KETANGKASEN 6

Kerna meterai-meterai

1Jenari kuidah Anak Biri-biri e mecahken meterai si pemena i bas meterai si pitu ndai, janah kubegi sada i bas mahluk si empat ndai ngerana alu sora si bali ras sora lenggur nina, “Mari!” 2Kunehen, janah kuidah sada kuda mbentar. Si ngersak kuda e njemak panah janah ialokenna sada mahkota. Lawes ia ndarat bagi kalak si erperang ngerebut kemenangen. #Sak 1:8; 6:3,6

3Jenari ipecahken Anak Biri-biri e meterai si peduaken, janah asum e kubegi mahluk si peduaken ngerana nina, “Mari!” 4E maka ndarat ka sada kuda gara. Si ngersak kuda e ngaloken pedang si mbelin ras ncedai perdamen i doni, gelah manusia si bunuhen. #Sak 1:8; 6:2

5Jenari ipecahken Anak Biri-biri e meterai si peteluken, janah asum e kubegi mahluk si peteluken ngerana nina, “Mari!” Kunehen, janah kuidah sada kuda mbiring. Si ngersak kuda e njemak sada timbangen. #Sak 6:2,6 6Kubegi bagi sada sora i tengah-tengah mahluk si empat e nari nina, “Segantang beras gaji sada wari, telu gantang jaba gaji sada wari. Tapi ola cedaken batang seton ras batang anggur e.”

7Jenari ipecahken Anak Biri-biri e meterai si peempatken, janah asum e kubegi mahluk si peempatken ngerana nina, “Mari!” 8Kunehen, janah kuidah sada kuda si mbulan rupana. Si ngersak kuda e gelarna Kematen, janah arah pudina ngikut Doni Kematen. Man bana ibereken kuasa nandangi seperempat doni enda, guna munuhisa alu pedang, kelihen, pinakit langket-langket janah alu rubia-rubia si merawa si lit i doni enda. #Esek 14:21

9Jenari ipecahken Anak Biri-biri e meterai si pelimaken. Janah asum e kuidah i teruh batar-batar persembahen tendi kalak si enggo ibunuh erkite-kiteken iberitakenna Kata Dibata janah tutus atena i bas kesaksinna. 10Alu sora megang erlebuh ia nina, “O Tuhan si Mada Kuasa, Badia dingen Bujur! Asakai nari dekahna la iadiliNdu bangsa i doni dingen la iukumNdu kalak si munuh kami?” 11Kerina tendi e ngaloken jubah mbentar, janah man bana ikataken gelah pekesahken kentisik nari, seh kuh bilangenna suruh-suruhen ras senina-senina si nandangi ibunuh bali ras ia.

12Jenari kuidah ipecahken Anak Biri-biri e meterai si peenemken. Asum e jadi linur si mehantu. Matawari jadi mbiring bagi uis kelam-kelam janah bulan megara bagi dareh. #Ket 11:13; 16:18; Jes 13:10; Joel 2:10,31; 3:15; Mat 24:29; Mrk 13:24-25; Luk 21:25 13Bintang-bintang nartar i langit nari ku doni bagi buah mbacang si langa tasak nartar i bas batangna nari asum rembus angin meter. #Jes 34:4 14Langit talang, lit bali ras kire-kire si igulung, janah kerina deleng ras pulo miser i bas ingana nari. #Ket 16:20 15Jenari kerina raja, pemerentah-pemerentah, puanglima-puanglima perang, kalak bayak ras kalak si erkuasa bage pe kerina manusia si deban, subuk budak ntah la budak, kerina cebuni i bas liang ras i selat-selat batu i deleng. #Jes 2:19,21 16Erlebuh ia kempak deleng ras batu e nina, “Dabuhi kami janah tamburi gelah ola kami idah kalak si kundul i kursi Kinirajan e, janah gelah ola kami kena pernembeh Anak Biri-biri e! #Hos 10:8; Luk 23:30 17Sabap enggo seh wari pernembehNa si mbelin e, janah ise kin ngasup ngelawansa?” #Joel 2:11; Mal 3:2

Currently Selected:

KETANGKASEN 6: BTX

Highlight

Compare

Copy