KETANGKASEN 11

Kerna saksi Dibata si dua kalak

1Jenari man bangku ibereken sada kayu penibari bali ras ciken. Man bangku ikataken, “To sibari Rumah Pertoton Dibata ras batar-batar persembahen, janah beligai teremna kalak si ersembah i bas. #Esek 40:3; Sak 2:1-2 2Tapi kesain si arah darat ola sibari, sabap si e enggo iendesken man bangsa si labo kalak Jahudi. Idedehina pagi Kuta si Badia empat puluh dua bulan dekahna. #Luk 21:24 3Kusuruh pagi dua kalak saksingku make uis guni tanda ate ceda. Iturikenna pagi Kata Dibata dekahna 1260 wari.”

4Saksi si dua e, e me batang seton si dua ras lampu si dua si lit i lebe-lebe Tuhan doni enda. #Sak 4:3,11-14 5Adi lit kalak si atena nggasgasisa ndarat api i bas babahna nari ngkernepken musuh-musuhna. Alu bage ise nggasgasi ia mate me. 6Lit kuasana nutupi langit gelah ola nusur udan kidekah ia ernubuat denga. Lit me kuasana nandangi sumbul-sumbul lau, e me guna nalihkenca jadi dareh. Bage pe lit kuasana ngerehken erbage-bage mara ku doni enda piga-piga kali pe atena. #1Raj 17:1; Kel 7:17-19; 1Sam 4:8

7Kenca dung ia ersaksi, rubia-rubia si reh i bas embang e nari ngelawan ia. Italuken rubia-rubia e me ia duana dingen ibunuhna, #Dan 7:7; Ket 13:5-7; 17:8; Dan 7:21 8janah maitna ampar me i bas pasar kuta si meriah, i ja Tuhan ipakuken ku kayu persilang. Kuta e iumpamaken gelarna Sodom ntah Mesir. #Jes 1:9-10 9Kerina pemerentahen, suku, cakap, ras bangsa ngenehen maitna telu setengah wari dekahna janah la iberena mait e ikuburken. 10Meriah me ukur manusia si i doni e i bas kematen saksi si dua enda. Erpesta ia kerina dingen mereken luahna ia sekalak nandangi si debanna, sabap nabi si dua e enggo ngerehken kiniseran-kiniseran nandangi manusia si i doni enda. 11Kenca si telu setengah wari e, reh kesah si nggeluh i bas Dibata nari, mengketi nabi si dua kalak e. Jenari tedis ia duana, janah mbiar kal kalak kerina si ngenehen ia. #Esek 37:10 12Kenca bage ibegi nabi si dua e sora si megang i Surga nari, ngerana man bana nina, “Marilah ku datasken!” Asum itatap musuh-musuhna ia, nangkih ia ku Surga, ras embun. #2Raj 2:11 13Paksa si e kal pe jadi me linur si mesangat. Kernep sepersepuluh kuta e, janah mate pitu ribu kalak jelma ibahan linur e. Jelma si debanna mbiar kal janah iberekenna kemulian man Dibata si i Surga. #Ket 6:12; 16:18

14Cilaka si peduaken enggo lepas. Tapi nehenlah! Reh me cilaka si peteluken.

Terompet si pepituken

15Jenari iembus malekat si pepituken e terompetna. Paksa si e terbegi sora-sora si megang i Surga nari nina, “Kuasa guna ngerajai doni enda genduari enggo i bas tan Tuhanta dingen Mesias si ipadankenNa janah IA ngerajaisa rasa lalap seh rasa lalap.” #Kel 15:18; Dan 2:44; 7:14,27 16Jenari pertua-pertua si dua puluh empat si kundul i bas kursi kinirajan i lebe-lebe Dibata erjimpuh dingen nembah man Dibata, 17nina,

“O Tuhan Dibata si Mada Kuasa

si enggo lit genduari ras nai nari.

Bujur ikataken kami man bandu sabap enggo ipakeNdu kuasaNdu, si mbelin e,

janah enggo Kam ngerajaisa kerina.

18Merawa kalak si la nandai Tuhan,

sabap enggo seh paksana icidahkenNdu rawaNdu,

janah iadiliNdu kalak si enggo mate.

Genduari me paksana guna mereken upah man suruh-suruhenNdu, e me nabi-nabi

bage pe man kerina anak-anakNdu, kerina kalak si erkemalangen man baNdu

subuk si kitik bage pe si mbelin.

Genduari me paksana guna ngkernepken kalak si ncedaken doni.” #Msm 2:5; 110:5; 115:13

19E maka talang Rumah Pertoton Dibata i Surga, janah teridah i je Peti Perpadanen. Jenari reh kilap, sora si ergeruhguh, lenggur, linur ras udan baho si mehantu. #Ket 8:5; 16:18; 16:21

Currently Selected:

KETANGKASEN 11: BTX

Highlight

Compare

Copy