MASMUR 19
19
Dibata ermulia i bas tinepaNa
1Masmur Daud.
2Langit encidahken kemulian Dibata,
awang-awang erberita kerna perbahanenNa.
3Tep-tep wari erberita kempak wari si pagina,
tep-tep berngi nuri-nuri man berngi si pagina ka.
4La lit si ngerana ntah melasken kata,
la lit sora si terbegi.
5Tapi sorana erdengung i belang-belang doni enda,
terbegi seh ku tampuk doni.
Ibahan Dibata rumah i langit man ingan matawari, #Rom 10:18
6erpagi-pagi pultak matawari desken dilaki si mbaru empo luar bas bilik nari,
bali ras si mbisa erlumba alu dem keriahen.
7Erdalan ia i bas ujung langit nari,
terus ku ujungna si deban ikeparina.
Kai pe la banci cebuni i bas las sinalsalna nari.
Undang-undang TUHAN
8Undang-undang TUHAN e serta kap,
ia mereken gegeh si mbaru.
Perentah TUHAN terteki tuhu,
mereken pengertin man kalak si kurang pentar.
9Undang-undang TUHAN benar kap,
e maka kalak si ngikutkenca meriah tetap.
Perentah TUHAN benar kap,
mereken pengertin ku bas perukuren.
10Ersembah man TUHAN mehuli kap,
tetaplah e rasa lalap.
Putusen TUHAN adil kap,
dingen tetap rembang tengah.
11Asangken emas murni pe jilen kap e
tebun asangken tengguli si entebuna.
12Aku suruh-suruhenNdu
ndatken pemeteh ibassa nari.
Erkiteken kepatuhenku
dat upah aku ibassa nari.
13La lit si meteh salahna jine,
e maka bebasken aku i bas kesalahenku si la kueteh.
14O TUHAN i bas dosa si kueteh pe kelini min aku
ola pelepas ia erkuasa i bas aku.
Maka aku jadi serta
pulahi min aku i bas dosa si jahat e.
15Min ngena ateNdu rananku ras perukurenku,
O TUHAN, kam kap kecionku dingen penebusku.
Currently Selected:
MASMUR 19: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
