KETANGKASEN 1
1
1Enda me ketangkasen si ibereken Dibata man Jesus Kristus guna ncidahken man persuruhen-persuruhen Dibata kai si nandangi pedas jadi. Si enda ipetangkas Kristus man persuruhenNa Johanes alu nuruh malekatNa ndahi Johanes. 2E maka ituriken Johanes me kerina si enggo idahna e. Enda me si ipesehna kerna Kata Dibata dingen si ibenarken Jesus Kristus. 3Ketuahen kalak si ngogeken Kitap enda. Ketuahen kalak si megiken kata nubuat dingen ngikutken kai si tersurat i bas Kitap enda! Sabap enggo ndeher paksana jadi me kerina si tersurat enda.
Salam man perpulungen si pitu
4I bas Johanes nari, man perpulungen si pitu i Propinsi Asia. Simparlah man bandu keleng ate ras dame si rehna i bas Dibata nari, e me Dibata si nai nari lit seh asa genduari dingen si lit seh rasa lalap, bage pe si rehna i bas Kesah si pitu nari si ringan i lebe-lebe kursi kinirajan Dibata. #Kel 3:14; Ket 4:5 5Bage pe alokenlah perkuah ate ras dame si rehna i bas Jesus Kristus nari, saksi si tutus, Anak sintua si enggo ipekeke Dibata i bas si mate nari, si erkuasa nandangi kerina raja-raja i doni enda.
Keleng ate Jesus kita, janah arah kematenNa ipulahiNa kita i bas dosa-dosanta nari. #Jes 55:4; Msm 89:27 6IA me si erbahanca kita jadi kinirajanNa, e me jadi imam-imam guna ndahiken dahin Dibata, BapaNa. Iakuilah kemulian ras kuasaNa seh rasa lalap. Amin. #Kel 19:6; Ket 5:10
7Nehenlah, ia reh ras embun! Kerina kalak ngidah IA pagi, subuk kalak si enggo nebak ia pe. Kerina suku-suku bangsa i doni enda nangisi IA. Payo, bage me jadina. Amin. #Dan 7:13; Mat 24:30; Mrk 13:26; Luk 21:27; 1Tes 4:17; Sak 12:10; Joh 19:34,37
8“Aku kap si perlebe ras si pendungina,” nina Tuhan, Dibata si Mada Kuasa, nai nari, genduari, seh rasa lalap. #Ket 22:13; Kel 3:14
Kristus teridah i bas sada pengenehenen
9Aku Johanes, seninandu, erkiteken persadanta i bas Jesus Kristus. Aku ikut ras kam ngenanami kiniseran ras i bas kinirajanNa bage pe ikut megenggeng nimai kerehen Jesus. Aku ibuang ku Pulau Patmos erkiteken kuberitaken Kata Dibata ras ersaksi kerna Jesus. 10I bas wari Tuhan ikuasai Kesah Dibata aku, jenari kubegi sora megang bagi sora terompet, ngerana i pudingku. 11Nina, “Suratkenlah kai si idahndu, jenari kirimken Kitap e man perpulungen si pitu e me Epesus, Semirna, Pergamon, Tiatira, Sardes, Piladelpia ras Laodikea.”
12Kutulihken ku pudi guna ngenen ise si ngerana man bangku e. Kuidah pitu nahe lampu si ibahan i bas emas nari. 13I tengah-tengahna lit kuidah tedis bagi Anak Manusia. IpakeNa jubah si gedang seh ku naheNa janah sada gendit emas ililetken i bas tentenNa. #Dan 7:13; 10:5 14Bukna mbentar bagi kapas, bagi embun si mbentar, janah mataNa ernala, bagi dilah api; #Dan 7:9 #Dan 10:6 15naheNa erkilat-kilat bagi tembaga si enggo ilebur i bas pertukangen jenari isepuh. SoraNa bali ras sora sampuren si mbelin. #Esek 1:24; 43:2 16TanNa si kemuhen njemak pitu bintang, i bas babahNa nari ndarat sada pedang si ntelap, ermata dua. AyoNa ersinalsal bagi matawari tupung ciger. 17Asum kuidah IA, nerunuk aku i lebe-lebe naheNa bali ras kalak mate. Jenari itamakenNa tanNa si kemuhen ku babongku, janah nina, “Ola mbiar! Aku kap si perlebena dingen si pendungina. #Jes 44:6; 48:12; Ket 2:8; 22:13 18Aku kap si nggeluh! Mbarenda mate Aku, tapi nehenlah, Aku nggeluh rasa lalap. Aku njemaksa kunci kematen ras doni kematen. 19E maka suratkenlah kai si enggo idahndu, si jadi genduari, bage pe kai si nandangi jadi pagin. 20Enda me antusenna rahasia bintang si pitu si enggo idahndu i bas tanKu si kemuhen bage pe nahe lampu si pitu si ibahan i bas emas nari; bintang si pitu e, e me malekat-malekat perpulungen si pitu, janah nahe lampu si pitu e, e me perpulungen si pitu e.”
Currently Selected:
KETANGKASEN 1: BTX
Highlight
Share
Copy
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.