MASMUR 3
3
Pertoton erpagi-pagi mindo penampat
1Masmur Daud kenca ia lompat i bas anakna Absalom. #2Sam 15:13–17:22
2O TUHAN, nterem kal musuh-musuhku,
nterem kal si ngelawan aku!
3Icakapkenna aku nina,
“Labo isampati Dibata ia.”
4Tapi Kam o TUHAN, Kam kap ampang-ampangku
iberekenNdu kemenangen man bangku;
janah ipetetapNdu ukurku.
5Erlebuh aku mindo penampat man TUHAN,
janah ialoiNa aku i datas delengNa si badia nari.
6Medem aku, jenari tertunduh,
janah gedang-gedang berngi ikawali TUHAN aku.
7La aku mbiar musuhku meribu-ribu
si arah japa pe ngepung aku.
8Mari o TUHAN, pulahi aku o Dibatangku!
IukumNdu kerina musuh-musuhku
seh maka lanai ia ergegeh ngelawan aku.
9Kemenangen rehna i bas TUHAN nari kap;
ipasu-pasu Dibatalah bangsaNa.
Currently Selected:
MASMUR 3: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
