MASMUR 62
62
Tek man pengkawali Dibata
1Masmur Daud.
2Alu sinik kutimai Dibata ngkelini aku,
sabap man baNa saja ngenca aku ernalem.
3IA ngenca si ngkawali dingen si ngkelini aku,
IA penampatku, la ndigan pe aku talu.
4Aku enda enggo buruk desken bide si runtuh;
asa kai nari dekahna atendu ngayak-ngayak aku?
5Atendu ndabuhken aku saja ngenca
i bas inganku si meganjang nari.
Ngena atendu kata la tuhu,
i bas biber ngenca kam masu-masu, tapi i bas ukur kam numpahi.
6Alu teneng kutimai Dibata,
pengarapenku man baNa saja ngenca.
7IA ngenca si ngkawali aku dingen engkelini aku,
IA penampatku, la ndigan pe aku talu.
8IA kap Dibata si ngkelini dingen mereken kemulian bangku,
Dibata kap gegehku dingen kecionku.
9O bangsangku, ernalemlah man Dibata katawari pe,
turiken isi pusuhndu man baNa,
sabap IA kap inganta cicio.
10Manusia e bali ras sekali erkumesah ngenca,
si mehaga tah medungu kerina ia la lit ergana.
Adi itimbang, ieteh maka menahang me ia,
nahangen asangken sekali erkumesah.
11Ola arapken ulih kejahaten,
dingen keuntungen i bas barang rampasen.
Aminna pe tambah-tambah kebayaken,
ola leket ukurndu ku je.
12Piga-piga kali kubegi Dibata ngerana,
maka IA nge si Mada Kuasa,
13dingen keleng ateNa tetap rasa lalap.
Kam o TUHAN, mereken upah man tep-tep kalak
rikutken perbahanenna. #Jop 34:11; Jer 17:10; Mat 16:27; Rom 2:6; Ket 2:23
Currently Selected:
MASMUR 62: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
