MASMUR 79
79
Pertoton guna pembebasen bangsa
1Masmur Asap.
O Dibata, bangsa si la nandai Kam,
enggo iserbuna negeriNdu.
Ikaruskenna RumahNdu,
jenari iruntuhkenna Jerusalem. #2Raj 25:8-10; 2Kro 36:17-19; Jer 52:12-14
2Bangke suruh-suruhenNdu itadingkenna jadi pangan man perik i awang-awang.
Bangke bangsaNdu ipediatna jadi pangan rubia-rubia si meliar.
3I belang-belang Jerusalem, mambur dareh seri ras lau;
janah la lit si tading ngkuburkenca si enggo mate.
4Kami jadi saling-salingen bangsa si isekelewet kami,
janahna ngupir itawaina kami.
5O TUHAN rasa lalap kin Kam nembeh,
dingen cemburuNdu gara bagi api?
6Useken min rawaNdu man bangsa-bangsa si la nembah man baNdu
dingen kerajan-kerajan si la ertoto man baNdu.
7Sabap kalak enda enggo munuh bangsaNdu,
jenari ikernepkenna tanehna.
8Ola kami iukumNdu erkiteken dosa nini-nini kami,
pedas min bereken perkuah ate, sabap kote kal kami.
9O Dibata penampat kami,
kelini kami dingen alemi dosa-dosa kami erkiteken kemulianNdu.
10Ola pelepas bangsa si deban nungkun kerna kami,
“I ja Dibata kalak ah?”
Bere maka idah kami pembalasen si ibahanNdu,
man bangsa-bangsa si munuh suruh-suruhenNdu.
11Begikenlah uga perndehereng kalak si tertaban,
alu kuasaNdu bebasken min kalak si nandangi iukum mate.
12O TUHAN, balaslah pitu kali lipat, nandangi bangsa-bangsa si deban
erkiteken ibahanna man baNdu penghinan.
13E maka kami bangsaNdu, biri-biri permakanenNdu,
lalap kami ngataken bujur,
dingen ipuji kami Kam seh rasa lalap.
Currently Selected:
MASMUR 79: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
