenda, senina.” Reh ia, e maka ras ia kundul. 2Kenca bage ipepulung Boas sepuluh kalak nari pertua-pertua kuta e. 3Enggo kenca ia kundul kerina nina Boas man si biak seninana ndai, “Erkite-kiteken Naomi enggo mulih i taneh Moap nari, idayakenna atena taneh seninanta Elimelek ndube. 4Kerna si enda kuakap enggo iangkandu. Adi bage atendu, tukurlah genduari, gelah kerina kalak si pulung enda banci jadi saksi. Sabap leben kap lit hakndu nukur taneh e asa aku. Tapi adi la atendu bage, katakenlah.”
Nina si biak senina Elimelek ndai, “Banci, aku nukursa.”
5Nina Boas, “Merandal adi bage. Tapi adi itukurndu juma e i bas si Naomi nari, e maka si Rut, beru Moap si enggo mbalu e pe arus ikut man bandu. Alu bage juma e tetap i bas keluarga si enggo mate ndube.”
6Nina seninana ndai ngaloi, “Adi bagena kin kepe, ola gia aku sinukursa, sabap bicara kutukur pe kari labo banci kubahan jadi tading-tadingen man anakku. Kamlah nukursa, aku la padah.”
7Tupung paksa si e nai, adi lit kalak si erdaya ntah nukarken barang i Israel, biasana si erdaya e nangtangi sepatuna jenari iberekenna man sinukur. Alu bage icidahken man si nterem maka barang ndai enggo esah idayaken tah itukarken. #Ul 25:9
8Dage tupung ikataken kalak ndai man Boas, “Kamlah nukursa,” itangtangi kalak ndai sepatuna, jenari iberekenna man Boas. 9E maka nina Boas man pertua-pertua ras kerina kalak si deban si ni je, “Kam kap kerina sendah jadi saksina maka enggo kutukur i bas Naomi nari kerina sikerajangen Elimelek, Kilyon ras Mahlon. 10Tambah si e Rut, beru Moap, ndehara si Mahlon ndube, jadi ndeharangku. Alu bagenda maka erta kalak si enggo mate ndube, bage pe gelarna ola masap i tengah-tengah bangsa ras kutana nari. Kam me kerina saksina sendah.” #Ul 25:5-6
11Nina pertua-pertua ras kalak si deban, si i je, “Ue kami jadi saksina. TUHANlah si mahanca maka ndeharandu e bagi Rahel ras Lea si mupusken nterem anak man Jakup. Ertuah bayaklah kam i bas terpuk Eprata janah terberita i Betlehem. #Kej 29:31 12TUHANlah si mahanca maka keluargandu arah anak-anak si nipupus diberu e bali ras keluarga Peres, anak si nipupus Juda ras Tamar.” #Kej 38:27-30
Boas ras kesusurenna
13E maka ibuat si Boas me Rut jadi ndeharana, erjabu ia. Erkite-kiteken pemasu-masun TUHAN mehuli kula si Rut, jenari ipupusna sekalak anak dilaki. 14Erkiteken si e nina diberu-diberu man si Naomi, “Pujilah TUHAN, sabap enggo tubuh kempundu si jadi penampat man bandu. Terberitalah ia i tengah-tengah kalak Israel! 15Keleng kal ate permainndu man bandu, janah enggo lebihen perbahanenna man bandu asangken pitu anak dilaki. Janah genduari kenca kam enggo metua tubuh kempundu arah ia si mereken kegeluhen si mbaru ras ketenengen man bandu.” 16Ibuat si Naomi anak e, iangkipna dingen ipekena-kenana.
17Diberu-diberu si sada kuta ras Naomi mahan gelar anak ndai Obet. Nina sapih-sapih ia, “Sekalak anak dilaki enggo tubuh man Naomi.”
Si Obet me bapa Isai, janah Isai me bapa si Daud.
18-22Enda me terombo keluarga Peres seh Daud: Peres, Hesron, Ram, Abinadap, Nahson, Salmon, Boas, Obet, Isai, Daud.
Currently Selected:
RUT 4: BTX
Highlight
Share
Compare
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.