MASMUR 105
105
Dibata ras bangsaNa
(1Kro 16:6-22)
1Katakenlah bujur man TUHAN,
momokenlah kemulianNa.
Turikenlah perbahanenNa, ku kerina bangsa-bangsa.
2Rendelah muji TUHAN,
turikenlah perbahanenNa si mejin.
3Meriahlah ateta sabap IA kap si mada kita,
asa kalak si nembah IA meriahlah ukurna.
4Dahilah TUHAN mindo penampat,
sembahlah IA rasa lalap.
5-6Kam, kesusuren Abraham, suruh-suruhen Dibata,
dingen kesusuren Jakup si ipilihNa
ingetlah kerina tanda kuasa si ibahanNa,
dingen putusen-putusen si enggo iberekenNa.
7 TUHAN kap Dibatanta,
perentah-perentahNa arus ipatuhi i belang-belang doni enda.
8Perpadanen si ibahanNa lalap iingetNa,
padanNa seh ku sundut peseribuken.
9IngetNa kap perpadanenNa ras Abraham,
padanNa man Isak la ilupakenNa. #Kej 12:7; 17:8; 26:3
10Man Jakup perpadanen e ipeteguhiNa,
jadi ketetapen man Israel rasa lalap. #Kej 28:13
11Nina, “Man bandu Kubereken taneh Kanaan,
jadi taneh pusakandu.”
12Nai bagi kalak pertandang nge bangsa Dibata e i je,
beliganna pe la kasa kai.
13Tandang-tandang ia i bas sada bangsa nari ku bangsa si deban,
miser i bas sada negeri nari ku negeri si deban.
14Tapi la ipediat TUHAN ise pe ndeheri bangsa e,
janah guna ngkawalisa ipersingeti Dibata raja-raja nina, #Kej 20:3-7
15“Ola suhsahi bangsa pilihenKu
ola bahan jahat man nabi-nabingKu.”
16Ibahan TUHAN maka jadi me kelihen i bas negeri kalak enda,
jenari ibuatNa i bas kalak enda nari kerina persedian pangan. #Kej 41:53-57
17Tapi enggo isuruhNa sekalak dilaki ngelebei ia,
Jusup, si enggo idayaken jadi budak. #Kej 37:28; 45:5
18Erdalan ia alu nahena igari,
kerahungna iiket alu rante besi. #Kej 39:20–40:23
19Dungna teridah maka payo bagi kata Jusup ndube,
kata TUHAN encidahkenca maka ia benar.
20Jenari raja Mesir, penguasa bangsa-bangsa,
mbebasken ia i bas tutupen nari. #Kej 41:14
21Iendeskenna man bana tugas ngurus istana,
jenari iangkatna ia jadi si merentah kerina negeri e. #Kej 41:39-41
22Alu kuasana jine iaturna menteri-menteri,
pertua-pertua kerajan iajarina.
23E maka lawes Jakup ku Mesir,
dingen tading ia i je. #Kej 46:6; 47:11
24Ibahan TUHAN maka ertuah bangsaNa,
e maka enggo gegehen ia asangken imbangna. #Kel 1:7-14
25Ibahan TUHAN maka nembeh ate kalak Mesir man bangsa e,
jenari itipu kalak Mesir suruh-suruhen TUHAN.
26Kenca bage isuruh TUHAN si Musa, suruh-suruhenna,
ras Harun, kalak pilihenNa. #Kel 3:1–4:17
27I Mesir ilakokenna tanda kuasa,
perbahanen-perbahanen si mbelin i bas TUHAN nari.
28Ibahan TUHAN maka gelap tuhu-tuhu negeri e,
tapi bangsa Mesir la ngikutken perentahNa. #Kel 10:21-23
29Lau belin i Mesir isalihken TUHAN jadi dareh,
e maka mate kerina binurungna. #Kel 7:17-21
30Katak erkemut i belang-belang negerina,
seh bengket ku kamar raja. #Kel 8:1-6
31Kenca e iperentahken Dibata rehen rengit-rengit ras laneng,
rulung-ulung i bas kerina negeri e. #Kel 8:16-17; 8:20-24
32Gancih udan ipesusur TUHAN baho,
dingen perkas ras kilap si erdepar-depar. #Kel 9:22-25
33Mbulaken ibanNa batang anggur ras batang ara,
kerina batang kayu i negerina itombangkenNa.
34IberekenNa perentah, e maka rehen labang,
beliganna la teralang. #Kel 10:12-15
35Keri kerina ipanganina sinuan-sinuan i negeri e,
kerina si man peranin kernep ibanna.
36E maka kerina anak kalak Mesir sintua ibunuhNa,
mate kerina anak-anak perana sintua i bas tep-tep keluarga. #Kel 12:29
37Jenari maka ibabai TUHAN bangsa Israel ndarat,
ibabana emas ras pirak.
Iteruh pengkawali TUHAN,
kerina megegeh ras mejuah-juah. #Kel 12:33-36
38Kerina kalak Mesir mbiar ngenehenca,
e maka meriah ukurna tupung lawes kalak enda.
39Ikimbangken Dibata sada embun i babona,
tupung berngi iberekenNa man kalak enda sada api si erbahanca terang. #Kel 13:21-22
40Erkiteken pemindon bangsa e isuruhNa reh leto,
ipanganina ngayak besur pangan si reh i Surga nari. #Kel 16:2-15
41Itakana deleng batu, e maka erburak lau i jenari,
maler desken lau belin i gurun pasir. #Kel 17:1-7; Bil 20:2-13
42Sabap iinget TUHAN perpadanenNa
man suruh-suruhenNa Abraham.
43Bage me itaruhkenNa ndarat bangsa pilihenNa
alu ukur meriah rende bangsa e janah ersurak-surak.
44IberekenNa man kalak enda taneh bangsa-bangsa si deban,
ulih latih kalak jadi sikerajangen bangsaNa, #Jos 11:16-23
45gelah tetap ipatuhi kalak enda undang-undangNa,
dingen ngikutken perentah-perentahNa.
Pujilah TUHAN!
Currently Selected:
MASMUR 105: BTX
Highlight
Copy
Compare
Share
Want to have your highlights saved across all your devices? Sign up or sign in
Batak Karo Bible © Indonesian Bible Society, 2003.
