MASMUR 56
56
I bas kesusahen ernalem man Dibata
1Masmur Daud tupung ia itangkap bangsa Pilisti i Gat. #1Sam 21:13-15
2O Dibata mekuah min ateNdu aku,
sabap itindih musuhku aku,
lalap aku iayak-ayakna.
3Gedang-gedang wari iserang musuhku aku,
nterem kal kalak si ngelawan aku.
4Tupung aku mbiar, o Dibata si Meganjang,
Kam saja penalemenku.
5O Dibata, Kam kap pengarapenku, e maka la mbiar aku.
Kai kin banci ibahan kalak man bangku?
Kupuji Kam kerna kai si ipadankenNdu.
6Gedang-gedang wari isuhsahi imbang-imbangku aku,
lalap ia ersura-sura encilakaken aku.
7Pulung ia i bas inganna cebuni,
jenari iperdiatekenna kai si kulakoken
ndarami kesempaten lako munuh aku.
8Balas min kejahatenna, o Dibata,
kernepken min ia alu pernembehNdu.
9IdahNdu kap uga belinna kiniseranku,
iperdiatekenNdu iluhku mambur,
ma e kerina enggo isuratken i bas kitapNdu?
10Tupung warina aku erlebuh man baNdu, o Dibata,
surut imbang-imbangku kerina,
sabap tek aku maka Kam kap ras aku.
11Kupuji Kam, o Dibata, kerna si enggo ipadankenNdu.
12Kam kap pengarapenku, e maka la aku mbiar.
Kai kin si banci ibahan kalak man bangku?
13O Dibata, kupersembahken baNdu kerina si enggo kupadanken,
persembahen pengataken bujur kupersembahken baNdu.
14Sabap ipulahiNdu aku i bas kematen nari,
jenari ikawaliNdu maka la aku talu.
E maka banci aku erdalan i adep-adepen Dibata,
i bas sinalsal si nerangi kerina si nggeluh.
Currently Selected:
MASMUR 56: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
