MASMUR 32
32
Pengakun dingen pengalemen
1Ende-enden si Daud.
Sangap kal kalak adi dosa-dosana ialemi
dingen salah lepakna isasapken. #Rom 4:7-8
2Sangap kal kalak, adi dosana la itaktaki TUHAN
dingen i bas ukurna pe la lit penipu.
3Tupung la kuakuken dosa-dosangku,
kote aku perban ndehereng tep-tep wari.
4O TUHAN, iukumNdu aku suari berngi,
keri gegehku bali ras remang kena las wari.
5E maka kuakui dosa-dosangku man baNdu,
salah lepakku pe la lit kubuniken.
Kutetapken ukurku ngakuisa man baNdu,
jenari dosa-dosangku ialemiNdu. #2Sam 12:13
6Erkiteken si e ertotolah min perpulungen si tutus,
tupung ia i bas kiniseran.
Gelah adi reh galumbang kesusahen,
la seh man bana.
7Kam kap inganku cebuni,
ipulahiNdu aku i bas kesusahen nari.
E maka ersurak aku perban riahna,
sabap enggo aku ipulahiNdu.
8Nina TUHAN, “Aku nuduhken dalan si man dalanenndu,
Kuajarken kam dingen matangKu tetap mperdiateken kam.
9Ola kam bali ras kuda si la rukur,
si arus iatur alu sangam ras tinali,
adi la bage la nggit patuh.”
10Mbue kiniseran si man tahanenken kalak jahat,
tapi kalak si ernalem man TUHAN,
ikelewetiNa alu keleng ateNa si tetap.
11O kalak bujur meriahlah atendu i bas TUHAN.
Suraklah alu meriah, o si ngikutken IA.
Currently Selected:
MASMUR 32: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
