MASMUR 75
75
Dibata kap hakim si meganjangna
1Masmur Asap; ende-enden.
2Ikataken kami bujur man baNdu, o Dibata, ikataken kami bujur.
GelarNdu iberitaken kami,
perbahanenNdu si mejin imomoken kami.
3Nina Dibata, “I bas paksa si Kutentuken,
reh aku ngerunggui alu bujur.
4Aminna mundu-undu pe doni enda ras kerina isina,
palasna tetap nteguh Kubahan.
5Kukataken man kalak megombang,
gelah olanai ia megombang.
Kukataken man kalak jahat
gelah olanai meganjang ukurna.
6Kukataken man bana gelah ola meganjang rukur,
ntah pe meganjang ngerana.”
7Sabap pengakimen labo reh i Timur ntah i Barat nari,
labo ka reh i Utara ntah i Selatan nari.
8Tapi Dibata jine hakim,
iukumNa sekalak dingen ipulahiNa si deban.
9Pernembeh ate TUHAN desken calung i bas tanNa,
calung isin lau anggur si rugup-ugup.
Dibata nguseken calung e,
kerina kalak jahat minem taresa ngayak keri.
10Tapi rende aku muji Dibata nu Jakup,
rasa lalap ateku meritaken perbahanenNa.
11IpenggelkenNa kuasa kalak jahat,
tapi kuasa kalak bujur reh tetapna.
Currently Selected:
MASMUR 75: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
